今朝7:00就起床, 攪掂晒d o野之後就出發喇。今日放棄o左Toyoko Inn o既早餐, 取而代之o既係去o左大阪站附近o既Mister Donut。日本周圍都有Mister Donut, 佢d Donut有d幾好味架, 自從上年食過之後就成日都想再食, 不過佢d早餐set得一個Donut同o野飲, 其實唔係好夠飽。

食完早餐之後就o係大阪站搭JR[神戸線新快速]去今日o既第一個目的地 - 姬路城。由於第一日已經換o左JR 1Day Pass, 所以入閘時就咁show個pass俾閘口o既職員睇就得喇。去姬路城用Pass平好多, 因為大阪去姬路單程都要1450yen, 而個1Day Pass都只係2000yen。

其實姬路距離大阪都幾遠, 車程要大約1小時。我地大約9:00到達姫路站, 姫路站唔大, 由北口一出就會見到一條大馬路, 沿住馬路一直行就係姬路城, 不過睇落好似好遠咁, 於是我就就照住手上o既資料搵巴士搭過去喇。姫路站對出就係一個巴士站, 不過我地搵極都搵唔到我地想搭o既車, 最終問o左一個o係車站指揮交通o既大叔, 不過佢好似唔多明我地想點, 後來佢竟然離開崗位帶我地去車站搵另一個職員, 哈哈~~佢好似係負責指揮交通架bor, 就咁就走o左去, 我地o係後面跟住真係有d擔心, 不過又覺得好攪笑!! 最終我地指住手上姬路城o既leaflet, 佢終於都明我地想點喇, 之後就叫我地上o左一架巴士喇。

大約5分鐘, 好快就到達姬路城門口, 落車之後已經見到有唔少o既當地旅行團陸陸續續咁入去, 估唔到平日都有咁多人去參觀。步入姬路城範圍, 首先見到一大片o既草地, 不過草就冇乜喇, 銀杏就有棵, 一片草地上伶伶丁丁有一棵金黃色o既銀杏, 幾特出。遠看就見到姬路城lu。姬路城係一座日本o既古代城堡, 已經有幾百年歷史, 1993年已被列入世界文化遺產…雖然我唔係好知姬路城o既歷史背景, 不過好耐以前已經想實地參觀一下這些日本o既城堡。

我地沿住這片草地旁o既小路向姬路城進發, 到達收費入口前有一兩間舖頭, 賣o既當然係一d手信類o既物品啦, 我地亦在此買o左d postcard, 準備之後一見到有o個d車站or旅遊景點印章就”吸”, 再寫上地址寄俾d friend做紀念。買完postcard之後俾錢入場喇, 入場費600yen, 入到去可以將個人物品放o係門口o既coin locker, 離開o既時候取回<貴重物品當然跟身啦>。

入到去之後基本上跟住個leaflet行就得, leaflet入面有地圖, 有介紹, 仲有路線圖教你點行添。姬路城都幾大, 雖然一入去就見到座天守閣, 之不過就好似行極都未行到入去咁, 事關要入去天守閣, 一定要圍住個天守閣行大約一個圈先可以去到佢o既入口, 咁樣易於防守丫嘛, o黎d亦係日本城堡o既其中一個特色。沿路行入去o既風景都唔錯架, 可以睇到姬路城唔同角度o既景色。另外沿途都會有d景點, 例如有”腹切丸”, 即係以前d人切腹o既地方!!! 仲有就係姬路城o既每一個城主都會有各自o既家徽, 個家徽會刻o係d瓦片o度, 再安裝o係四周o既屋頂上。

行o左大約半個鐘, 終於都到達天守閣喇。進入天守閣必須除鞋, 不過佢有拖鞋提供的。至於除出o黎對鞋…sorry, 係冇地方放o既, 佢只會俾個膠袋你入住, 之後就要拎住四圍行, 都有d唔方便。天守閣入面有好幾層, 都係一層一層咁行上頂, 不過其實冇咩睇, 入面燈光昏暗, 唔係好知邊層係d咩地方。入面亦有展覽一d古時o既文物, 不過對我地o黎講興趣不大。

