今朝又係7:00起床, 拿拿臨執好晒d行李就check-out lu<又係放棄左Toyoko Inn o既早餐>。今日要轉酒店, 住京都。首先搭[市営御堂筋線]去[新大阪]站, 跟係就轉JR[京都線新快速]去JR京都站喇, o黎條JR[京都線新快速]其實即係琴日去神戶o個條線, 不過唔同方向<所以唔同名?>…京都距離大阪都幾近, 大約搭左25分鐘左右就到。

想像中京都係一個冇咁現代化, 比較少人o既地方, 不過一出京都站就發覺似乎唔係o黎回事…由京都站一出就係一個好大型o既商場, 叫”伊勢丹”, ”伊勢丹”好大, 大約有十層, 望落好現代化, 淨係o黎個商場已經同想像中o既京都好唔同。

到達京都站第一時間係去酒店check-in, 我地今晚住o既酒店係package包埋o既, 叫”Kyoto Tower Hotel”, 響正車站對面, 基本上一出車站過o左巴士站過多條馬路就到, 位置極之方便, 真係好呀。由於時間尚早, 未有得check-in, 於是我地交低晒d行李俾酒店保管, 之後就去食早餐喇。”伊勢丹”一上電梯就已經有Mister Donut, 隔離就係另一間類似supersandwich o既o野, o岩晒!! 我地求其買o左d o野食, 食完之後就開始京都行程喇。

由於京都o既旅遊景點多數都係廟, 寺院之類, 好多都冇鐵路直接到達, 所以遊覽京都搭巴士反而仲方便。巴士站就響京都站出面, 巴士站好大, 有好多唔同o既巴士路線, 可以去到大部分o既旅遊景點。我地首先o係巴士站隔離o既”総合バス案内所”買o左張巴士1日pass<見Day4相簿DSC05863>, 京都o既巴士多數都係220yen一程, 無論搭幾個多站都係o黎個價, 而巴士o既1日pass只不過係500yen, 即係搭3程就可以回本。o黎兩日o既京都遊都係用一日pass的, 不過最終每日都只係搭到兩程~~哈!!! 京都o既巴士係o係車尾上車, 車頭落車, 落車o既時候至o係車頭俾錢, 如果用1 日o既巴士pass, 於當日第一次落車o既時候入張pass去車頭部機o度, 咁張pass就會印o左當日o既日子, 咁之後再搭巴士o既時候就咁show個日子俾司機睇就得, 唔使再入機。

今日第一個目的地係清水寺, 買完pass之後就去搭車喇, 估唔到平日都有咁多人o黎觀光, 尤其係我地想搭果架100號巴士, 一去到已經排晒長龍咁, 仲有一大班學生添!!! 好彩我地做足準備, 知道206 號巴士都去到清水寺o者<206號比較少人>。等左好一陣子至上到206號巴士去清水寺,大概10分鐘就到「清水道站」喇, 落車後都係跟住其他人行, 沿途都係一d買手信/精品o既舖頭, 不過大部分都未開…行左大約十分鐘就到達清水寺門口lu。好感動呀, 一去到門口就已經見到好多紅葉, 仲有好靚o既銀杏添~~~終於見到真正o既紅葉喇, 真係幾靚喎。雖然紅葉多, 不過人亦都好多, 只係朝早十點幾, 就已經有一批批o既人擁入去喇, 而且多數都係日本人, 睇o黎日本人都好鍾意睇紅葉。今日o既天氣都算幾好, 至少有太陽, 我地o係門口就已經俾d紅葉吸引住, 影o左好多相。跟住先慢慢行入去。上o左條樓梯, 再行冇耐就係清水寺o既收費入口喇, 沿途都有一d神社/廟之類o既建築, 主要都係紅色, 望落同d紅葉好襯。收費入口前面有一個水池, 好似係俾人洗完手先入去參觀的, 我地初時仲以為係俾人飲o既添…。俾左300yen之後就入寺參觀喇, 沿途真係除了紅葉還有紅葉!!! 成日都見人影d紅葉相, 覺得好靚, 今日終於都可以現場欣賞了, 真係好開心。

行左無耐就到左好出名o既清水舞台, 佢係靠139支木支撐住嫁咋, 完全無用鐵釘o黎搭建嫁, 不過呢d都唔重要啦, 因為其實我地對d寺廟真係冇咩興趣, 我地淨係對d紅葉有興趣, 有紅葉襯托住o既清水舞台好靚, 由清水舞台望出去就只有一片o既樹林, 大部分o既樹都變成紅色, 有d紅d, 有d橙橙地咁, 可惜今日有d霧, 令到個景有點兒失色。

