Day 4 ~ 15 Mar 2004

今日一早六點就要起身, 因為報o左激流, 要7:20o係lobby集合, 起身o既時候個天仲未光, o係露台望出去四周好平靜, 好舒服。梳洗後又照舊出去食早餐,  之後就去lobby集合出發喇。o個o度o既激流local tour有兩種, 分別係二級同三級激流, 上網見玩過d人話二級唔夠激, 所以我地就報o左三級, 而導遊話激流有五六個級別, 三級已經係dangerous for beginners, 而六級更加係crazy, 因為有waterfall。

今次玩激流o既地方離Resort勁遠, 首先要沿住琴日去睇螢火蟲條路去火車站, o依段路已經要個半鐘, 跟住再要搭多個半鐘火車先到。當我地去到火車站之後, 由於火車未到, 所以周圍行o左一陣, o個o度係一個類似小鎮o既地方, 好多當地人都會去o個o度搭火車, 而個火車站亦好簡陋, 好細。約十點, 我地就上火車喇, 原來架火車十分殘舊, 就好似幾十年底香港d柴油火車咁, 入面又熱又焗, 又多人, 初時仲冇位坐添, 不過好好彩有位當地人示意叫我地坐埋去, 就咁三個人坐兩個位。好不容易先等到開車, 開車之後冇咁焗, 不過架車超”dun”, 次次開車同停車o既時候都勁”chok”, 跟本冇可能訓覺, 架車一路行一路好似就散咁, 好恐怖。架火車沿住玩激流條河一直進入深山, 沿途經過好多大大小小o既村落, 原來o個d荒郊野外都有人住的……

大約個半鐘之後, 火車到達了激流o既起點, 我地o係o個o度放低晒d私人物品之後, 又再跳上火車, 向激流起點進發。再過大約半小時, 終於到o左激流o既起點, o係o個o度食o左d生果同briefing 之後, 激流旅程馬上開始。個激流總共有八個Rapids, 個個都有名<唔記得lu>, 有d好easy, 有d都幾激, 激o個d o既浪有幾尺高。我地隻船一共有九個人, 除o左我地兩個, 重有一對澳洲夫婦, 三個美國學生<好似其中兩個係香港人>同兩個教練, o個兩個教練好搞笑, 成日o係o度講笑, 又成日拉d人落水, 佢地玩得好癲。對澳洲夫婦都好好人, 沿途幫我地影o左d相<因為冇帶相機去>。開始玩初期都冇咩事, 經過幾個Rapids都平安無事, 不過之後去到一個佢話係easy rapids o既時候, 一個大浪打過來, 我就唔知咩事咁沖o左落河.....不過當時都唔驚, 仲以為個個都沖晒落水添, 點知望返隻艇先知原來只得三個人落o左落水-_-", 我仲好快就被救返上船...。全個激流玩o左個幾鐘, 而當去到有d平靜d o既地方, 教練就會俾我地<或拉d人>落去游水, 其實似除水漂流多d, 因為有d地方跟本游唔到, 仲好大浪添, 有時仲驚游唔返番隻船o度.....最後都安全到達終點, 玩完成個人勁累, 但係又覺得非常好玩, 去沙巴o既人一定要玩., 絕不能錯過!!!

上岸沖身之後就o係o個o度食lunch, 之後襯火車未到就o係河邊同火車軌上影相留念, 之後就原路返Resort。

返到Resort未到七點, 又再一次去泳池邊睇日落, 之後就返房沖涼。跟住七點幾就搭的士去o左Wawasan Plaza行o左一陣同買o左d手信, o個o度又係一個shopping mall, 有個大型supermarket, 本來想o係o個o度搵間餐廳食飯, 不過o個頭冇咩好食, 所以最終都係去返海王城。

今次炸軟殼蟹賣晒喎, 唯有叫其他o野, 叫o左四個食送, 分別係象拔蚌仔, 炒蛤, 魚脆咸蛋同一份鹿扒, 個象拔蚌仔幾抵食, 好多肉, 個炒蛤同鹿扒普通啦, 冇咩肉食, 個魚脆咸蛋都好好味, 係d魚鬆同咸蛋撈埋一齊之後炸, 送飯好正。埋單$78.25RM, 算抵。

食飽之後就搭的士返Resort執行李準備聽日返香港, 執拾好行李之後就睡了。