上o左幾層, 終於都到達天守閣o既頂部喇, 上面反面比較光猛, 仲好大風有d凍添。從天守閣頂部可以睇見整個姬路市, 不過印象最深反而係見到有好大片又紅又綠又橙o既樹木, 現場睇覺得好靚, 不過影出o黎又好似冇咩特別咁…

o係天守閣頂層hae o左一陣, 欣賞完一輪風景之後就沿另一條路線落返去喇。入面d樓梯都幾斜, 好多時都要捉住d扶手o黎行。落返地下之後我地就慢慢行返出入口處喇, 沿途參觀埋西之丸, 不過佢裝晒鐵架咁, 應該係修建緊。離開姬路城, o係佢對出o既舖頭買o左d手信之後就返番去之前落車果度附近諗住搵巴士返番去姬路站，點知一路向住姬路站方向行一路搵, 差唔多行o左一半先有巴士…

到達姬路站o既時候已經差唔多一點喇, 之後就再次搭JR[神戸線新快速]返番去之前經過o既”三ノ宮”站, 目的係要食神戶牛!!! 我地一早已經搵o左幾間網友推介o既神戶牛餐廳資料, 我地大約1:45就到達三ノ宮站,落車後就全速去搵小妹推介o既” ステーキランド ＫＯＢＥ”喇。由JR站一出轉左, 大約行三分鐘就到喇<沿途會見到幾間夾公仔舖頭的>。間餐廳o既lunch set時間為11:00-14:00。Lunch set共有5個, 實質得3款牛扒, 有英文menu<見Day3相簿DSC05727>, 而每個set都有沙律, 飯, 炒雜菜, 仲有飲品添。

由於我地睇完個英文menu, 除o左最尾o個個有"Kobe Beef"字樣, 其餘三個都唔知有咩分別, 於是我地就叫o左最貴o個兩個set喇, 即係"Kobe Beef Sirloin Steak"同"Large Tender-Loin Steak"喇。由於個” Tender-Loin Steak “冇寫明係Kobe, 所以其實都唔知係咩牛…Order完, 等o左一陣, 就有個肥肥地o既廚師拎住兩塊牛扒走出o黎喇。睇落間餐廳全部位前面都係一大塊鐵板, 即係師傅會o係你面前煎俾你食。好喇, 師傅首先整o既係"Tender-Loin Steak", 我地一邊食住d前菜, 一邊睇住佢煎, 只見師傅以純熟o既手勢將塊牛扒一邊煎一邊切成八粒細細粒o既牛扒粒, 其實都真係幾細塊架咋, 煎煎o下佢仲無啦啦拎o左我個筷子套寫o左d o野o係上面 - "Rice is Free", 即係可以隨便添飯^_^。好快師傅就將d煎好o既牛扒粒擺o係我地面前隻碟度喇, 果然相當美味, 煎得o岩o岩好, medium, 唔會太生亦唔 會太熟。跟住落o黎就係主角神戶牛喇, o黎塊睇落好似厚d, 師傅又係好純熟咁好快就煎好分成八粒上碟喇,比起之前o個塊, o黎塊果然好味d喎, 雖然未至於人地講會入口即溶<可能因為係特價午餐, 唔係最高級o個種啦>, 不過塊牛扒好"林", 肉汁完全地鎖住o係入面, 已經係我食過最好味o既牛扒。 食完咁美味o既神戶牛扒之後就埋單喇, o黎餐5460yen, 午餐o黎講當然係貴啦, 不過神戶牛喎, 叫做食過喇。

離開餐廳, 之後就原路行返去JR站附近喇。JR站對出就係City Loop巴士站, 搭City Loop就可以到達我地下一個目的地 - 北野異人館。北野異人館離三ノ宮站話遠唔遠話近唔近, 咁我地就當然係搭車去啦。City Loop一程250yen, 都幾貴。 車上會有位職員沿途介紹經過o既地方同收錢, 不過當然係聽唔明o既日文啦。十分鐘o度車程就到達北野異人館喇, 北野異人館其實就好似一個豪宅區咁, 有好多大大少少o既獨立房屋, 而佢o既賣點係每間屋都有著唔同國家o既特色, 例如英國館, 日中國領事館, 荷蘭館等等, 而每一間屋都可以入去參觀, 不過每間都要收入場費, 另外比較出名o既有萌黃之館同風見雞之家。我地去北野異人館都係志在到此一遊, 對d屋o既外觀比起屋入面o既擺設還有興趣, 所以我地o係異人館行o左陣, 周圍影o左d相, 再o係d手信舖買o左d手信之後就離開喇。

