自從上年去完東京之後, 就愛上o左日本o黎個地方。今年本來打算七月去北海道賞花, 可惜時間方面配合唔到, 所以去唔成…

既然賞花唔成,不如賞紅葉吧! 最終落實了今次的目的地 – 大阪、京都、神戶。

今次旅行又係幫襯安運買package, package包三晚酒店<其中一晚住京都>連CX來回機票, 其後我地再自行上網預訂了三晚梅田中津Toyoko Inn。總共7天旅程。

11/26一早六點幾就起床, 七點幾出門口, 大約八點半就到達機場, 前一晚已經o係CX web site做o左online check-in, 仲劃埋位, 到達機場之後只需經專櫃check-in行李就行了, 無需跟其他人排隊做check-in手續, 都幾方便。順帶一提係做o左online check-in o既話可以o係飛機起飛前45分鐘先到達機場。

以往, Check-in行李過後都係食埋早餐先入閘, 不過今次就入o左閘先搵o野食, 原來入閘後o既食店比起閘外還要多, 而且人唔多, 唔使點等位, 搭o左咁多次飛機都唔知, 真係大鄉里…

食完大家樂早餐之後就斯斯然行去登機閘口喇, 我地今次乘搭國泰CX506班機, 10:20準時起飛, 直飛大阪關西機場。今次o既飛機餐都係咁啦, 有雞有魚咁, 不過就唔多好味, 唔通國泰o既飛機餐已經今非昔比!? 還有在機上看了一套<龍咁威2>, 果然係無聊到極點o既一套戲, 有點浪費時間。

三個多小時之後, 當地時間約2:30, 我們就到達關西空港喇。攪掂晒d入境手續之後第一時間唔係去搭JR, 而係根據其他人o既推介去關西空港二樓的” 青木松風庵”買士多啤梨糯米滋食。原來” 青木松風庵”只係一間手信舖入面其中一個counter, 我地俾o左o個款士多啤梨糯米滋o既日文名<おしゃれ いちご>佢睇, 點知佢話而家o黎個季節冇得賣喎, 取而代之o既係另一款都係士多啤梨糯米滋, 名叫”莓一衣”< 見Day7相簿DSC06965/DSC06966>, 一盒有六粒, 售963yen, 不過可惜我地去到o既時候亦已經賣晒, 咁就唯有落order訂購, o係返香港o個日拎啦。

買完糯米滋, 再o係地下o既tourist information counter拎o左d地圖同旅遊資料之後我地就經2樓行去搭JR喇, JR站o係正機場隔離, 過條橋就到, 好方便, 而南海電鐵亦位於JR站隔離, 所以無論搭JR去大阪或南海電鐵去難波都同樣方便。

去到JR站, 見到d售票機, o依!? 好似唔多記得點用添…幸好隔離有JR綠色窗口, 於是我地就直接入去買車飛去大阪站喇, 車費@1160yen。o係月台等車途中見到月台o既另一面停o左一架好似係去京都o既列車, 佢d位到o左總站之後會自動轉向另一個方向, 好鬼型好先進咁。

由關西空港搭JR去大阪站車程大約一小時, 唔使轉車。四點幾到達JR大阪站, 跟住就第一時間又去o左綠色窗口, 有三樣o野要做,
1. 之前o係香港日航天地買o左關西一天JR Pass <@2000yen>, 準備第三日去姬路+神戶用。香港買o個個只係換票証, 去到大阪要換真正o既Pass同話佢知邊日用。< 見Day3相簿DSC05856>

2. 第二日我地會去環球影城, 於是我地就o係綠色窗口買定入場券<@5500yen>, 到時直接用o個張飛排隊入場就得, 唔使再另外排隊買入場券。< 見Day2相簿DSC05386>

3. 由於我地第5日o係京都想搭o個架嵯峨野小火車, 於是我地就o係綠色窗口買定飛, 好彩之前o係香港連個坐位表都print埋出o黎, 去到就咁指俾佢睇我地想坐邊個位就得喇, 小火車車費@600yen。< 見Day4相簿DSC06198>

以上三件事唔知關西空港有無得辦理, 如果有會仲好, 因為關西空港o既綠色窗口少人好多。

攪掂晒d飛/入場券之後我地就準備搭地下鐵[市営御堂筋線]去中津站喇, 搭車前不防買張叫”rainbow card” o既車飛, 其實即係儲值飛, 不過會印晒你去過d咩站, 好有記念價值, 同埋唔使次次買飛, 不過rainbow card只可以搭地鐵<即使去到京都都o岩用>。大阪站附近d地下街真係超大, 叫”梅田”o既站都有三個<市営梅田, 阪神梅田, 阪急梅田>, o係大阪住o左幾日都唔係好知d地下街點行, 行極d地方都好似未行過咁…淨係識跟住d指示牌搵我地要去o既地方。

