Mainly by pigfong

今日行程好緊密, 一早七點幾起身, 快快check-out同埋寄存d行李響酒店之後就起程喇, 首先去o左琴日買郵票o既郵局寄左d postcard, 跟住就去巴士站琴日買pass o個個”総合バス案内所”再買多兩張一日pass準備今日稍後時間用。個”総合バス案内所”有個小食o既counter, 於是我地買o左d麵包上車食。

今日第一個目的地係去搭嵯峨野小火車。嵯峨野小火車係一輛行駛亀岡站同嵯峨野站之間, 專門俾乘客欣賞沿途風景o既火車。小火車主要會沿住保津川而行, 坐o係小火車入面就可以欣賞到保津峽同保津川o既景色…每年一到o左紅葉季節就會有好多人前往乘搭小火車, 欣賞一下保津峽滿山紅葉o既美景。

我地第一日已經響大阪站買左9:56分響龜岡開出o既嵯峨野小火車車票, 仲諗好左搭8:23響京都站開出o既JR山陰本線去[馬堀], 不過我地早左少少, 八點鐘就已經到達月台, 仲以為可以搭早一班8:05開出o既車添, 奈何咁o岩又係上班上學時間, 去到o既時候已經有勁多人擁o左上車, 不過又見到車箱中間其實仲有好多空位的, d人又唔肯企入d, 咁唯有等返8:23果班啦, 呢一次係深深感受到原來日本人都會咁衰嫁。

其實要搭嵯峨野小火車除o左o係龜岡出發, 亦可以選擇於嵯峨野出發。如果想搭埋o個個激流船遊保津川o既話, 其實由嵯峨野出發會比較方便, 因為由嵯峨野出發, 去到龜岡站之後就可以乘激流船返回嵯峨野, 跟住就可以順路遊覽天龍寺, 渡月橋一帶, 時間上會比較易控制。不過由於我地冇打算坐激流船, 加上之前參考各網友o既意見, 由嵯峨野站出發會比較多人, 於是最終決定由龜岡出發。要注意o既係由京都站去小火車o既龜岡站, 係要o係JR馬堀站落車, 而唔係JR龜岡站!!!

搭o左大概35分鐘JR, 大約9:00就到達馬堀站喇, 馬堀站好細, 一出站就好似去o左郊區咁, 附近全部都係一d農田同埋一d矮屋仔, 氣溫比京站一帶還凍。行o左10分鐘左右就到嵯峨野小火車o既龜岡站喇, 站隔離有間地道手信舖, 舖頭隔離有幾個好攪笑o既稻草人公仔<見Day5相簿DSC06216, DSC06218>, 而看舖果個嬸嬸就好熱情咁叫我試o下佢d黑豆茶, 原來o個頭<丹波>o既名產就係黑豆…飲左之後成個人都暖晒。

攪完一輪之後就上去車站lu, 果度都有d手信舖, 有好多限定版Hello Kitty紀念品同埋用黑豆整o既食物, 不過睇落好似冇咩o岩買。我地睇左一陣之後就上去月台, 果度有個有暖氣o既等候室比人等車, 又幾細心喎。由於時候尚早, 冇咩人等車, 不過等等o下慢慢就有一團一團o既日本人o黎喇, 大多數都係d上o左年紀o既公公婆婆, 日本d公公婆婆都幾開心丫, 成日都見到佢地一班人咁周圍觀光~~~等左好一陣子架火車就到lu, 首先落車o既竟然係一個打份成日本妖怪o既職員, 佢係負責o係車上攪氣氛o既, 真係好好笑。

之前響網上都見過小火車o既相, 家陣終於可以近距離見到lu, 真係幾有特色呢,  架火車就好似香港舊時d火車咁, d窗可以打開, 同埋唔多覺有暖氣, 小火車o既第5卡係特別車卡, 第5卡好開揚, 車頂用玻璃建造, 冇窗, 所以坐這一卡欣賞風景會特別有風味, 不過可能係大風個風~~哈!!! 我地本來都想坐第5卡架, 不過第5卡o既車票只係乘車當日先有得賣, 而且落雨o既話第5出卡就會唔開, 再加上紅葉旺季, 我地怕當日先買o既話會買唔到, 所以都係一早o係大阪站綠色窗口買定其他車卡o既飛。

我地今次買左第4卡中段左手面o既坐位, 原因係由龜岡出發, 火車左手邊見到保津川o既時間會比較多, 所以估計景色會比較好。擾攘一輪後終於都開車喇, 沿途見到好多紅葉, 車長好似會沿途介紹架, 不過又係唔識聽!!! 由火車向下望大部分時間可以見到保津川, 間唔中仲會見到果d 激流船添, 船上同小火車上o既人亦會互相揮手, 好有趣。我地又越過高山又越過谷, 中途o個個日本妖怪又會行來行去, 車長仲o係o度唱歌攪氣氛呢, 再加埋d紅葉同銀杏美景, 真係好靚。

