今日原本諗住全日都留o係博多的, 不過出發前幾日發現一整日似乎太多了, 於是搵o下搵o下, 最終決定朝早去門司港一轉, 晏晝先返博多…就係咁所以今日6:30就起身了, 梳洗過後就落lobby食早餐喇, 住o左咁多日toyoko-inn, 今日終於都可以食到佢o既早餐喇, 其實d飯糰都唔差丫<見DSC03391>。

食完早餐後就搭201號巴士去[博多]站了。由於我地o既九州JR pass只係去到琴日, 所以今日要買飛去門司港喇, 原本係想就咁坐普通車去的, 車費1430yen, 不過要個半鐘車程, 之後睇睇o下, 坐” 特急ЛЯЧヱ”<即係琴日返博多o既sonic號>都係俾多500yen就可以快約半個鐘, 所以就諗住坐特急喇。點知買飛o既時候先發現, 原來特急飛一次買2張係有平架, 佢有d叫” 回数券Уユк” o既飛, 由博多去門司港2張只需2600yen, 即係一張1300yen, 於是我地好開心咁買o左喇<見DSC03399>, 但係再之後先人知, 又原來去程同回程都係用同一種” 回数券Уユк”的, 即係話其實我地o係博多應該一次過買4張, 4張只需4800yen, 即係一張1200yen, 比一次買2張個價平100yen。又一次冇做足功課o既後果~~哈哈~~不過唔緊要啦, 只係100yen o者~~

好喇, 8:04就上車喇, 上車前仲o係車站買o左網友推介o既迷你牛角飽上車食, 間舖就o係車站綠色窗口出面, 好易搵的<見DSC03394 & DSC03397>, 佢d牛角飽出面脆脆地又甜甜地咁, 真係好好味!!!

差唔多8:52去到[小倉]站轉車, 9:14就到達[門司港]站了。[門司港]站唔大, 同埋十分懷舊...門司港以前係一個好繁榮好熱鬧o既港口, 所以有好多歷史建築物, 不過我地唔去睇歷史建築住, 而係去碼頭搭船過海先。

由車站一出, 左面就係一個碼頭, 碼頭有渡輪去本州o既下關, 而我地第一個目的地就係下關o既唐戶市場喇。於碼頭買完飛, 9:30就上船了, 其實o黎程船船程好短架咋, 就好似o係香港搭天星小輪過海咁, 不過去下關隻船快d law, 同埋貴好多law, 大約10mins o既船程一人就要390yen<見DSC03412 ~ DSC03415>!!!

話咁快我地就由九州去到本州喇, 下關係一個出產河豚o既地方, 所以一上岸就見到好多河o既擺設了。由碼頭沿住海邊行, 好快大約5mins就係唐戶市場了<見IMG_8058>, 唐戶市場就好似築地咁, 係一個賣海產o既市場, 不過除o左海產之外仲有d檔口係賣壽司魚生的, 我地就係為o左佢地而o黎架喇。同埋好似話有d檔口係星期五六日先開架咋, 今日係星期五, 所以唔使擔心啦。

入到去先知原來得幾檔係賣壽司魚生架咋, 不過款式都幾多, 仲有我最愛o既三色丼添<見IMG_8061 ~ IMG_8068>, 至於價錢就一般啦, 唔算好平, 不過都唔算貴o既, 我地買o左個三色丼, 仲有幾件壽司, 之後就出去坐o係海邊食喇<見IMG_8069 & IMG_8071>。o個o度個景都幾靚丫, 可以見到關門海峽的關門橋, 可惜今日太大霧了, 睇得唔清楚...。雖然個三色丼o既賣相唔錯, 不過同之前o係函館食o個d仲有一段距離, 至於d壽司就唔錯啦。食完之後, 唔係好夠添, 所以就再去買round 2喇!!! 今次買o左pack河豚, 仲有一件帶子同一件大拖羅壽司<見IMG_8079 ~ IMG_8086>, 兩件壽司都幾好味, 好新鮮, 不過個河豚, 同好耐之前o係東京第一次食o既感覺一樣, 冇味o既!? 都唔知食緊d咩咁, 我地都係唔識欣賞架喇, 下次都係唔食河豚了。o黎餐我地總共食o左3000yen, 都唔平呢~~~

食完壽司餐之後再o係唐戶市場入面行o左一陣, 入面有d舖頭係賣乾貨的, 有d漬物呀, 零食之類啦, 冇咩特別, 跟住就慢慢行返去碼頭lu, 沿途仲有d餐廳同手信舖咁啦, 都可以一行的。11:20就搭船返去門司港了。

