經過大半年來的籌備,多過月來的資料搜集,上Yahoo搵地圖,睇天氣,每日留連於各大小日遊新聞組.我的京板神六日之旅終於完滿結束,首先要多謝曾經幫過我的網友,三衫淳的行程表,安那貓,還有Darkside的行程分享……等等

       自上次去日本東京已是7年前的事,當時仲係跟東X遊去.雖然很喜歡日本,但因時間唔夾,加上我又怕坐共耐飛機,當然仲有緊係錢嘅問題,7年後嘅今日,我先有機會再去日本.因上次已去過東京,加上熱愛電影的我又想去USJ,所以今次決定自遊行去京板神.

  雖然定了1月8日出發,但我早於11月頭就用電話經X晨旅行社買了Package,坐CX機,早去晚返,包五晚梅田Daiichi酒店連稅每人$57xx.另外本篇旅遊分享之資料只供參考,不能盡信,如有錯漏請大家代為指正,謝謝!!!

 DAY 1  08/01/2006 原定行程 機場>酒店>HEP FIVE商場>阪急三番街>梅田晚飯>酒店

  出發前一晚訓得相當唔錯,朝早準時07:00點起床,大約08:50到達機場,由於前一晚已經上CX網劃埋位check-in ,雖然CX網頁話online check in左嘅乘客可以於飛機起飛前45分鐘到達機場,但去到機場CX counter地勤小姐話最好都係1個鐘前到達,我地班機10:20起飛,點知我有個朋友9:25先到,好彩趕到,Check in後一行三人飛快過關出境,再衝去食Burger King ,用破世界紀錄時間9分30秒40蒸發左成個餐之後,再衝去搭無人駕駛列車去登機閘.

 機程約3小時,上到機發覺機上開行暖氣,我已心知不秒(因為我唔信邪著左件Superwarm打底仲係長袖果隻),飛機餐有唔知乜魚或牛肉,唔食魚的我當然揀牛肉啦,味道一般鹹左D,個餐另外有冷麺同埋蛋糕,我每樣都食左無一半就放棄咗,食完飯睇埋成龍套神話,填埋份入境表,約14:20飛機就降落於關西空港,順帶一提CX服務算唔錯,係個飛機餐麻麻地姐.一落機就跟大隊搭無人駕駛列車去過關,等左約15 mins 到我時發覺份入境表原來仲有背面未填,即刻企埋一邊填埋佢,過另一Counter時職員無搜我行李,剩係用英文問我留幾多日,反而我另一個朋友就有搜行李.

  拿埋行李一出閘即刻去大堂旅遊中心取地圖,最後決定坐Limousine Bus(機場巴士)去酒店,響旅遊中心買埋巴士飛1300Yen(出面巴士站旁亦有自動售票機),順便問埋個服務員Daiichi hotel響邊個站落車,一出機場有D凍,去到巴士5號站(好似送車尾),等左約15-20mins後有巴士到,上到車又係開行暖氣,坐左大約一個鐘頭多D車程,終於到達大板站,離遠已望到Daiichi 酒店,但我地應該再下一個站先落車,落車後發覺室外都幾凍,只有約6-7度.咦!!!發現唔見左間酒店,搵左一陣,原來俾Hilton Hotel遮住左.大約差唔多17:00到酒店,入到去,酒店個大堂唔算大,Check In後我地住27樓,入到房,算幾乾淨整齊,但又係唔算太大,有3張單人床,第一時間除左件Superwarm,然後走去開冷氣(因當時房內都幾焗,起碼26- 27度),點知一開冷氣,我當堂嚇一跳,然後得啖笑,發現出風口果D係暖氣,而又冇制揀轉冷氣??立刻打去Front Desk 問佢,佢只係答” Is Normal , Is Normal “ ,我只好說Thank you !!!然後收線,之前搵資料時已經知日本冬天室內一定開暖氣,只係冇諗到D暖氣會焗到我地三個人面都紅埋.之後唔理咁多跟住攞部Notebook出黎經電話線上網(酒店免費提供33.6K上網),用MSN同屋企人報平安後,就出發落街食飯同視察下環境.

