朝早七點半就起身, 梳洗過後就落lobby食早餐喇。我地o係Toyoko Inn住o左三晚, 三日都包早餐。Toyoko Inn o既早餐好簡單, 只有飯糰, 麵豉湯, 仲有咖啡/茶, 全部任食/飲, 雖然味道只係一般, 不過冇咩所謂啦, 早餐食得飽就得架喇。

食飽飯糰之後就出發去今日o既目的地 – 環球影城, 即係USJ喇。見晨早溜溜有氣有力, 於是就選擇由中津行去大阪站, 其實一d都唔遠, 大約十分鐘就到, 不過我地個行程好緊密, 保留體力好緊要, 所以今次亦係唯一一次行去大阪站的~~哈<中津去大阪只係一個站, 咁就200yen, 貴!!!>。去USJ可以o係大阪站搭[ＪＲ大阪環状線<内回り>], 去到西九条站再轉[ＪＲ桜島線], 去到一個叫”ユニバーサルシティ” o既站落車, 出閘冇耐就係USJ o既入口。好似有幾班車係由大阪直去USJ的, 唔使轉車, 不過我地遇唔o岩時間。

由車站行去USJ入口會途經一個幾層高o既商場, 入面好多舖頭都係賣USJ o既紀念品, 亦有好多賣其他精品的, 都唔少o野行…另外仲有d食店咁, 最易認就係Hardrock Café, 有大大個結他做招牌。由於去到o既時候都係大約9:00, 全部舖頭都未開, 於是我地就直接行去入口處喇。

去到入口處…果然係同上年去東京迪士尼一樣, 超多人。大部分都係日本人, 又係唔少學生。之前仲聽人講USJ冇迪士尼咁多人架嘛, 不過可能係因為星期日, 同埋而家做緊聖誕主題, 有d節目係聖誕期間先有啦。

我地o係門口o個個例牌景點 – 大大個會轉o既USJ招牌影o左幾張相之後就用琴日o係綠色窗口買o個張飛直接入場喇, 入場o既時候佢會換返張普通入場券俾你o既。同disneyland一樣, USJ都有d卡通人物走o黎走去同人影相, 不過比disneyland少d, 同埋有d係要俾錢先有得影law, 真係有點兒那個….一入到去第一隻見到o既係大力水手, 免費的, 亦係全日唯一一隻同佢拍照o既人物。

一入去首先係一條商店街, 有大大小小o既紀念品舖, 可以臨走先去逛逛。我地周圍兜o左一陣, 第一個想去玩Spiderman, 點知未去到已經覺得唔多妥, 點解有條咁長o既人龍o既!?!!! 原來真係排Spiderman的, 眼見佢門口個牌寫住120mins…點排呀!!! 之後發現所有game都差唔多, 全部都排滿人。最後我地唯有死死氣去買Express Pass。Express Pass咪就係好似disneyland o既fastpass咁law, 唔使排隊可以玩game, 不過disney o個d唔使錢架嘛, USJ個Express pass就要俾錢買, 四個game o既pass要成2800yen, 即係入場費o既一半o度啦。仲有個係7個game o既, 當然仲貴啦。我地o係terminator o個間紀念品店買o左個4個game o既pass, Spiderman係指定o既game, 而其餘2個就2揀一咁, 所以買pass前都要睇睇d game係咪o岩玩先買。

好喇, 買完pass, 跟住就去玩Spiderman喇, 有pass等o左一陣就有得玩喇, Spiderman個game係坐o係架車上面, 架車會跟住路線郁o既, 沿途會有d 3D o既動畫同埋d真實o既埸景, 夾埋一齊就好似o係個城市入面咁, 幾刺激, 好好玩, 係其中一個必玩o既game。