一場o黎到門司港, 當然係要遊覽一o下d懷舊建築物先走啦, 門司港其實唔大, 而大部分景點離車站不遠, 例如舊門司三井俱樂部, 舊大阪商船, 展望室, 國際友好記念圖書館, 舊門司稅關, 藍翼門司吊橋等等等等, 不過我地其實唔係好清楚佢地d歷史, 所以都係影完相就算。另外當然唔少得門司港o既例景, 香蕉人啦<見IMG_8164 ~ IMG_8172>, 下關出名河豚, 而門司港就出名香蕉, 因為以前d香蕉經船送到去門司港之後, 商人都會即場叫賣o個d熟透o既香蕉, 所以而家門司港周圍都可以見到香蕉o既蹤影, 仲有大量由香蕉製成o既手信添。

o係門司港行到12點幾就準備搭車返小倉再轉特”特急ЛЯЧヱ”返博多了, 不本諗住可以搭返架靚版sonic號返博多的, 點知最終都係趕唔切, 最後整整o下都係搭返藍色o既sonic號, 13:56先返到[博多]站。

返到[博多]站, 首先o係車站d百貨公司同地下街行o左陣, 原來車站一帶都幾多o野行架, 有大量賣果子o既counter, 仲有d小商店咁啦。 行完之後就搭201號巴士去天神區了。

今日天氣又熱又曬, 所以o係門司港曬o左成朝已經好累, 所以返到天神又去o左食o野, 順便坐低休息一o下。由第一日食完一蘭開始已經覺得一定要食多次先返香港, 咁o黎個時候就o岩晒啦~~今次我地去天神區o既一蘭, 係普通版來的, 佢同運河城o既極上版分別在於o黎間價錢平d, 只係650yen, 而且冇酸味揀, 仲有普通版係冇蛋架, 要加蛋就要加100yen, 除此之外味道方面同極上版分別不大, 之但係整體o黎講都係覺得極上一蘭好味d, 可能係因為今次係第二次食o既關係啦, 冇o左o個種感動o既感覺~~哈哈<見DSC03421 ~ DSC03430>

食完一蘭拉麵之後就繼續行天神區喇, 第一日行完地下街, 今日主要都係行地下街兩旁o既百貨公司, 有solaria plaza, 三越等等, 不過似乎都係得個行字, 冇咩o岩買, 反而當我地去返第一日o既solaria stage supermarket逛o既時候, 竟然見到有士多啤梨賣, 350yen一盒, 可能因為第一日太夜所以賣晒見唔到啦, 唔理喇, 咁平更係買啦~~~行o左一陣d百貨公司, 實在太累了, 所以最終4點零就返酒店諗住休息一會了。

返酒店放低晒朝早買o既手信, 訓o左個晏覺, 6點零又再之出動喇。第一日好快就行完運河城, 仲覺得冇咩行, 不過之後睇返旅遊書先發覺原來仲有好多o野未行架, 於是我地又再一次去運河城了。運河城o既最低層原來都幾多o野o岩我地行架, 有Jump Shop, 咸蛋超人店, 一d細o既boutique, 仲有一間係買o野食手信的, 入面可以買到全九州大部分o既手信, 非常唔錯<見IMG_8210 & IMG_8213>!!!

行到7點幾, 又去搵o野食lu, 運河城雖然有好多食店, 不過好多都冇咩興趣, 最有興趣反而係食大阪燒餅o既"鶴橋風月", 九州之旅最後一晚, 一於去食大阪燒餅XDD。由於唔係太肚餓, 所以只係叫o左一個燒餅同一個類似奄列o既o野, 係睇網友o既遊記推介的, 叫"シモトモ焼わ”, 佢係蛋入面包住d豬肉, 都幾好味架, 不過我地都係鍾意個大阪燒餅多d~~hehe<見IMG_8218 ~ IMG_8242>, 今餐埋單1670yen, 滿意!!

食飽飯之後又去sega夾o左陣公仔, 大約9:00就返酒店了, 最後一晚, 當然又係
要同d手信大合照o既時候啦, 感覺今次九州之行都唔係買o左好多o野者, 同以往一樣, 主要都係d食得o既o野, 仲有d係幫人買o既物品<見DSC03437 ~ IMG_8275>。

影完手信, 食埋個士多啤梨<見DSC03440>, 十一點幾就訓了。聽日就要離開九州返香港了, 真係有d失落呀!!!