 一出到街就見到JR大板站,板急,板神電鐵都響隔離,交通非常方便,大丸,板急百貨亦係附近.當時大約7點幾,大家見有D肚餓,就走去新梅田食道揾野食,但見到間間舖都幾多人,又有D驚唔知點叫野食,最後決定去埋阪急三番地下街搵野食,發覺果度真係N咁大,D路睇唔到盡頭,又四通八達,都幾恐佈.行左一陣見到間食架厘飯嘅舖頭(唔記得叫乜名)冇咁多人,就入去坐底,用英文問待應有冇MENU,佢好友善咁話NO,然後我地示意叫佢一齊出門口,手指指咁指向果D Sample食品,我叫左個晚餐(750Yen),有架喱雞肉飯,有杯飲品,什菜沙律.架喱汁幾濃,好味,小小辣,又帶D甜,但D餸就小左D,飯就好味過香港果D,唔知點形容,杯飲品係一杯茶咁嘅野,飲落鹹鹹地又有D茶香味算OK,個什菜沙律都好味.而朋友就叫左架喱炸朱扒飯約(700Yen),大家都幾滿意.埋單後仲有D現金Coupon送俾你下次再食.

    食飯後就繼續行阪急三番街,沿途都有好多食店,好多人,之後就沿路牌去Hep five商場,樓下有間波子機舖,入到商場感覺比想像中細,例牌見到條大鯨魚,而D舖頭主要賣D年青人衫,見無乜野啱睇,就上頂樓行行,頂樓有個摩天輪(500Yen)不過我地冇坐到,因諗住坐天保山嗰個,之後去左隔離SEGA JOYPOLIS 夾公仔,每人玩左大約千幾Yen,我2個Friend都有收獲,我就乜都無.玩到大約9點幾我地就離開Hep Five ,出番去條大街行行,街上亦有不小食店,之後去左便利店買左D杯麵, 2L裝嘅保曠力咁上下嘅飲品諗住呢幾日檔水飲,仲有抹茶雪糕,之後就返酒店,返到酒店都係睇下電視(但好似冇乜野睇),又冇日劇,可能星期日啦,房內仍然幾焗下,之後都係上下網,沖涼,食埋個架喱杯麵(好味),1點幾鐘就上床訓覺.(好彩夜左間房又冇咁焗,我地已經關左個暖氣.

  DAY 2  09/01/2006 原定行程 酒店>電器屋街>午飯>心齌橋>美國村>道頓堀晚飯>酒店

 朝早七點幾起身,因有D特別原因訓得唔太好(同間酒店無關),等埋2個Friend,8點幾落樓下食酒店的自助早餐(房租已包早餐),個早餐算多野食,除左例牌嘅腸仔,烚蛋,炒蛋,多士,火腿之外,仲有架喱飯同麵鼓湯,味道亦唔錯,眼見其他枱原來亦有不小香港人和日本人.

   一行三人大約十點幾出發,今日會先到DenDenTown,因為我2個朋友都想買D動漫,TVGame,產品我原本就無咩特別野想買,不過見之前有網友提過有D 200-300Yen 既高達模型幾底買,我會買D做手信.出到酒店外,又係幾凍下(約7-8度),先行去地下鐵梅田站(即JR大板站隔離)約5-10分鐘,乘(御堂筋線)至難波站再轉乘粉紅色(千日前線)到日本橋站下車(全程230Yen,約20-25分鐘就到),一落車,就見到有2個打扮得像電車男一樣的日本人,就知道自已冇落錯站.

     跟住響(日本橋2出口)出,一出地面即刻睇睇係Yahoo download既地圖,行左約5分鐘就見到黑門市場,見經開就入去睇下啦,裏面真係又大又靚又干淨,心想香港D街市真係………,入面好多檔口,見有D魚檔有雞泡魚賣(好醜樣),仲幾貴下,千幾至幾千Yen都有,又有D長腳蟿賣(好大隻),呢D響香港都未見過,幾得意.而另外又有D舖頭都係賣下日用品,手信,連和服都有,我地行左一陣,影左D相就行番出大街.

    之後一直行左約十分鐘就到左DenDenTown(約11點幾),呢度同秋葉源比規模相信細好多,D樓亦冇咁靚,但勝在也有不小舖頭賣各種AV,玩具,動漫,TV Game產品,好此道者相信可行上一整日.條街共長共多舖頭點行好呢??好彩作為領隊既我之前已經係Toydaily網Download左地圖,地圖仲重點推介行邊D舖,真係要多謝Post張地圖個位網友.第一站我地去左行Softmap(賣AV,電腦個間,因為有二間),入到去又係例牌N咁大,地下賣相機,AV產品,而樓上就賣下電腦呀咁,行左一陣買左條相機頸譝7xx Yen,同KOSS既耳筒1980Yen,(香港賣成二百蚊),幾抵買,跟住就再向前行,行到大約12點幾,見前面條街好熱鬧下喎,又好多人,就到左我地今日第一個Bonus景點,呢條唔知有冇網友知叫做咩街(即刻Namba City Shopping City)旁邊果條街,又係N咁長,見唔盡頭咁,兩旁都係一D各式各樣嘅小食檔(有章魚燒,大板燒餅,關東煮,串燒,卡通人形燒餅……好多好多),攤位遊戲檔(撈金魚,射氣球,抽奘)感覺有D似我地既年宵市場,大家知唔知呢D檔口平日有無呢????因為好似唔見有人或有書介紹過!!!!唔知係唔係成人節定十日戒既關係,見到有不小既日本人拿住一片幾大塊既樹葉響條街行.途中我因未太肚餓無買野食,反而D朋友就買左D小食.行行下見有個人響塊大鐵板上炒D一粒粒白色既野,個牌寫住叫咩北海道名產,我朋友起初以為可能係年糕之類,買左一大杯,一試之下原來係薯仔粒,味道就麻麻地!!!!