離開o既時候我地o係原先落車o既City Loop巴士站再一次搭City Loop巴士前往跟住落o黎o既景點 - 神戶港。我地本來諗住直接去到Mosaic先落車, 不過由於我地搭車時已經係四點, 而平日三點幾打後o既City Loop只係會去到神戶塔附近, 而唔會過去Mosaic的, 於是我地唯有o係總站神戶塔附近o既海洋博物館落車喇。落車o既時候咁o岩係日落時分, 從神戶塔對出碼頭望過去Mosaic o既景色相當唔錯, 仲有可以見到Mosaic隔離o既摩天輪開始亮燈添。就係咁我地o係神戶塔附近逗留o左一陣先行過去Mosaic。另外神戶塔下面都有d舖頭, 都有唔少手信賣架。行幾分鐘就到達Mosaic喇, Mosaic係一個o係海旁o既商場, 商店唔係好多, 不過有部分地方幾開揚, 感覺有d似東京台場o既"Decks"咁。

去神戶港o既主要目的係睇夜景, Mosaic有o度好似露天平台咁, 可以望返過去之前落車o既神戶塔同海洋博物館, o黎個景就係神戶港最出名o既夜景view喇。睇落又真係幾靚o既, 夜晚望過去比較特出o既就只有神戶塔, 海洋博物館同另一橦唔知咩大樓, 再過d就係Oriental Hotel, 這間酒店我估一d都唔平啦。

我地o係Mosaic欣賞o左好一陣子o既夜景, 影o左好多相, 其間又行o左陣入面d舖頭, d舖頭好多都係買手信同精品的, 都算幾多o野賣, 另外仲有唔少餐廳, 有d都有旅遊書推介的。Mosaic隔離就係一個叫Mosaic Garden o既地方, 即係之前見到o個個摩天輪o既地方, 除o左摩天輪之外仲有d機動遊戲咁, 都冇詳細研究好唔好玩喇。影完夜景, 行完街都只不過係六點幾, 而我地又未肚餓, 於是決定返到梅田先搵o野食。

Mosaic距離JR神戶站都幾遠, 都要行成十幾分鐘, 途中會經過一個叫"神戶阪急"o既大形商場…去到JR神戶站就再次搭JR[神戸線新快速]返去大阪站喇。跟住就去”阪急東通商店街”搵o野食喇。阪急東通商店街o係Hep Navio對落o既一條橫街, 佢就好似心齋橋咁, 一條長街, 有o野食有o野買有得夾公仔, 不過o黎o度冇心齋橋咁旺咁多人, 同埋o黎o度好似比較多食店。行o左一陣, 雖然係有好多餐廳, 不過都唔知邊間好食, 同埋好多都好似幾高級幾貴咁, 最終竟然係去o左街頭o個間"浪花餃子スタジアム"食餃子。浪花餃子其實同池袋sunshine city入面o個個餃子博物館同一個集團架, 都係o個隻貓做logo<見Day3相簿DSC05850>, 上次去池袋冇食到, 今次終於都可以試o下喇。上面裝修到好似d舊街咁, 有一間間o既餃子檔, 我地唔知食邊間好, 咁o岩見到佢地d檔口放o左d咩咩餃子比賽第幾位o既牌, 於是我地就是但買o左男子組同女子組第一位各一客o黎食喇<分別450yen同480yen>。其中一個餃子有d芝士o係面, 幾好味架<見Day3相簿DSC05845>。而另一個都幾好味, 果然係男女子組第一位~~哈!!

淨係食餃子當然唔夠啦, 於是臨返酒店之前o係便利店買o左兩個杯麵返酒店食,其中一個新出o既杯麵有幾塊叉燒o係入面扮係叉燒拉麵, 不過又幾好味喎。食完杯麵就沖涼刷牙, 跟住仲有就係執埋d行李準備聽日一早check-out, 之後就訓覺了。