經過半個鐘o既旅程, 終於去到嵯峨野喇, 我地一落車就衝去車頭度影相, 影影下仲企埋上車頭添, hehe。嵯峨野比馬崛熱鬧得多, 附近有好多矮屋仔, 我地影完火車頭之後o係車站入面o既手信舖買o左d手信, 跟住就離開車站喇。小火車嵯峨野站隔離正正就係JR嵯峨嵐山站, 如果冇打算去渡月橋一帶o既話就可以o係o度搭車走人, 而我地就當然係去附近睇埋紅葉先回程啦, 所以我地下一個目的地就係天龍寺喇。由嵯峨野站跟住d指示行左大約十幾分鐘就到達天龍寺喇, 我地未入去天龍寺, 就咁o係佢入口附近d庭園就已經見到好多紅葉喇。於是我地再次以龜速前進…影o左一輪相之後去到天龍寺門口, 見入面好似冇咩睇咁, 原本諗住慳返d錢唔入去o既, 於是就用手上o既地圖搵o下點去下一個景點 – 竹林喇。不過之後問人先知原來去竹林o既捷徑就響天龍寺入面, 要去o既話就要入天龍寺, 如果唔係就要兜大圈至去到呢, 咁唯有乖乖俾錢入場啦, 入到去真係無乜野睇, 都係d庭園, 水池, 寺廟咁啦, 不過都有d紅葉o既, o係入面行下行下, 好快就到另一個出口, 我地沿住d指示行, 冇幾耐就到o左好出名o既竹林喇, o個o度有好多好高o既竹, 雖然外面幾猛太陽, 不過響竹林入面反而係陰陰暗暗, 涼涼地咁, 幾舒服, 行行o下覺得有d”英雄”feel添。

出左竹林之後再跟住d指示行, 好快就去到渡月橋, 行呢段路都幾舒服, 沿路有指示牌標明距離渡月橋有幾遠, 就好似響香港行山時見到果d牌咁, 沿途都見到好多好靚o既紅葉, 有d紅到有d假添呀, 行下行下就出返河邊喇, 即係搭小火車時見到激流船果條保津川, 玩激流d人就係響度落船嫁喇。我地出返河邊之後離遠已經見到渡月橋, 我地沿住河邊行, 一路都有d餐廳同埋食檔, 不過睇落d餐廳都唔平架bor。另外仲有好多人力車, 即係好似天星碼頭o個d咁, 俾車夫帶你遊覽附近o既景色…就響o黎個時候, 竟然俾我地響度見到兩個藝妓搭呢d人力車呢, 都係第一次見到咋, 不過我地見o個兩個個樣好似咁邪惡咁o既<見Day5相簿DSC06368>。再行就到渡月橋喇, 條橋本身冇咩特別, 都係行車同行人, 不過個景就幾靚, 一路過橋o既時候都可以望到遠處o既山頭大部分都係紅葉, 可惜當時有d霧, 睇得唔係好清楚。過左渡月橋之後就係嵐山公園, 不過個公園似乎係一眼睇晒, 冇咩特別。另外仲有d賣手信o既小店, 不過唔多, 所以我地好快就過返渡月橋返轉頭喇。

過返橋之後就o黎o度一條幾熱鬧o既街, 兩旁都有好多精品店/手信舖同餐廳, 我地就o係o黎o度搵左間旅遊書介紹o既食店食左個燒餅, 都幾好味丫<見Day5相簿DSC063688- DSC06389>。食飽之後就起程去金閣寺喇, 我地沿住之前條街繼續行, 好快就到達京福電鉄o既嵐山站, 之前睇網友o既遊記知道o黎個站o既月台有d特別, 就係有個地方可以一邊浸腳一邊等車<見Day5相簿DSC06393>, 真係冇諗過可以浸住腳等車呀!!! 原本仲諗住試下o既, 但咁o岩有車所以無緣一試lu。我地搭o既京福嵐山線d火車好細架, 得一個車卡嫁咋, 好地道<見Day5相簿DSC06392>, 落車o既時候先俾錢, 而我地之前買o左rainbow card亦都可以o係o度用。我地原本有位坐嫁, 不過後來讓座比一對老夫婦, 都好丫, 可以企近車頭睇風景, 沿途有好多叮噹屋, 不過架火車咁近d屋, 咁住o係入面d人咪好慘lor!? 我地搭o左好多個站, 其間要o係一個” 帷子ノ辻”站轉車, 大約半個鐘就到達”北野白梅町”站喇, 出站之後就搭205號巴士去金閣寺, d巴士站好得意嫁, 佢d 牌會show到下班車去到邊, 咁你就知道大概要等幾耐至有車喇, 不過我地之後試過見到顯示話架車仲有2個站就到, 點知等等下唔見左呢, 真係奇怪。