    睇睇表已2點幾,我地決定行番出DenDenTown,再去行埋其他舖,Yellow Submarine,海洋堂,Softmap SAURUS,當然仲有MANDRAKE 同埋GUNDAM 館,大家都收獲豐富,我就響MANDRAKE買左好多盒高達每盒約2xx Yen至3xx Yen,又買左D 100 Yen既Q版卡通少女公仔, D Friend 就買左D中古既N64,Gameboy帶(100Yen-數百Yen),動漫Figure,PC Game 呀咁,一行就行到6點幾,原定行程去心齌橋,美國村, 道頓堀( 因好以有十日戒巡遊 ),唯有放棄改第二日去.大家都行到腳跛,之後就求其去左吉野家食飯,叫左個燒牛肉定食650 Yen,幾好味,起碼好食過香港果D,尤其係個麵豉湯夠濃,D白飯又係好味.

   食飽飯就繼續週圍行,響吉野家隔離又見到有條街好熱鬧,兩旁D檔口同今朝行個條差唔多,但就多左D檔口賣一D過年既小罷設,公仔,好有特色,價錢都幾貴.之後見到前面有檔野有好多人圍住,原來係賣龍鬆糖,好似成1000 Yen盒有十粒,仲幾好生意咁,諗落好似有得做喎!!!!再行左一陣見到前面掛滿燈竉,就到左我地今日第二個Bonus景點 ……今宮戒神社,裏面又係好熱鬧,好多人,D人揸住今朝早我見到果D一大塊樹葉,但就掛滿名各種掛飾,現場仲播住一首神社既音樂,雖然首歌唔知Loop住唱咩,但就幾好聽,唔知各網友有無呢首歌可以分享呢????再行入D,見到兩旁檔口都有D著住D好靚既神社衫,化曬桩既日本女仔係度賣果D掛飾,而且數埋去二排幾十人,個個都幾靚架!!!!(之後我個朋友上網搵資料,原來果D女仔係由幾千人選四十人出來做神社代表賣野),唔怪得啦,我地當然不甘示弱,立即取出全副裝備………相機,DV週圍拍攝一番(起初唔知俾唔俾拍,但眼見其他日本人都有拍,所以我地都放心四圍影相).講番果D神社女仔賣果D掛飾都幾貴約1500-2500Yen一件,D人一買就四五件咁掛係果塊大樹葉度(好似係祈求生意興隆既意思),真係厲害!!!!!而我地影相時,果D神社既女仔亦會好合作咁擺甫士俾人影相.響神社大約逗留左半個鐘,我地就懷着依依不捨既心情離開,之後就原路搭返地下鐵回酒店,之前仲去便利店買宵夜,返到酒店已11點幾,大家都累到成身散曬!!

DAY 3  10/01/2006 原定行程 大板>京都>清水寺>地主神社>二年阪>圓山公園>八板神社>祗園>梅田晚飯>酒店

 今日晨早8點起身,之後又去左食Dai-ichi 早餐(好味),9點幾出門口行去JR大板站搭JR京都線去京都(540Yen),最初以為車程要成個鐘,點知好似大約30-40分鐘就到左JR京都站.一出大堂,又係當堂嚇一跳,呢度好大!!好有Cyber Feel ,我緊係即刻週圍影相啦!!,然後一出車站就見到一排巴士站,雖然我地今日只會去清水寺一帶玩,但聽D網友講買巴士一日券抵D,所以就去左巴士站旁既服務中心買全日任搭既巴士One Day Pass (500Yen),如果唔買一日券,巴士一程要(220yen),但最終我地都只係用左一次,蝕左!!!!!買完飛,我地就去排隊等100号巴士去清水寺,今日雖然係平日,但都幾多人排隊,等左約10-15分鐘,見前面有架206巴士埋站,即刻上車啦,不過冇位坐,要企,巴士迫人到咩咁,我仲跌左部新買既數碼相機落地!!!心痛X100.搭左大約15-20分鐘左右,就到左清水道站,不過好似剩係得我地落車,仲以為會好多人落車添,究竟係D人唔係去清水寺,定我地落錯站呢???至今仍係一個謎. (順帶一提,落車時,”隊”張One Day Pass入司機旁部機,然後取回張飛,便可落車,張One Day Pass就會印上當日日子,同一日再搭巴士就Show張證俾司機睇就OK,唔洗再”隊”張One Day Pass入機.) 