O係市営梅田站搭一個站就到達中津站, 中津站係一個細站, 比較靜, 夜晚冇咩人。由中津站一出, 行2-3分鐘就到達中津Toyoko Inn喇。入到去俾o左個confirmation e-mail佢做check-in手續, 好快就攪掂上房喇。一入房, 的而且係好細, 不過都預o左, 日本大部分酒店都係咁架啦~~

不嬲都見人推介Toyoko Inn, 貪佢較平<7770yen一晚>同各方面都ok。而我地住o左幾日都覺得幾好<以下是以中津Toyoko Inn為例, 其他Toyoko Inn唔清楚=P>。首先一check-in就有小禮物送, 係襪一對。另外lobby有電腦可以供免費上網, 房入面都有Lan插頭可以駁notebook, 都係免費的。此外lobby亦有IDD電話提供, 3分鐘都係100yen, 算係幾平。Lobby亦有蒸溜水提供, 我地住o個幾日就係朝朝拎住個水樽o係lobby斟完水先出發~~

上房放抵晒d行李之後就展開我地o既大阪之旅喇, 第一站 – 心齋橋。

我地由中津站搭返[市営御堂筋線], 幾個站之後就係心齋橋喇 。心齋橋其實係一條好長o既商店街, 叫“心齋橋筋”, 入面有好多大大小小o既商店, 有食肆, 藥房, hello kitty專門店, Disney store, 彈珠機舖, 夾公仔舖等等等等, 基本上就好似旺角咁, 好多人, 好熱鬧。首先我地o係心齋橋站附近o既Tokyu Hands行o左一陣, Tokyu Hands上年o係東京都行過, 咩都有得賣。買o左d 手信之後, 跟住就沿住心齋橋筋向道頓崛方向進發喇。日本真係周圍都有好多夾公仔舖, 遊戲機電器毛巾手錶咩都有得夾<當然係公仔最易夾啦!>, 而且間間都可以叫d職員擺到d公仔最易夾為止, 心齋橋筋其中有間Sega, d職員勁好人, 佢地幫你擺d位幾乎次次都係一次就夾到, 真係好似送俾你咁, 夾公仔送俾人做手信真係一個唔錯o既選擇。

行o左冇耐心齋橋筋, 之後就到達道頓崛川喇, 道頓崛川即係一條河, 不過條河好似填過好多次, 而家已經變得好窄喇…由心齋橋筋穿過道頓崛川就係道頓崛筋, 即係另一條好多人去o左街。穿過道頓崛川o個條橋上面正正就係其中一個最多大阪遊客影相留念o既地方, 即係成日都見到人地d大阪相入面o個個固力果公仔招牌o既所在地<見Day1相簿DSC05278…>。不過我地去o個陣條河有工程, 唔知係咪因為咁, 橋o既一邊圍o左d好高o既玻璃, 所以影d相唔係咁靚。

過o左條都唔知算唔算係橋o既o野之後, 就到達我地今晚開餐o既地方 – 蟹道樂。早於上年去東京之前已經聽人推介過蟹道樂, 不過一直都冇機會試, 今晚終於都有機會喇。蟹道樂有好多分店, 單單係道頓崛筋就已經有三間, 我地去o左o係正橋隔離, 道頓崛筋o既本店, 本店都幾大, 有三四層, 環境亦唔錯, 唔會太嘈。我地入去o左時候大約八點鐘, 唔係好多人, 等o左一陣就有位喇。話明係蟹道樂, 當然係食蟹架啦, 佢有好多唔同o既set, 有d都幾貴, 有d平d, 不過個個都好似好多o野食咁。而我地由於要留肚食其他o野, 所以只係share o左一個6615yen o既set<見Day1相簿DSC05314>, 有成十味道菜, 有蟹刺身, 燒蟹腳, 壽司, 凍蟹, 蒸蛋, 火鍋等等等等, 仲有甜品添。基本上d o野都幾好味, 個人就覺得個燒蟹腳最正, 不過整體o黎講又未至於非常出色, 即係試過就算, 下次可以不去。

食完一餐咁豐富o既蟹宴之後就繼續行街 - 道頓崛筋。道頓崛筋感覺比心齋橋筋多些食店, 例如四天王, 神座, 金龍拉麵等等。由於我地食完dinner都成九點幾喇, d舖頭都已經陸續收舖。不過仲有好多食店都未收o既。日本好多地方都係咁, 好多賣o野o既舖頭八點零就收, 想行街o既話真係要早d去。行o左冇耐就見到一間旅遊書介紹o既八爪魚丸店<見Day1相簿DSC05350…>, 見佢都唔少人排隊買o黎食, 於是我地又買埋一份, 300yen 6粒, 入面有大大粒八爪魚肉, 熱辣辣, yummy。

食完八爪魚丸, 再行多陣, 跟住就行去難波站再次搭[市営御堂筋線]返中津o既酒店休息lu。