奶奶衫 - 金都傾城 80分 同奶奶租左一件棗紅色閃閃地金葉仔的衫($450)! 佢勁鐘意! 自己走去租多件銀色席前著! 奶奶對呢間野好滿意咁! 我覺得奶奶/媽媽衫呢家野靚唔靚一件事, 最緊要奶奶/媽媽著得開心覺得靚! 今次我奶奶就十分之滿意! 我自己覺得d奶奶衫間間差唔多. 幾百蚊一件都幾平! 傾城人手唔多夠! 同埋超級西飛利多人! 等左好耐先有人理, 不過我地都無要過佢地理, 自己拎d衫去試!

攝/錄影 - Amazing Grace (Ken-攝 + 阿全-錄) 70分 優: 金都店果邊的服務好好, 非常有禮貌! 價錢又平! 師父好識講野, tum得老人家非常開心! 攝/錄影師都有禮貌, 幾nice. 影standard相ok, standard相只求四平八穩夠清楚姐. 缺: 無join snapshot因為有朋友幫手, 不過攝影師都有影下少少snap, 但影得麻麻地. 另外因為兄弟拒絕擺排排插褲袋等老土pose影相, 攝影師有點黑面. 晚上一d snapshot都無影, 又無影reception台同油畫果d~ 同埋好少我同A生既合照咁. 話3個星期有相, 但等左成個月先有(可能旺季掛) 另外DVD到而家仲未有.

花球 - Agnes B florist @ Festival Walk 90分 落訂果時本想訂紅色Cally Lily, 但果時agnes b confirm唔到12月會唔會有貨, 所以我就訂左另一款red rose, 叫佢如果Cally Lily有既話再通知我再唸轉唔轉. 後來因為我都忘記左Cally Lily既事, 所以跟住落黎我地既deco, 襟花, 所有有關既野都用左red rose去做. 到左婚前幾日, agnes b真係打來! 話我要既red cally lily已經同我訂左! 話我拎花果日比埋個差價就得! 下?! 可能當日落訂真係溝通有問題啦! 佢話我當日話我既first choice係cally lily wor! (又真係wor) 所以佢當我要cally lily先, 但因為佢confirm唔到有所以要我揀多個second choice - red rose...下刪一萬字! 但我所有野都用哂red rose, 無啦啦用cally lily 花球都唔關事, 點搞呀. 好在最後佢都比我用番red rose! 婚前一晚差唔多夜晚8點幾先去取花. d花已經ready! 好靚, 有個好大既紫色agnes b手抽盒裝住. 所以拎住佢行都唔會好難搞. 花球同頭花都有水養住, 但襟花就因為痴左膠紙所以無水養. 結婚當日個花球用左成日都無乜點殘, 只係外圍成日擦到既花的邊位有少少燶. 中間果d仲好靚! 襟花本身預左佢頂唔到夜晚, 但估唔到又涯到wor. 所以夜晚A生都無換到襟花. 婚後果日個花球本來想拎番屋企(仲幾靚), 不過實在太多野拎所以最後掉棄在酒店房...幾唔捨得

Pre Wedding Photo - Basaa 30分 Basaa單野真係一疋布咁長. 詳情可見呢兩條link : http://hk.myblog.yahoo.com/aj-1212/article?mid=199 http://hk.myblog.yahoo.com/aj-1212/article?mid=104 我可以話, 如果你係有要求, 有idea, 有theme or 你心目中有個pictire比佢影, 你就千萬唔好搵佢!

花車 - HK Transit 曾生 (BMW 銀色4系 + 29坐VAN) 100分 曾生係esdlife搵的. 超準時, 有禮, 曾生個樣好似何家勁! 主車同van都好新淨/乾淨, 主車仲有幾樽水同飲管係度(幾細心)! 當日約左架Van(曾生provide佈置, 唔洗自己買)一早係男家接兄弟去女家, 而BMW(曾生渣)就約左10:30係女家樓下等! Van準時到左男家接人, BMW9點45就到左女家樓下(梗係無收錢)!!! 早左勁多!! 佈置野由兄弟交左比曾生佈置埋! 唔洗自己做! 食lunch時本身預埋司機們, 但佢話唔洗食wor~ 到左紅棉後曾生都幫手拆埋d佈置比番我地. 仲話係度幫我地係停車場等車位比A生渣緊車趕緊黎既姐夫(不過最後都等唔到走先). 另外話說之前因為我覺數數下覺得架van可能唔夠坐, 問佢可唔可以搵多架來, 佢話太抆水但都有幫手, 最後真係無車, 佢見議我地走2轉都得, 反正架van都包8個鐘, 走幾多次都係咁多錢.