   落左巴士見前面有京都限定扭蛋匙扣(200Yen),我地即刻扭番幾隻做手信啦!!!(都幾靚架),之後過對面馬路就見到好大個牌寫住清水寺往上行20分鐘,就沿住條斜路行上去,條斜路沿途兩旁D小屋都好靚,好有特色,週圍亦好有清幽,古僕既感覺,我本人就非常喜歡呢度,京都不愧為古都.我地當然邊行邊影相啦!!!!行行下見到前面有好多手信舖,好多京都限定野賣,不過我地一陣會沿路走所以就冇買野住.再行左一陣仲見到前面有人力車,D車伕仲好後生添!!!再行冇耐就見到有一大個停車場,雖然只是11點左右,但就已經泊左唔小旅遊巴響度,有D仲係香港旅行團.而週圍開始熱鬧起來,轉眼就到左清水寺既大門口,我地響呢度影左一輪相就入去,沿途入去都見到好多光禿禿既樹枝,冇左D紅葉,令清水寺失色不小,相信如果我地早個零月來,風景會靚好多. 

    行行下,見前面有個售票處,票價(300Yen),入場前工作人員見我地拿住D相機腳架,就示意裏面不准用,大家要注意啦!!!!買完飛入場,行冇耐就到左好出名既清水舞台,之前睇相片就見得多,第一次來到呢度感覺比相像中細,但見佢建於峭壁之上,都幾宏偉,我地影完一輪相,仲買左D幸福符,健康符,學業符,比屋企人做手信.都幾靚(每個500Yen)但唔知離開左日本國境D符仲有冇效呢??,離開左清水舞台再向前行好快又到左另一景點”地主神社”,呢度係出名求姻緣之類既神社,我地入到去,裏面唔太大,但亦有不小日本年青人響度,又見到傳說中既兩舊 ”恋之占石 ”,兩舊石相距約十零米,相傳善信只要能夠合上雙眼,由一舊石行去另一舊石,就會有愛情運行,不過人太多,我就唔敢試啦,費事一係撞親人,一係自己輪盡碌左落樓梯就唔好啦!!!另外地主神社內亦可以自助形式抽果D姻緣簽,每次(100Yen)自己投幣入箱,但眼見D人抽親好似張張都係吉簽,冇D凶呀,大凶之類嘅簽,我心想(唔!!!有D古怪),而神社內又有D舖頭賣愛情符呀咁,又係幾靚架!!!,大家又可以幫襯下. 

    離開左地主神社後,已經成1點幾,我地慢慢行番出去,沿途見有間麵舖,門口有個阿嬸同我地講野,我地見有D餓,所以唔知佢同我地講咩就跟左佢入舖頭,舖頭內D MENU有相片,我地又手指指叫左兩碗麵同烏冬,(600Yen碗),D麵灰灰地色幾好味,湯底有D似麵鼓湯,不過D配料就小左D,得一塊腐皮之類既野,但甜甜地幾好味,大家食飽後,臨走個阿嬸仲用英文定普通話咁問我地來自邊度,神奇!!!!之後我地都係一直行番去頭先果D手信舖買手信,一眼望埋去,D手信盒盒包裝都好靚,有好多仲係京都限定,我用左6000-7000Yen買左D鐵罐Hello Kitty餅(約500Yen),有D抹茶味牛奶朱古力(約800Yen),幾盒大既和果子同埋抹茶味嘅餅(每盒約1050Yen),仲有D京都限定Hello Kitty電話匙扣,好靚架!!!!大家都收獲豐富,我地就繼續行,本來諗住去圓山公園,但行極都搵唔到,所以放棄左,然後行左去二年板,三年板,沿途都好多舖頭,我亦都又買左D手巾仔,同埋人手造既動物陶瓷公仔做手信.順帶一提,呢二條街一定要行,因為兩旁D舖頭都好靚,好有特色.之後望望手表原來已經3:30我地行行下見到前面有兩個藝妓迎面而來,見咁難得見到,本來想請佢停底俾我地影張相,但最終都因為有D驚,眼白白咁見佢地走左.之後我地就到左八板神社,見經開我地又入去行下啦,點知隨即又聽到昨晚響今宮戒神社果首歌(幾好聽),而神社內亦有好多穿着著神社衫既女仔係度賣野,但規模明顯比今宮戒神社細好多,裏面亦唔係有太多人,所以我地好快就離開左.穿過八板神社一出,就見到一條大馬路,而對面就係好出名既祗園喇!!!