我地o係清水舞台逗留o左一陣, 之後就去下一個景點 - 地主神社。地主神社就o係清水舞台隔離, 行上一條短樓梯就到, 門口仲有好大個” 緣”字添<見Day4相簿DSC05935>。地主神社範圍其實好細, 差唔多一眼就睇晒, 入面只有一條路, 兩旁有d俾日祈福o既祭壇, 神像咁, 佢地每座祭壇有咩分別就真係唔知喇,淨係知呢度係出名祈求姻緣o既地方, 所以有好多年青情人去。神社入面其中一個出名o既地方就係兩舊叫"戀愛占卜石"o既姻緣石, 傳說只要閉上雙眼, 能夠由一邊的姻緣石行至另一邊的姻緣石, 即可獲得天賜良緣, 所以好多日本學生妹o黎呢度呢, 當日所見都有唔少人試行呢, 不過梗係有人帶住咁行啦, 如果唔係, 咁多人, 都唔知要撞到幾多人先可以去到另一舊石。

離開地主神社, 再行一陣就到o左另一個”突’出o黎o既舞台, o黎o度可以清楚睇到清水舞台下面o既枝柱。亦係一個影相o既熱點, 不過去到o既時間咁o岩維修緊, 所以唔可以行出去, 只可以離遠欣賞。

之後再順住條路行, 沿途都會見到好多紅葉, 有d真係好靚架, 亦有好多人好似我地咁, 一邊行一邊影相, 仲見到有好多日本人拾地下d紅葉添。再行無耐就會見到有d細細間o既食店, 行到累就可以坐低食碗烏冬或者糖水, 一邊食o野一邊欣賞紅葉, 個感覺應該會好正。過o左d食店之後就係”音羽瀑布”喇, 音羽瀑布亦係另一個出名o既景點, 佢有三道泉水, 聽講話分別代表健康,美麗同財富, 只要飲d泉水就可以得到o黎三樣o野, 之但係只可以飲其中兩道泉水, 如果飲晒三道o既話就會乜都無喎, 雖然好似唔多衛生, 又唔知d水o既來源, 不過入鄉隨俗嘛, 點都要試下o既 , 我地o係唔知道邊道泉水代表咩o既情況之下是但飲o左兩條, 跟係就走人喇。

跟住再行一陣就出番去清水寺o既門口喇, 十二點幾, 仍然係咁多人擁緊入去…清水寺隔離有條石路, o黎條就係清水坂, 清水坂兩旁有好多手信小舖, 感覺有d似淺草仲見世商店街咁,真係令人眼花撩亂呀, 其中好多都係賣一種叫” 生八ツ橋”o既食品, 三角形, 外面係d好似草餅o既皮, 入面包住一pat餡料, 有紅豆, 粟子, 香蕉…等等。行完清水寺就會轉入三年坂, 三年坂同清水坂一樣, 都係好多手信舖, 仲有d食店咁, 我地一路行, 買o左d手信, 之後行下行下見肚餓, 於是就求其入左間叫”八ッ橋”o既小店食lunch <見Day4相簿DSC06038 - DSC06046>。我地叫左個叉燒拉麵同咖哩烏冬, 個叉燒拉麵味道好普通o者, 有少少失望, 不過個咖哩烏冬就幾好味。食飽之後就繼續上路lu, 三年坂之後就係二年坂, 其實都係咁啦, 好多舖頭。

行完二年坂之後就去高台寺喇, 不過去到門口見好似冇咩o野睇咁, 同埋又係要俾入場費先入得去, 所以我地o係門口逗留左一陣就走lu。

接落o黎就係円山公園, 円山公園顧名思義係一個公園, 有花草樹木, 有水, 當然唔少得紅葉, 同埋好多人。我地一去到就有幾個著住和服o既人叫我地幫佢地”渣”機相, 我地之後就乘機叫返佢幫我地影, 不過係同佢地一齊影, 難得見到d著住和服o既人嘛~~~

參觀完円山公園之後就到八阪神社, 八阪神社算係比較大, 至少大過之前o既地主神社好多, 不過o黎d神社呀, 寺廟等等對我地o黎講都係差唔多咁, 都係好古色古香, 都係有一種莊嚴o既感覺, o黎d都係上次去東京睇體會唔到 o既o野。

但出左八阪神社之後就好似即刻返返大城市咁, 因為一出八阪神社, 過條馬路就係商店林立o既四條通大街, o黎o度有d百貨公司, 手信舖, 食店等等, 沿住呢條街直行就會到鴨川大橋, 咁o岩見到有個大叔o係橋上面餵海鷗, 引來數十隻海鷗爭食, 雖然場面好壯觀, 不過禽流感喎大叔!!! 睇o左一陣都係急急腳過橋先。