主車車花 - 3942050 Carmen 70分 優: 車花真係整得好靚! Carmen幾好交帶同埋follow得好好, 會比d花相比你揀同埋打黎問你鐘意d乜咁. 價錢都唔貴....不過做前最好講明包車頭, 車尾, 車門, V帶同札在V帶上既花. 因為我無講明要V帶上既花所以佢無做比我, 而花材都用哂了...所以我V帶無花札呢, 不過carmen話呢個款咁紅唔好咁多野太fancy喎. 缺: 因為條V帶痴住車頭花個位整得唔實, 搞到開車去註冊處中途甩左出黎! 成條v帶係車頂飛飛下! 果時又係高速公路搞唔到, 花車司機唯有開左天窗夾住佢! 好樣衰! 扣30分!

短身男禮(日) - 祥興洋服 70分 優: 平! $998訂造成套包埋改回做西裝! 仲想點??? 用料都ok! cutting都ok, 但要跟得好緊先得. 邊度要收多d邊度要收少d要講到明, 佢唔會自動自覺同你講款. 缺: A生話條褲做極都唔夠slim, 可能佢有條靚既做比較啦. 其實我覺得條褲無問題. 另西裝後幅太短.

化妝 - Chong Makeup (May-妝 & Vivian-頭) 70分 優: 準時+超級快手, 快得驚人! 試過幾間化個底都成個幾鐘! 佢地可以係個幾鐘內化完4個人! 婚前會有多一次free trial, 會試4個妝/頭. 正日當日化妝會比試妝時更仔細, 新娘妝會用掃上濕粉, 唔係粉撲. 個妝自然, 唔會成個粉樣! 靚! 最滿意係褂同註冊個妝/頭! 另外佢地的頭飾/頸鏈都ok. 有d都幾岩用, 除左你之前揀左果d, 佢仲會另外帶d大路既比你spare用, 如珍珠耳環/鏈之類. 缺: d工具好似好耐無洗. 另外唇彩又直接渣落咀(我間接同好多新娘kiss過) 好多人都大讚vivian整頭, 反而我就唔多鐘意. 之前試妝佢整既頭都好好睇. 唔知做咩當日佢整既都唔係咁岩我心水, 有d頭我專登帶埋相去酒店比佢跟住整, 佢整得都唔多似. 同埋送客時個頭好散咁, 好在影相都好睇唔多覺. 同媽媽們化妝好似有點求其, join左既朋友要跟緊d (新人當日都唔得閒跟架喇, 所以叫你的姊妹們睇緊)

兄弟姊妹襟花 - 3942050 Carmen 50分 我比哂絲帶同部份花材比Carmen整襟花! (本身我想自己整所以買哂野番來, 但後尾又無時間整) 睇Carmen d相的襟花都好靚, 所以搵番佢整! 雖然我provide左幾多材料比佢但都無discount (我都無要求平d只係想靚d就得). 佢整好send相來時見到姊妹手花用來札手部份用條好幼的絲帶綁係度就算, 之前答應我加橡筋cool手的(因為我覺得只用絲帶唔穩又轉來轉去). 最後交貨時佢已改番橡筋比我, 但又把絲帶拆走, 我本身唸住係cool橡筋外圍再綁條絲帶遮下條橡筋無咁醜樣架嘛! 襟花又無比大頭針比我. 仲有睇到真樣我覺得今次真係幾求其下! 全部襟花既ribbon就咁圈兩圈再用膠紙痴, 唔係綁的. 最後我自己花左成半日搞過, 將全部襟花d ribbon再整過, 打番哂蝴蝶! 自己出去買襟花扣針整番哂係d襟花度. 又買了手花用的毛毛鐵線整番上手花! 真係自己做番好過..仲唔洗比錢

註冊處 - 紅棉路註冊處 90分 優: 3個字! 平, 靚, 正! 講真唔係話賣花讚花香, 見我上面都唔少bad comment都知我唔係咁既人! 不過我覺得紅棉真係幾靚! d職員都好有禮貌, 個註冊官都有笑容! 又有得出hk park影相. 以前覺得伊甸園幾好但去過一次觀禮就覺得完全唔惦. 安排好亂, 好迫好熱好多人等lift. 缺: 細! 要搶籌! 心理壓力好大!