  祗園呢度係一條好長既街,馬路兩旁都係舖頭,雖然比較城鎮Feel D,冇頭先清水寺附近果D舖頭咁有古僕既感覺,但就勝在有好多各式各樣既舖頭,有手信舖,有食店,而好出名既”壹錢洋食”,同埋有個女人頭做商標個間化粧品店(舖頭名係日文唔知叫咩)都係響呢處.另外我本來想去個間”一澤帆布”睇下D袋,不過就搵唔到,可能我記錯唔響呢頭啦.我地行左約半個鐘左右,就到左京板電鐵既”四条站”,之後我就諗住塔車返梅田啦,點知好似係去淀屋橋站(唔記得),唔知點轉車,好彩響出閘時問到個貎似竹野內豐既職員,佢教我地行去地下鐵再轉乘御堂筋線返梅田. 

   返到酒店都成5點幾,我地放底D手信後就爭取時間去左JR大板站旁既Yodobashi行,呢間電器舖又係大都無倫,樓高七層,入到去每一層又係好似見唔到盡頭,而呢度1- 4樓就賣電器,電腦,而5樓有半層就賣玩具,剩底既就係其他賣衫既商店同食店.行呢D電器舖最大既好處就係佢地會擺曬D最新既產品響度俾顧客試玩,又冇售貨員會望住你,另外印像最深刻就係有成幾十款手提電話,D款靚到Y,好多香港都未見過,雖然買唔到返香港,拎上手玩下都好,我地行左成2個幾鐘到人地收舖先走,每人都收獲豐富,D朋友就買左D相機配件,都好抵同埋好多香港冇得賣,我就用左萬幾Yen買左D DV配件,好開心!!! 買完野就去左阪急三番地下街食晚飲,我地就搵左間有得食蛋包飯既餐廳(因之前有網友推介去到日本一定要試下蛋包飯),由於見到餐廳入面好似冇中文MENU,所以我地今次就響門口用DC影底D Sample 野食,入到去就Show個待應睇,個待應初時仲唔知我地想做乜,之後明白仲笑笑口咁(唔知係唔係笑我地呢??),我就叫左碟普通既蛋包飯(700Yen),跟有杯乳酪咁既甜品,個飯都幾好味,外面層蛋半生熟咁好滑,裏面D飯用茄汁炒過,又係好味,連跟飯個杯乳酪都唔錯,(但整體就唔係話超好味個隻),可能之前期望太高啦,而我D朋友就叫左個焗蛋包飯,都係覺得唔錯.食完野行左一陣返到酒店都成10點幾,行左成日,成身又係好似散左咁,之後都係沖涼,睇電視,訓覺咁就又冇左一日.

   DAY 4   11/1/2006 原定行程大板>全日環球片場>YODOBASHI商場>梅田晚飯>酒店

  今日我地會去USJ,亦係我(電影男)今次來大板嘅主要目的之一,由於怕假期多人,所以我行程亦都特別選今日先去.我地晨早9點起身,之後又去食Dai-ichi早餐,10點幾出門口去JR大板站搭環狀線到西九條站,轉JR櫻島線,前往Universal City站(340Yen),一出站就見到Universal City Walk,不過週圍唔太特別,我地影完一輪相就繼續行去USJ,去到大門口大約11點幾,買完飛後(5500Yen),就係UNIVERSAL大標誌前影相,之後就以極度興奮心情飛奔入去USJ,順帶一提USJ係冇固定關門時間,好似今日(平日)就開10:00-17:00,假期就收夜D,大家去之前可以到USJ網頁睇睇.