玩完Spiderman之後就周圍行o下同影相, 咁o岩見到有d芝麻街人物唱歌跳舞表演, 不過我地對芝麻街冇咩興趣, 睇o左陣就走人喇。感覺上USJ入面d景都幾靚, 又係好似disneyland咁分開幾個區, 每個都各有特色, 其中Spiderman附近有幾棵銀杏樹, o係o黎個紅葉季節全部都呈現金黃色, 襯托住d特色建築, 好靚。

行o左冇耐就到達Back To The Future個game喇, 由於個pass o既另一個game係冇咩興趣o既ET, 所以就用pass玩o黎個Back To The Future喇。基本上o黎個game都係坐o係架o野o度搖搖o下, 前面就係一個垂直o既太空館天幕咁, 不過唔使戴o個d 3D眼鏡, 所以唔係咁刺激, 冇咩特別, 可以唔玩。

玩完回到未來, 之後經過Backdraft, 冇人排隊o既!? 仲諗住用pass玩添。點知入到去先見到條人龍!!! 好彩都係等o左大約半個鐘就有得玩喇。好多人去完USJ都推介Backdraft o黎個game, 中文叫”浴火赤子情”喎, 佢o既主題係俾你感受一下火災現場o既情況。入到去大部分時間都係睇片, 大約係講o下d火災片點拍咁啦, 唔識聽日文真係睇到有d悶, 不過睇完d片之後就係高潮所在喇, 大家會到達一個模擬火災現場o既地方, 你會見到火災現場o既情況, 除o左火之外仲有爆炸啦, 水啦, 緊張音樂等等 <乜真實火災現場有音樂o既咩!? =P>, 我覺得個game最正係你會見到唔同形態o既火, 同埋感受得到o既熱力, 仲有就係爆炸o既震撼力。”浴火赤子情”, 必玩!!!

玩完Backdraft之後都係11:30, 跟住就係去Jurassic Park玩佢個game - “Jurassic Park, The Ride” 喇。由於之前做定功課, 知道o黎個game會濕身, 所以已經帶定d即棄o既雨褸去。其實個game門口都有得賣, 不過要300yen…好喇, 著定雨褸, 放低d o野o係locker之後就入去玩喇。今次又用pass<個pass另一個game係terminator>。個game其實即係海洋公園o既滑浪飛船, 不過架船大d, 同埋衝落去o個o野好似高d。一開始架船會途經d恐龍呀, 森林咁, 都係陪襯o既o者~~最後就係由高處衝落去, o個o下好刺激, 最有趣係衝落去o個陣雖然d水花濺到好高, 不過個身唔多濕, 但係好快d水花就會由四面八方咁飛埋o黎!!! 結果係……件雨褸濕晒,連d頭髮都濕埋。出返o黎之後睇返其他船衝落o黎, 原來d水花可以踐到兩層樓咁高…P.S. 衝落o黎o個陣會影相架, 擺定pose啦!!!

濕完身, 以為好快就乾啦, 點知o黎個時候落雨喎!!! 仲幾大添, 咁就唯有搵地方避雨同買d o野食當lunch啦。仲諗緊1:00 o既巡遊會唔會取消, 好彩過o左一陣就停雨喇, 仲出太陽添。

個巡遊好似係聖誕先有, 準時1:00開始, 就好似disneyland咁, 有d花車同卡通人物出o黎載歌載舞, 人物有snoopy, hello kitty, 芝麻街, 史力加等, 雖然唔係好多花車, 不過個巡遊比較多著重歌舞, 連d卡通人物都識跳舞, 唔似disneyland咁d人物淨係識揮手~~~巡遊個氣氛唔錯, 不過個巡遊其實有故事架, 佢地會講o野, 不過又係日文lor…