佈置 - E&M 80分 優: E&M係海景嘉福contractor, 搵番佢因為佢對酒店夠熟悉. 而且comment都ok! Emily好nice同比到好多有用既意見我地. 雖然我地無upgrade任何野, 佢都無變臉而且好好禮貌, 同埋佢從來都無sell過我地去upgrade, 所以同佢傾得好舒服. 佢地當日佈置同拆野都好快手. 而我地出圖比佢界既logo都唔錯. 出來既效果亦同我地揀既一模一樣. 缺: 如果一定要講缺點既話我覺得佢既價錢係比較貴左少少的.

長身男禮(晚) - E-rave @ CWB 90分 優: 型, 用料好靚(好滑感覺好high)! cutting一流, 成個slim哂! 高大威猛! fit一次就搞惦唔洗點改! 師父好in識玩款玩cutting! 可免費改回做西裝! 快! 2-3個week搞惦! 缺: 貴! 扣10分

酒席 - 尖沙咀海景嘉福酒店一樓翰林廳 (22圍) 100分 優: 今次最滿意可以話係酒店一環, 由睇場落訂到開會, 擺酒, 比錢都非常smooth! 有求必應! 服務一流, 非常有禮貌! 食物朋友話好食! 夠熱! 果盤靚! 送既小食都好食! 無呃錢(雖然唔洗錢) 另外由開始到散席一路都有一個女的跟住我問我要唔要飲野, 暖水定橙汁? 凍唔凍? 洗唔洗刪細d冷氣? 新郎果邊都有個男的跟住. 因為麻雀房要5點半先ready, 所以佢地應我奶奶要求係主廳放左6張台比人打住先(麻雀房ready後亦應我要求搬離現埸) 進場前會教我點切cake, 點交杯, 點行, 點拎住條裙, 洗唔洗開少少門比我地睇下d guest睇片時既情況等. 席間d燈光亦應我地要求tune暗左同不停變色. 好靚 到左散席我地同某幾個朋友/兄弟係度賴死仲要飲埋d紅酒, 佢地仲留人係度serve我地開紅酒, 終於坐到成點幾先走. 上到房已經見到先前pack比我既食物已經放左係度...隻雞仲係雞比tim! 入左去5分鐘到就有人打入房問我聽日早餐點d乜 當然我係老細對我服務梗係好啦, 所以我都有問其他guest, 佢地都覺得酒店服務very good....Mr.Vx話好過龍tim wor 缺: 唯一無咁smooth既地方係將花車改為送8打小食果度, 初初cindy講過係送8打(因為佢話可以confirm menu時先決定係咪轉, 所以果時我地未決定), 但後來cindy無做改為liz跟, 而我決定真係改小食時佢竟然話只係得5打! 唔知係咪因為cindy知我係行家介紹搵佢所以對我手鬆, 但果下真係幾唔順超. 不過最後梗係比我lur番8打番來啦.另外一個缺點就係新娘房幾細(但都有衣櫃夾萬, 自家toilet *

Website, Invitation & 片頭 Design - Mr. A 一兆分爆燈 比得Mr.A就梗係要爆燈啦. 一兆呢個分數都係佢自己同AG做訪問時講! 呢件事之後我先發覺阿A生係一個細路仔! 要人開口讚! 唔讚會嬲! 所以一定要讚一讚! Mr.A好多時都好矛盾, 為左個Website同Invitation design同佢鬧過超多次交! 問我覺得點, 我話ok時, 又話我無input! 我有意見時, 又話我好band佢! 大佬玩我咩?! 又成日因為design極都唔滿意而發爛渣! 結婚係一件開心既事, 唔係番工! 唔靚唔會無糧出! 我知你想追求完美, 但點解要搞到自己咁辛苦呢? 咁唔開心呢? Mr.A整出黎既website同invitation我真係好鐘意! 但我唔係果d見到就大叫"哇! 超爆靚!勁鐘意呀!"咁果d人黎嘛! 大家收到invitation時都話好靚一定會keep, 呢樣已經證明到一切啦! 仲有Mr.A花左無限個通頂整出黎既片, 第一次睇到真係好感動! 好鐘意! 可能唔係太多人知道我地既故事, 所以無乜感覺! 但某d知道既朋友睇完反應真係好大! 仲話差D喊! 其實老公! 好多野! 在心中啦!!

Pre Wedding Photo & Snap Shot - Irene Chui Photography 100分 唔洗多講! Irene影既相大家都有目共睹! 好多人睇完Macau本相薄都大讚十個惦! 唔止幫我影左靚靚既pre-wedding相, 1212當日再次拔刀相助幫我影埋Snap Shot! 好在有Irene, 睇番AG影既snap...真係唔知影乜! 好在對佢無期望! 哈哈!