    由於今日係平日,入到去發現人唔太多,每樣遊戲大約等10分鐘左右就有得玩,正呀!!!我地一入到去首先唔係去玩,而係去左小食亭買炸豬排飽食(380Yen),好好味,值得推介.跟住我地就去左玩未來戰士T2,呢個Game係集合左真人同4D立體電影既表演,並唔係機動遊戲,內容我唔講太多,等大家自己感受下,可能我第一次睇,雖然全程講日文(其實斷估都知講乜),但都覺得D效果好正,係USJ必玩Game之一.玩完T2一出門口就會見到售賣T2記念品的舖頭(其實幾乎玩完每個遊戲之後,一出門口都會有佢自己既專賣店),真係識做生意.玩完T2之後就去左玩Spiderman The Ride,呢個Game好似係近呢一兩年先有,係坐響一架類似過山車,再配合3D眼鏡玩,跟隨住Spideman在大厦之間左穿右插,全程約3-4分鐘,比T2刺激得多,玩完之後我仲有D暈(我本身係極容易頭暈既人),不過又係非常好玩.而身為Spiderman Fans既我當然係專賣店買左不小既精品.買完野行冇耐就順便玩埋Jurassic Park,由於呢個Game係會濕身的,所以入場前有幾部自動販賣機賣雨褸,盛惠400Yen,當然如果你自問唔怕係只得幾度既環境下濕曬身,我係絕對支持大家慳番400Yen,呢個Game類似海洋公園果個滑浪飛船咁,一隻船坐16人,我地就被安排坐最尾(我已心知不妙),所以上船前已收埋所有相機呀DV咁,沿途都係睇下D假恐龍,之後就慢慢上斜坡,最後衝落去果野都幾勁,成船人都E嘩鬼叫咁(包恬我),一輪嘈吵過後就係成身濕曬,好在有雨褸所以冇乜事,玩完Jurassic Park後回頭睇番原來頭先都有成10層樓高衝落泥,唔怪得我有個Friend 話驚到心都停埋啦,玩完當然又係響精品舖買野啦!!!今次我推介大家買一個發堀恐龍骨玩具,淺綠色盒,由最細果款420Yen至最大果款千幾二千Yen都有,拆開盒有一舊泥,有支小棍和小掃,玩法係自已用支小棍及掃掘開D泥,會掘到一條條恐龍骨,最後再用膠水”痴”番成副恐龍骨出泥,幾得意架.

 間緊迫,我地之後去左玩烈火雄心BACKDRAFT,個Game其實係成班人企響度,齋睇週圍着曬火,感受下片場真火既熱力同威力咁,天氣咁凍,入去暖下都好,不過其實都幾精彩,就略嫌短左D,得幾分鐘.玩完大火,之後就沿路行去湖邊,離遠已見到有條大鯊魚掛左係度比人影相,我當然又唔執輸影番張啦,影完相就走去玩JAWS,呢個Game係響湖上遊下船河咁,之後會有JAWS襲擊你,冇錯今次我地又係被安排坐船尾,如果大家仍然未掉果件雨褸既話,今次可以講係大派用場,個Game都幾好玩,但我覺得最正唔係果條人造JAWS,係揸船個工作人員,佢D戲可以提名角逐奧斯卡,俾個貼士大家,如果唔想濕身,只要唔好坐左邊船尾位置就冇事架啦.另外玩完之後係JAWS精品店入面有部機可以自己壓製JAWS記念章,每個100Yen,又可以做手信(其實其他景點也有自己的記念章機,大家到時可自己找找).望下隻表差唔多成2:30,我地立刻走去睇未來水世界(WaterWorld)Show,呢個Show一日大約做3場,係USJ必睇節目,好耐之前我睇TVB旅遊節目介紹過,當時已經好想睇,而呢套電影我亦頗喜歡,今次終於親身睇到,真係好開心,入到場揀番個靚位坐,個表演場地比想像中細,而當日坐位大約有7成坐滿,最近表演水池前排3行坐位標明係濕身位,大家夠勇既可以著定件雨褸坐響下面,表現開始之前有幾個日籍演員會同大家搞下氣氛,向觀眾潑下水,搞下笑(不過唔知佢講乜)但全場氣氛好好,D日本人會好投入去玩,全場一齊拍手,一齊去互”噓”,感覺唔錯.之後到正式開場,全場日文對白,唔知講乜,但大約都估到個故事都係講好人打壞人,英雄救美咁,而連場爆破動作場面,加上扣人心弦的配樂,我就覺得幾精彩,值回票價(好耐之前係泰國睇過同類型表演,好似係講007,但就差很遠),本來我想一住睇一住拍DV,最後都冇拍到,因為驚錯過左D精彩場面,而個Show唯一要彈既就係個洋人女主角應該要去修身堂減減佢先再出來表演,咁個效果會再好D.