當個巡遊就完o既時候我地就即刻走去terminator o度排隊玩喇, 入到去唔多人, 不過就等o左好耐先開始。個game一開始又係有人走出o黎講日文, 只見d日本人笑得好開心, 我地就完全唔知咩事, 之後又睇片, 真係覺得有d悶。再之後就入正題喇, 原來都係戴住3D眼鏡睇電影, 不過特別在間唔中戲入面d人物會走出o黎<即係人扮>, 叫做多d o野睇, 不過都係覺得好一般, 可能因為之前睇過其他同類電影<都係disneyland o個d >, 有比較啦。

睇完terminator 3D電影之後已經差唔多三點喇, 行o左陣紀念品店, 差唔多四點就去睇Waterworld 場show喇。o黎個show都算係USJ入面最出名o既一個show, 個showo既演員會做d高難度動作, 有打鬥, 爆炸, 跳水, 水上電單車…等等等等。我覺得個show非常精彩, 睇完好佩服佢地竟然可以o係咁有限o既地方做到咁多唔同o既動作/表演。P.S. o黎個show坐某d位會濕身的…

睇完咁精彩o既show之後, 都係時候用埋最後一張pass去玩大白鯊喇。今次o黎個game係坐住架船, 船上有個導遊沿途介紹<日文!!!>, 間唔中就有d o野o係水入面升上o黎, o黎個game都係坐某d位都會濕身架~~個game都ok o既, 可能小朋友會鍾意多d, 同埋如果你玩過香港迪士尼o個個” 森林河流之旅”會覺得兩個game o既模式係一樣的。

玩埋個大白鯊之後已經開始天黑lu, 同埋要玩o既都差唔多玩晒喇<餘下想玩o既都仲係有好多人排隊>, 於是我地就繼續周圍行o下d舖頭, 影o下相咁。期間入o左一個好似叫snoopy studio o既地方, 入面全部都係snoopy o野, 不過就o岩小朋友多d。直至大約5:30, 已經有好多人聚集o係” 紐約區”附近喇, 事關聖誕期間紐約區有棵好高o既聖誕樹, 當日5:30就會有亮燈儀式。晏晝睇棵聖誕樹好似冇咩特別咁, 估唔到亮燈之後相當漂亮, 加上一些現場o既聖誕歌曲, 氣氛幾正, 就當係預早慶祝聖誕吧!

睇o左陣聖誕樹之後就離開USJ喇, 臨去車站前行o左陣沿途o既商場, 入面有唔少舖頭, 除o左好多賣USJ紀念品o既舖頭同食肆之外, 連扭蛋舖同夾公仔舖都有, 喜歡o既朋友不防去行行。

跟住我地就原路返回大阪站搵o野食喇。梅田有個地方叫”新梅田食堂街”, o係市營梅田站隔離, 入面有好多地道o野食, 可惜由於梅田實在太大喇, 我地搵左好一陣子都搵唔到, 加上身心疲累, 最後誤打誤撞去o左一間叫”博多ラーメン” o既舖頭食拉麵。間舖o係阪急三番街同市營梅田站中間o個條街, 細細間, 不過眼見都唔少日本人去食<見Day2相簿DSC05582>。D拉麵唔貴, 大約600-700yen一個啦, 而且味道唔錯, 另外仲有餃子, 都係200yen, 埋單1500yen, 幾抵食。

食完拉麵之後只不過係七點幾, 之後就過對面阪急三番街入面o既Fancl House幫家姐買o野喇, 日本o既Fancl House平均平過香港三分一, 都算平幾多。三番街入面亦有Kiddy Land, 主要係賣玩具精品的。買完Fancl已經八點幾喇, 其實已經極之累, 不過又唔願咁早返酒店, 於是就去o左附近o既Hep Five喇。Hep Five係一個有好多層o既商場, 上面有個摩天輪, 幾旺, 商場入面有兩條好大條o既紅色鯨魚模型, 亦都係好多時o係人地d相簿o度見到的。由於我地o既目的唔係shopping, 加上累到癲, 所以基本上我地只係諗住到此一遊, 影幾張相, 跟住就搭車返Toyoko Inn沖涼訓覺喇。