裙褂 - 上海街錦發 90分 係錦發租左小五福(頭褂), 送上頭睡衣! $550, 其實幾平, 但我發覺有人係錦發租同樣既野仲平過我. 另外我真係有少少懷疑件褂係咪真係頭褂! 雖然係好鬼新, 但d soso唔係我去拎果時先車上去架咩? 我去拎褂時佢話時間關係佢已經車好d soso係條裙wor! 另外我睇相發現一個早我2個月結婚既朋友係錦發租左件小五福頭褂, 係同我件100%一樣. 而佢話d soso係佢拎褂時先即刻係佢面前車上去架wor! Anyway啦, 係唔係頭褂都無所謂喇(不過如果唔係頭褂$550就貴左d囉)! 錦發老細好nice, 唔洗按金! 任試任影! 值得推薦既!

簽名布/細相薄 - Amazing Grace 90分 因費事搵所以搵AG同我地做埋簽名布, 我地的簽名布唔係用相, 係用graphic! 20X44' $280, 出黎效果比我想像中靚 另外join佢地影相有水晶相薄送(自己提供相), 所以哂左22張6R Macau影的pre-wedding相比AG做相薄, 出黎效果都ok, 唔會好cheap feel.

結婚對戒 - Shoebridge蘇比治 90分 我地想要d raw d, 粗/厚d, 不要太斯文既款! 呢種款既對戒真係幾難搵. 係婚紗展見到shoebridge, 當時其實我係認錯左shoebridge係shelli, 早前係shelli睇中一對戒指好靚亦合我地要求. 但太貴無買. 係shoebridge想睇番上次果對(其實果對係shelli的), 好似無左喎, 但見到一款同上次果隻差唔多既. 不過係拋光面的, 只需$5000一對(18K白金). 上次問要萬幾蚊一對(18k白金 - 因為係Shelli的). Shoebridge算係幾平! 款都唔會太斯文.

婚紗/晚裝 - Spring Wedding 75分 在無乜點睇過其他店既情況下就join左春天! join完先覺得d衫好難揀! 唔係唔靚, 係著得唔好睇! 可能係隔離飯香! 成日覺得人地果d靚d! 特別係婚紗, 本想我係想揀A Line款既婚紗, 但唔知做乜會揀左Princess Line, 仲係加錢upgrade! 講真咁多件我最唔鍾意係件婚紗, 唔係唔靚, 係我明明鐘意A Line架嘛. 都唔知點解會咁....另外3件EG都揀得好辛苦, 唔係著得唔好睇就係d色唔岩我(皮膚太黑), 後尾揀左呢3件! 好在都有唔少人讚靚, 我發覺我試咁多都覺得唔好睇係因為我試衫時d頭髮散哂落黎又無乜化妝! 如果各位朋友有機會去揀衫, 最好化恆個妝同札起個頭去試! 咁樣會揀衫揀得容易d! 3件EG最鐘意係敬酒件紅色祺PO領拖尾. 勁鐘意! 本身覺得自己揀左來送客的淺粉紅衫唔多靚, 但影相出來襯埋個妝同頭又覺得幾靚咁. 有朋友仲話呢件最靚! 優: A Line款EG勁多! D衫真係靚! 有款得來又唔會似Noel chu咁誇! 平過Noel chu少少! 頭紗都幾靚. Join前可以為伴娘著想, 同佢bargin伴娘衫可以係for新娘揀的EG度揀件平實d款做伴娘衫先join!(我成功bargin仲confirm左款, 但發現揀錯左件唔平實款既, 搞到個個話太搶而被迫揀番唔靚的伴娘衫比伴娘) 缺: 貴! 8千幾蚊(1WG, 3EG + 伴娘)! 婚紗唔包手套要自己買! d頭飾勁舊又唔襯D衫(佢話我個月旺比人揀哂d靚既去wor!!) 我借左佢5個頭飾只係用左1個! 其他都係用化妝師的! d 頸鏈果d又係麻麻! 又係比人揀左先! 頂! 伴娘衫一D都唔靚!! 金都D仲好過佢! 好唔惦, 我伴娘最後著自己買的衫都靚過佢!

大相薄/油畫 - Starphoto 100分 Macau影d結婚相搵Starphoto出相薄同油畫! 好靚! 價錢合理! 仲好快(因我地話urgent 10日左右搞惦) 比我想像中好好多, 做了水晶面! 因為design埋個cover同底比佢. 所以個感覺幾high. 同埋佢d頁都幾厚下! 好硬淨(勁重)! 靚過basaa果本! 好滿意

website