 睇完Show,自知時日,”唔係”係時間無多,我地立刻去玩埋餘下既Game,首先去玩ET,呢個Game入場前會有職員問你叫乜名,我地最初唔知重以為佢要我地Show入場Passport俾佢睇,搞完一輪之後,佢先用標準既英語同我地講”Name”我地至明白,而我地每人串左個英文名俾佢聽,之後佢就輸入電腦(當時唔知做乜),之後我地就入場玩,而呢個GAME既刺激程度亦係零,主要係坐響架單車上面睇野,小朋友一定鐘意,週圍D佈景,視覺效果就好靚,值得一讚,臨玩完之前我地終於知道剛才佢問我地個名既原因!!!玩完之後我地去左Snoopy既主題館,我本身同Snoopy唔係太熟,興趣亦不大,只係整左幾個記念章,買左一樽Snoopy糖就走咗,時間已4:30,我開始後悔點解唔早D來到,我地作最後一擊去玩埋回到未來(Back to the future),最初入去真係驚驚地(其實我好怕玩D太激既機動遊戲),一上到架回到未來車,噴曬白煙,之後先知原來係睇動感影院,一住睇,架車一住搖得好勁,又睇好鬼耐,起碼成5分鐘,玩完成個人好似俾人打完一身咁,不過都幾好玩.一返出去,個天都黑曬,望一望表差唔多成5點鐘,我地就行番去出口方向諗住走人,點知出口附近原來有一間超大記念品舖,內裏集合左之前所有Game既記念品,勁呀!!臨走都要放多次血.買完野,真係要走,好唔捨得呀!!!!有D遺撼玩唔曬所有Game…

  一出USJ門口,大家都餓到咩咁,因為成日只係食左個炸豬排飽,於是我地是但去左Universal City Walk裏面有間拉麵舖食野,店名好似大約叫 ”風火雷X ”三個人都叫左碗叉燒拉麵(約650Yen),幾好味,湯夠濃,叉燒夠香,麵夠彈牙,食完之後就好滿足咁離開.落到樓下見到有間手信舖(有個固力果招牌),內有好多大板限定嘅手信賣,價錢都OK,一大盒好靚嘅和果子都係1050Yen,我又買左”小小”之後就搭JR返酒店,返到去都只係6點幾,之後我地又走去Yodobashi逐層行,行到成差唔多9點就去左買宵夜返酒店,咁又過左一日啦!!!!!

 DAY 5  12/1/2006 原定行程 大板>姬路城>午飯(神戶牛)>北野異人館>MOSAIC晚飯>酒店

 今日本來計劃好中午去食神戶牛,點知遲左起身,食完酒店早餐都成十點,咁唯有見步行步啦!!!我地今日會先去姬路城,所以一出酒店就立即去JR站綠色窗口買JR-WEST ONE DAY RAIL PASS (2000Yen)(須出示護照),跟住去左塔JR神戶線(新快速)去姬路市(約1小時車程),去到都差唔多成11:30,一出JR站,離遠已看到姬路城(不過真係幾遠下),之後我地沿大手前通一直行去姬路城,沿途感覺都幾寧靜,D行人路,馬路又闊又大,但人呀車呀又唔多,而且近姬路城附近有幾間舖頭外形仲幾有特色添.

    行左大約20分鐘就到左姬路城大門口啦,一入去有個好大既公園,兩旁都種滿好多樹,不過就剩番光禿禿既樹枝,如果春天再來,個景一定靚好多,穿過公園就去到售票處,買飛可以用自動售票機或同售票處人員買都得(成人600Yen),我地就兩邊都試過,因為個Friend係自動售票機噤錯制買左小童飛,最後要去售票處補錢買番成人飛.另外於售票處旁可以免費自己打印仔留念,大家去到記住印番幾張啊!!!一入到去大門口,離遠見到天守閣都幾宏偉,我地就沿指示行去天守閣(約15分鐘),可能係平日,沿途都比較靜,遊人唔多,後來到左天守閣門口,大家要換佢地提供既拖鞋才可內進,入到裏面都幾暗,D樓梯又高又直,好似有4-5層,我地就逐層行上去頂樓,沿途都有D日本古時既展品,但我就興趣不大,上到去頂樓,裏面原來有個小神社,大家亦可以從窗口飽覽下姬路市既風景咁!!.行完姬路城,我地就由原路走,途經見有間手信舖,就入去買左2個姬路城木牌仔,同埋電話匙扣,都幾靚架,臨走仲噤機買左個雪糕食,好正啊!!!之後望下隻表成兩點幾,好明顯已返唔切去神戶食牛柳(因為中午有特價套餐),失望!!!咁唯有行返出大手前通睇下有乜食,途經見有間舖頭賣便當,就買左個架喱炸豬扒飯,原來佢係即叫即整,我地等左約15分鐘,然後就係附近既公園開餐,個便當好正,炸豬扒夠脆,D架喱汁又濃,D飯又好味,香港真係食唔返.

