今日原本自己同Goofy去泳池游水架, 不過尋日表哥表妹佢地約去白腊游水, 而大表姐又話可以一齊去夾車, 咁所以就同左佢地去白腊游水 ! 去到北潭涌時先知原來尋日亞奶話約左果個Stanley 就係囡囡佢地一家喎~
今日玩得好開心呀, 因為好好玩! 初時出門口時, 個天仲係黑晒, 仲落緊雨添, 不過去到白腊沙灘時, 成個海灘都冇乜人, 好似我地玩晒咁, 玩左一陣, d陽光就開始出番黎啦, ~ Goofy 都玩得好開心呀, 佢係咁同d大浪搏鬥, 我估佢玩撲浪都玩到攰~ 玩完之後就去左士多飲野, 但食緊野時, 佢地一班提議去食附近食海鮮 ! 沖完身我地就出發, 行大約20幾分鐘既山路去糧船灣果度食晚餐 !
我地最後去左一間叫友利既海鮮酒家度食 ! 果度食都幾平, 9個人, 叫左一個套餐, 有十道菜, 每人都係夾番$130蚊 ! 而且d野食都幾好食, 又新鮮 ! 食完之後, 大家都決定唔行山返出去搭車, 改為搭街渡咁既船返出西貢市中心, 每位$35蚊 ! 大家都超出晒原定既計劃, 因為大家冇諗住會攪到咁晏先散, 更加冇諗過食海鮮 ! 不過都係一個體驗, 因為我未去過糧船灣架 ! 如果將來, 亦都唔知會唔會無啦啦入去, 起碼今日都叫做去多左一個香港既特色地方 !
出返西貢市已經7點鐘, 大家都開始攰啦~ 好在係白腊既士多度已經同Goofy沖左涼o者, 如果唔係, 就真係有排攪啦~~
今日最最最開心就係Goofy好乖仔呀 ! 佢係沙灘度冇攪事, 好乖自己玩, 食飯時又冇嘈, 又冇成日上檯, 淨係o係地下自己訓~