11.04.2007 星期三 天陰、 睛

今日係陪伴o左我地十幾年o既Bingo壽終正寢o既日子，Bingo係因為貧血內出血而逝世，其實佢係3月尾已經有問題，斷斷續續咁頂到今日......其間我地重去o左旅行，其實唔係玩得咁開心....因為驚我地玩玩o下收到電話話Bingo唔得....不過佢都係捱到我地返來，不過見佢好辛苦...係診所諗過幫佢打支針，但係又見佢好似好努力咁，所以最終都係同佢返屋企，希望會有奇蹟出現....不過夜晚佢o既情況都開始唔係咁好...餵o左Ｄ野俾佢食，夜晚唔知幾點佢又嘔血，情況唔係咁樂觀 ! 到o左今朝佢已經好虛弱，我都感覺到佢就快要走...所以我地連工都無返.....終於Bingo係上午9:10離開我地，去o左另外一個世界了.......眼淚不其然自己湧出來......不竟都陪伴o左我地十幾年...希望Bingo係另外一個世界開心快活咁生活啦........

Bingo既離開，我好傷心。係佢有事到離開都唔夠兩個星期，件事來得太突然，我一d心理準備都無，本來健健康康突然就走左，實在接受唔到。雖然佢都已經十二歲幾，係早幾年已經同自己講佢可能隨時會走，但係到佢真係走，真係接受唔到。

佢走左之後我有好多無奈同後悔，或者每個主人都會有既無奈。早幾年我已經慢慢將對佢既關心投放係其他既猫猫到，就係驚自己越鍚佢越接受唔到佢既離開，但係就好後悔依幾年少陪佢少抱佢。之後又後悔因為去旅行唔能夠多陪佢幾日，好驚佢會自己一個孤伶伶甘走，如果唔係唔想屋企人失望 [因為係第一次同佢地去旅行]，我真係好想留低唔去，唯一安慰既係佢可以等到我地番來先走，等我地能夠親手好好甘安置佢。

本來諗住幫佢打針，但係心存一絲希望會有奇蹟，同埋因為之前佢係診所住左5日，亦希望佢能夠番到自己既屋企可以安心d，好後悔因為自己既決定，而令佢再痛苦多一日。係佢就快要走既時候，我無勇氣睇住佢走，好驚以後都忘記唔到依一幕，但係又好後悔唔能夠陪到佢最後一刻，內心有好多矛盾同無奈，個心好痛，真係好痛。 

依家先發覺原來平時同佢影既相唔多，好後悔好後悔…….。我唔知我要用幾多時間先可以放得低，因為我從來都無當過佢一隻狗或一隻寵物，我真係當佢係我既屋企人。希望佢去到另一世界會開開心心，下一世我地能夠有機會再照顧佢。

我地永遠都唔會忘記你，再見啦…………Bingo