 食飽後,就行返去JR姬路站搭車去神戶(約30分鐘),出站後沿指示牌行去MOSAIC(約15分鐘),行行下,離遠己見到個摩天輪,就知冇行錯啦.我地大約4:30去到MOSAIC MALL,而呢度係一個起係海邊既半開放式商場,而旁邊有個小型遊樂場,D舖頭都係賣下精品,女人衫咁,所以唔係好啱睇,於是我地就去左地下間夾公仔舖玩左一陣,同埋係海濱走廊影下神戶港既景色,本來諗住係度影埋夜景,再去Fishmen Market 食Buffet,但由於我地仲未去過心齋橋,道頓堀,而今晚亦係最後一晚,所以就決定返大板,去道頓堀晚飯,於我地唯有同神戶講拜拜(叫做到此一遊啦),然後又再塔返JR去心齋橋.

   去到心齋橋都差唔多成7:00,感覺呢度比梅田旺好多,又多各式各樣既舖頭,食店,心想下次再來大板一定要試下住係呢邊.我地行左大約一個鐘左右,見有D肚餓,於是就行去道頓堀揾野食,離遠就見到蟹道樂個大蟹招牌,即刻影番張相先,道頓堀呢邊睇書就介紹得多,第一次來到真係好興奮,我地首先到左食金龍拉麵,佢地獨沽一味賣叉燒拉麵,門口有自動售票機,因為要留肚食其他野,我只係買左碗細既拉麵食(約600Yen),味道唔錯,D麵幾彈牙,但如果湯底再濃D會仲正,食完麵我地就繼續行,沿途發覺呢度真係好多香港人呀!!(因為好易認得出),之後就去左買章魚燒,同埋燒餅食,都幾好味,行行下又見到有間手信鋪,有好多大板限定野賣,我就買左個Hello Kitty大板限定匙扣,同埋好搞笑既HG先生貼紙.後來行到大約9點半鐘,見到有座大電器舖想入去睇睇,但原來都已開始收舖,真係失望!!!,受到咁大既打擊之後我地就諗住不如搭地鐵返酒店算吧(加上當時其實都己幾累),但醒起我地有JR Pass ,冇理由嘥左佢架!!!就決定行番落地下街去搭JR,點知就咁中招,原來個JR站同我地一頭一尾,行左唔知幾耐先到,最後返到酒店已經成個人散灑!!!但我地仍有一樣重要事要做,就係幫我地D戰利品影番張全家幅(其實都幾無聊),影完仲要執行李準備聽日返香港,搞到成點幾兩點先訓.

 DAY 6  13/1/2006 原定行程 大板>海遊館>天保山摩天輪>午飯>Rinku Premium Outlet>機場

      由於今日係最後一日,大家心情都好DRY,我地今日會搭CX 6:40pm機,雖然今早已於網上Check in,但我地都預返4:30左右到機場.,原定既行程因為太趕,加上朋友興趣不大,酒店又要12:00前Check Out,所以我地決定全部取消,一早食完Daiichi最後的早餐,十點幾Check out,好在酒店非常好,可以俾我地D行李暫放於佢地處,咁我地可以好輕鬆咁四圍行,離去機場大約仲有3-4個鐘,話多唔多,所以我地都係去返酒店附近地方行下,首先又去行Yodobashi,中午再去食吉野家,再行埋三番地下街都成2點幾,跟住返酒店取回行李,再行返去第一日下車的巴士站搭返機場巴士去機場.

   係車上開始個頭好痛,訓左一覺,四點幾到左機場,Check in 後行左一陣果D手信舖,發覺冇乜特別,價錢亦較貴,所以我都冇乜買野,之後就入閘上機,上到機,個頭越來越痛,都唔記得食左乜野飛機餐,睇左乜戲,只記得臨降落前隻耳仔好痛,自已支水又飲囇,迫住拿左個Friend支橙汁飲,點解D味咁怪既??後尾個Friend笑住話果支野其實係橙汁+白酒+寶礦力…….而我呢個大板6日之旅亦係頭痛 + 平淡中完結…

  後記 :

 經過多個月的資料搜集,大板之旅總算順利成,當中有好有唔好,唔好既係酒店既暖氣啦!!!USJ冇玩曬D遊戲啦!!!!食唔到神戶牛柳啦!!!!!神戶太小時間玩啦!!!!最尾個日病左啦!!!!但係都唔緊要.而好既地方係自由行真係好正,雖然事前準備工夫較多,但當中得到既自由度,滿足感,同埋可以真正感受到當地既生活,我覺得係值得既,另外仲有大板好熱鬧十日戒,好好玩既USJ,亦好喜歡京都既古僕,寧靜,姬路城既宏偉,最後當然係好多既美食啦!!! OSAKA ”I will be Back !!!