Day 2 ~ 13 Mar 2004

由於今日報o左local tour去島玩, 所以今日要八點鐘起身, 梳洗過後, 就出去Resort 一間叫”Five Sail” o既餐廳食早餐, 之後三日o既早餐都會o係o度享用。間餐廳o係正尋日游水個泳池隔離, 可以選擇坐室內(冷氣)定室外, 去得Resort渡假更係坐出面啦~~佢個景實在太正喇, 對住泳池已經唔錯, 再出d就係無盡o既大海, 藍天白雲, 坐o係o度食早餐真係完成感受到渡假o既感覺。 早餐都係buffet形式, 有好多選擇, 有麵包, 冷熱盤, 生果, 果汁, 仲有即製o既奄列, 質素亦相當唔錯, 食完一頓豐盛o既早餐之後, 9:30就到達lobby集合, 今日local tour個導遊又係琴日o既Amy, 都幾好, 因為佢識講廣東話。

乘旅遊巴約十五分鐘之後, 就到達碼頭, 我地o係碼頭買o左d麵包, 準備去d島餵魚(之前o係Resort都拎o左d), 又食o左傳說中好好味o既雪條, 又真係好正喎, 有七種味, 我覺得榴槤最正, 最香濃。買完麵包就上船喇, 個local tour 會去兩個島, 第一個叫MANUKAN, 第二個叫SAPI, 兩個島都係屬於一個叫《東姑鴨都拉曼》o既海岸公園, 個海岸公園由五個島組成, 其餘三個分別係GAYA, MAMUTIK同SULUG, 好似話MANUKAN最正喎, 不過我地冇去。搭o左一陣快艇就到達MANUKAN島, 上岸後我地o既主要活動係o係碼頭上餵魚, o個o度好多魚, d水都好清(不過冇之前去浮羅交怡咁清), 大部分都係一種有間條o既魚, d魚好狼, 一掟d麵包落去就衝過o黎掙食, 個導遊仲教我地夾d麵包o係d腳指o度餵佢地, 雖然有d核突, ,但係俾d魚啄o下啄o下又幾得意。我地o係島上逗留o左大約半個鐘就走lu, 順帶一提, 入島係要俾錢的, 固此我地只係o係碼頭影o左d相就走喇~~

再搭多一陣船, 就到達另一個島, SAPI, SAPI 唔係好大, 好多旅客都會去, 島上有好多水上活動, 有降落傘, 水上電單車, 海底漫步, 香蕉船, 浮潛凡等等…上到島, 首先玩o左個雙人降落傘($80RM/person), 即係用快艇拖住個降落傘飛上天o個隻, 兩個人可以玩十五分鐘, 初時仲以為會好驚添, 飛到上去原來冇乜o野, 最好玩係落水o個陣, 成身濕晒, 俾佢拖住係咁o係水入面行~~幾值得玩。

玩完降落傘就食lunch, 有魚蝦蟹, 不過普通啦, 唔係食o左好多。食完lunch就去玩浮潛, 用$10RM租o左個潛水鏡, 又拎埋d麵包去餵魚, 其實o個o度d珊瑚唔算多, 不過游出d就會見到好多, 仲有好多魚, 我地仲見到幾條Mo仔呀, 不過掂唔到佢地。玩o個幾個鐘, o係水底影o左好多相之後, 三點就走了, 行去沖身時見到有好多馬騮, 之前食飯時導遊仲話有條好大o既蜥蜴走o左出o黎, 不過冇去到睇, 佢話成日都有好多蜥蜴走o黎走去, 都幾驚。

搭船返番去碼頭, Amy仲帶o左我地去一間土產店買o野, 仲請我地食雪條添, 買o左d手信之後就返Resort喇, 返房前報o左第二日睇螢火蟲/長鼻猴($190RM一位)。

沖完涼之後, 就出o左去泳池睇日落, 日落日日都唔同, 不過都係好靚。之後就搭的士又去o左海王城($10RM)食飯, 去到大約七點鐘, 好彩有位。今餐叫o左五味菜, 分別係老虎蝦, 炸軟殼蟹, 一碟類似帶子o既o野, 一碟唔知咩o既菜,  仲有最正係叫o左條半公斤重o既東星斑, 條魚好好味, 好滑, 好鮮~~不過其實都唔知係咪真係東星斑, 都唔識分, 不過好食就得啦, 個帶子都好正, 反而個老虎蝦好似冇第一日咁好食。埋單$120RM。