Day 1 ~ 12 Mar 2004

之前驚o左成個月驚住冇得去o既沙巴之旅, 今日終於都可以如期出發喇。鬼咩, 出發前一日夜晚七點幾先拎到機票，不過都總算有驚無險~

我地報o左”安運旅遊”5日4夜o既package, 報o黎間agent係因為比d大旅行社平d, 而上網見其他人對佢o既評價都唔錯, 所以便膽粗粗報o左, 其實都幾驚佢臨時話要加錢, 不過加錢都唔係最大問題, 最驚係冇得去, 五日假唔通返大陸咩!! 個package$3159, 包早餐及機場接送, 另加$278機場銳/保安費, 再加$171買保險, total $3608一個人就可以出發。

由於我地搭港龍0815班機, 所以當日要晨早4:30起身, 大約5:15就要去新城市等最後一班o既N42, 上次去台灣都係搭o黎班車, 估唔到都幾多人搭, 去到機場大約6:15, 第一時間去o左check-in同寄行李, 當然request window seat啦, 跟住就去o左大家樂食早餐, o個間大家樂都幾好生意, 因為咁早好多食肆都未開, 大部分搭早機o既人都會去o個o度食早餐。食過早餐之後, o係機場逛o左一陣, 影o下相, 之後就入閘了, 去到登機閘口, 例牌要等…今次搭o個架係架細機, 好似得三十幾行, 又冇電視睇, 唯有睇o下報紙同雜誌啦, 可能早餐食得太飽, 所以覺得個飛機早餐唔多掂~~三小時之後, 終於到達目的地 --- Kota Kinabalu, 中文有d譯做” 哥打京那峇魯”, 航空公司就譯做” 亞庇”, 沙巴其實係馬來西亞其中一個洲, 而Kota Kinabalu<簡稱KK> 就係沙巴o既首府, 從飛機望落去, 全部都係矮屋, 唔覺有高樓大廈, 好有鄉村色彩。KK個機場都唔大, 仲有D簡陋添, 不過都有唔少賣手信o既商店…辦妥入境手續同認領行李之後, 就見到有當地o既導遊同旅遊巴迎接我o地, 上車前去o左機場門口一間對換店換o左d馬來西亞幣, 今次我地每人帶o左$4000HKD, 初時一人換o左$1500HKD, 匯率$1HKD對$0.475RM, 兩人合並換o左$1425RM。上車之後, 首先就係一個兩小時o既市內觀光送的>, 導遊叫Amy, 幾好人, 睇落似當地人, 但係原來佢鄉下係台山。

KK其實好細, 亦冇咩好行, 只有幾個大型商場, 食肆, 其餘都係D比較細o既商店。市內觀光o既第一站就係全市最高o既大廈 --- 基金局大樓, 佢係一橦數十層高o既新式大廈, 入面返工o既都係d政府人員, 之前見其他人去沙巴都必定會在此拍照, 當然我地都唔例外~~~逗留o左約十五分鐘之後, 就起程到達第二個景點 --- 清真寺, 沙巴有好多回教徒, 所以有好多大大小小o既清真寺, 我地去參觀o個間好靚, 好宏偉, 成間都係白色, 不過我地只可以從遠處觀望, 因為當時正值有好多回教徒o係入面參拜緊喎。又逗留o左十幾分鐘之後, 又再跳回旅遊巴, 前往海王城食lunch<因為時間尚早, 未有得check-in>。

海王城最出名食海鮮, 幾乎到過沙巴o既人都會去試, 我地兩個人叫o左三個食送, 分別係薯仔菜, 老虎蝦同炸軟殼蟹, 仲有杯桔仔冰, 杯桔仔只不過係d桔仔加水, 冇咩味, 個薯仔菜都冇咩特別, 佢係d薯仔o既葉/莖, 當地人好鍾意食, 不過好多油。最正係個老虎蝦同炸軟殼蟹, 老虎蝦係一種好大隻o既蝦, 有好多種煮法, 我地食o個種係用奶油煮的, 超好味, d汁送飯一流, 個炸軟殼蟹都好正, 好低<$6RM>好大隻。o黎餐食o左$47.25RM, 好飽。

食完lunch就去Resort check-in 喇, 沙巴得幾間Resort, 我地住o個間叫Sutera Harbour Resort & Spa, 係其中一間最靚o既, 而且好近市中心, 基本上行去都得。間Resort分開三parts, 分別係Pacific Wing, Magellan Wing 同 Magellan Club, 我地係住o係Magellan Wing, Magellan Wing個lobby超大, 好grand, 樓低又勁高, 好有渡假feel。Check-in之後就返房, 間房又係勁正, 好大, 有露台, 對住一望無際o既大海包sea-view房>, 個廁所都好正, 有浴缸同企缸, 總之非常滿意啦~~~

Resort入面基本上咩施都有, 有碼頭, 泳池, 沙灘, Golf Club, 保齡球場<夜光的>, 戲院, SPA, 各類球場……等等, 總之好多啦, 大得有d恐怖。

放低d行李之後, 就起程去玩喇。間Resort每小時都有免費shuttle bus出down town, 於是我地就搭3:05 o個班車去Centre Point, Centre Point係一個幾層高o既商場, 有foodcourt, bodyshop, pizza hut, mcdonalds, supermarket等等, 不過其實冇咩好行, 我地都係行o左一陣, o係supermarket買o左d野食, 水等等, 跟住就搭返shuttle bus返Resort。返Resort之後就去o左報local tour 第二日去d島玩<$160RM>, 之後就去泳池游水, 成間Resort共有三個泳池同一個標準池, 仲有兩個好細o既沙灘<唯一缺憾>, 我地去o左Magellan Wing o個個, 貪佢夠近嘛, 游水之餘仲試o下相機, o係香港買o左個放水相機袋, 於是就o係泳池試o下會唔會漏水, 此外又問人借o左個潛水傻瓜相機, 好在兩樣都work。本來諗住一邊游水一邊睇日落, 不過游o左一陣發覺越來越凍, 唯有返房啦!! 返房沖完涼, 已經6:00, 個露台對正西面, 所以可以坐o係露台睇日落, 今次都係第一次見到咁靚o既日落, 只見個天不斷變色, 由當初o既藍色慢慢變成橙紅色, d雲好似著火咁, 真係好靚, 當然影o左好多相啦!!!

之後就去食飯喇, 去Centre Point 之前book o左Pacific Wing 一間叫” Cafe Boleh” o既dinner buffet, $42RM per person, 另加10% service charge同5% o既tax, o係沙巴食o野好多都要俾5% tax, 兩個人$100RM有找, 都算幾低。間餐廳好靚, 好闊落, 餐buffet都有好多選擇, 有冷盤, 熱盤, 甜品等等, 我覺得最好食係佢d bbq牛扒~~~

食完buffet之後, o係Pacific Wing行o左一就, 就沿住Resort既私人碼頭散步, 佢個私人碼頭好大, 有好多遊艇泊o係o度, 朝早仲有shuttle boat去附近d島, 平過join local tour 好多。沿住碼頭可以去到Magellan Club 同Magellan Wing, Magellan Club d房係三parts之中最貴的, 好似都係最靚, 我地o係Club o個o度行o左一陣, 影o左好多相, 之後就再沿碼頭返Magellan Wing o既泳池, 夜晚o既泳池都好靚呢, 佢有好多沙灘椅, 日頭可以訓o係o度曬太陽, 夜晚又可以o係度睇星, 好正~逗留o左一陣就返房訓lu。