過o左鴨川大橋不遠就係我地下一個目的地 - 新京極通, 新京極通又係好似心齋橋咁o既商店街, 不過我覺得好似冇咩好行咁, 所以我地都係走馬看花, 好快就行完lu, 而新京極通隔離就係錦市場, 錦市場其實係一個當地人o既街市, 都有好多o野賣o既, 不過都係d街市o野law, 好似菜, 魚, 炸物之類, 原本對新京極通同錦市場呢兩個地方期望甚高, 不過行完之後有少少失望呢, 因為無想像中咁多野睇 / 食呢, 仲有之前見有人介紹錦市場入面一間賣豆腐o既舖頭, 最後都係搵唔到。

行完錦市場都係5點零咋, 見時間尚早, 又買左巴士pass, 所以諗住搭巴士返京都站喇, 但呢個係一個錯誤o既決定, 因為撞正人地放工時間, 巴士站已經企o左好多人等車, 好不容易先上到架巴士, 點知上到巴士係勁迫, 又熱, 除唔到件羽絨, 路面又好塞車……令我諗起上年響東京迫地鐵去築地 o既滋味, 最終我地搭左好耐, 差唔多六點至返到京都站, 真係慘呀。

落車後首先要返酒店房放低d戰利品。返到去佢地已經將我地d行李搬o左入房喇, 我地間係房竟然係尾房, 不過冇咩所謂啦, 我地唔係咁mind o黎d o野。間房竟然比我想像中大呢, 似返一間酒店, 至少放晒d行李o係地o下都仲有位行, 而個view就對住車站, 都算係咁啦<見Day4相簿DSC06127 - DSC06134>。放低d o野之後就用酒店送o既coupon上京都塔度睇夜景喇。京都塔就o係正酒店上面, 不過個入口有d難搵。京都塔唔係好高, 我諗大概廿幾三十層樓高啦, 同埋睇落有d舊, 應該都有好一段日子架喇, 不過點都好啦, 免費的, 冇所謂。今晚個天好清, 加上京都d 建築物比較矮, 冇咩高樓, 所以可以望到好遠, 我地行o左個圈, 影左d相, 之後就返伊勢丹搵野食喇, 伊勢丹入面有好多餐廳<特別係最頂兩層>, 咩都有得食。我地兜o左個圈, 諗左好耐, 最終都係決定去食朝思暮想o既和幸豬扒飯, 我地叫左一個2人餐, 有沙律, 蒸蛋, 湯同飲品, 主菜有蝦,豬柳, 雞同牛, 佢d野真係炸得好鬆脆好好味嫁, 仲有就係d生菜絲, 湯同飯都係免費任添o既, 真係唔錯<見Day4相簿DSC06160 - DSC06168>。

食完晚餐, 八點幾伊勢丹好多舖頭都收o左lu, 冇得行街, 於是就周圍影相, 伊勢丹有棵好大o既聖誕樹, 聖誕樹前面就係一條好長好闊o既樓梯, 條樓梯直通伊勢丹各層, 就我地所見有好多年青人坐o係樓梯上吹水/談心。不過其實夜晚o黎o度好大風, 好凍…我地o係o度影o左陣相, 之後就行位於10樓好恐怖o既”空中徑路”喇, Skyway係一條好長o既行人通道, 可以由伊勢丹o既一邊一直行去另一邊o既Theatre Hotel, 其實有d似沙田新城市廣場新起果d 電梯咁, 但呢條就高好多同埋長好多, 同埋只係行人通道o黎。開頭都驚驚地嫁, 不過行行o下又冇咩, 加上整o左d聖誕裝飾,又幾浪漫喎。仲有Skyway可以睇到京都全境架, 不過由於我地夜晚去, 所以睇唔到d咩。我地行完Skyway, 正想set腳架再影相o既時候, 點知個腳架竟然爛左, 仲自動解體添, 真係黑仔呀。

去完伊勢丹已經9點幾lu,返酒店之前我地去o左車站附近o既郵局買郵票, 原來日本d郵局咁夜都仲有職員當值嫁喎<我地去o個間好似通宵都有人架>, 又幾好喎, 人地d百貨公司八點就全部收舖, 反而d郵局夜一夜都有人, 原來日本最勤力係d郵差~~哈哈。由日本寄postcard返香港每張70yen, 買完郵票就返酒店寫postcard比朋友仔lu, 希望佢地鍾意啦 。