上車之後好快就到金閣寺lu, 過程相當順利。我地落車之後都係跟住d人同指示行, 沿途兩旁都係紅葉~~行o左冇耐就入去金閣寺喇, 金閣寺真係好金光閃閃好特出, 不過我地只可以遠觀, 因為係唔可以入去嫁, 咁唯有影多幾張相啦, 可惜去到o既時候天色有d陰暗, 冇咩太陽, 所以令到金閣寺有點兒失色。金閣寺係一個非常熱門o既旅遊景點, 勁多人呀, o係門口就已經見到好多學生團/旅行團不斷擁入, 有好多都係唔知台灣定大陸團, 攪到要爭位影相, 最唔開心o既係想影張合照, 點知搵左幾個人幫我地影都影得唔靚呢, 真係唔開心呀。影完相之後就慢慢順住路咁行, 其間仲有少許山路添, 臨近出口有d賣手信o既舖頭, 有d仲有得試食呢, 有隻類似糖不甩o既物體, 加d芝麻醬一齊食都幾好味嫁, 另外仲有d類似o者喱狀o既野, 佢地會切開一舊舊掉入d粉度”吉”o黎 食, 味道都ok o既, 不過拎落都幾重, 所以冇買返香港, 就係咁我地試食o左人地好多野, 最終都係無幫襯就走喇。

離開金閣寺之後就搭返巴士返京都站lu, 返到京都站都係四點幾, 之後就返酒店拎返d行李, 再搭JR返大阪喇, 未到六點就已經返到大阪, o黎緊兩晚我地會住響package包o既”大阪第一”酒店, 大阪第一都幾近JR大阪站,響大阪站o既地下街一出就到, 房間方面都係幾細, 不過已經大過Toyoko Inn o個d, 我地間房仲係對住sky building添, 夜晚望過去都幾靚架。仲有就係”大阪第一”o既地庫都有好多食店, 其中一間旅遊書都有介紹, 可以自己整八爪魚丸o既, 可惜最終都無時間去食呢。

Check-in完, 放低行李之後又出再次出動, 首先去左Yodobashi, Yodobashi係一間有十幾層高, 出名賣電器o既百貨公司, 不過除o左電器之後仲有好多其他o野, 好似服裝, 餐廳, 雜貨等, 而我地上去o既目的係睇玩具, 上面都幾多玩具嫁, 仲比我地搵到怪誕城 Uno同埋龍貓啤牌, 價錢仲唔貴添<副怪誕城 Uno比香港平幾十蚊!!!>, 好野。我地都係行o左一陣Yodobashi, 跟住就去Sky Building 食飯同睇夜景, 不過Sky Building離梅田幾遠嫁, Yodobashi後面有條地下行人通道, 差唔多有四百米長, 而條地道o既入口都有d難搵呢。

過o左條地道之後就係Sky Building喇, 去到首先係去搵o野食, Sky Building地庫有個叫”瀧見小路”o既地方, 環境有d似東京台場商店街咁, 好懷舊, 而我地o既目標係一間旅遊書介紹o既燒餅店, 間小店完全唔起眼<招牌及門口見Day5相簿DSC06491, DSC06496>, 門關上, 又無menu擺出o黎, o係出面睇仲以為收o左舖添, 攪到我地搵左好一陣子至搵到, 入去先知原來入面好多人嫁, 間舖其實好細間, 不過就非常熱鬧, 裝修亦好懷舊。由於人多, 我地等左一陣至有位呢, 果度個老闆好好人架, 一入去佢知我地係遊客就問我地o係邊o度o黎, 見我地第一次去幫襯, 就幫我地order左一個燒餅同一個炒麵, 夾埋都係1580yen。眼見佢同其他客人都有講有笑, 大家都食得好開心。等o左一陣, 佢地煮好之後就放響我地檯面o既鐵板度, 由我地自己用鏟仔分o黎食, 都幾得意嫁。雖然唔知個燒餅同炒麵有d咩材料, 但兩個都好好食呢, 唔怪之得不斷都有人入來幫襯啦, 我地食完走o既時候老闆仲專登走過o黎同我地講o野, 仲送埋我地食燒餅個鏟仔俾我地做留念, 更千叮萬囑我地唔好hand carry上機, 要寄倉, 真係好攪笑呢。到出o左門口佢都仲同我地講多句 : “You’ll be back, right?” 哈哈, “Sure!!!”, o黎間燒餅店真係強烈推介呀~~~

食完感動燒餅後就上空中庭園展望台喇, 俾完入場費, 搭完lift, 之後就要上一條好長o既扶手電梯, 即係睇相時見到果兩條凌空o既電梯呢, 搭o既時候都有少少驚, 話晒都係響半空嘛, 上到去見到有個模型, 有好多用紙整o既公仔同場景, 好似話係模擬以前道頓崛o既情景o黎整嫁,d手工真係好仔細, 可以話係嘆為觀止。再上一層就係室內o既展望亭喇, o黎o度其實已經可以睇到晒大阪o既夜景, 不過始終有玻璃隔住梗係冇咁清楚啦, 於是就上多一層, 去到最頂o既室外展望亭喇,今次都係第一次上去一個室外o既展望台, 因為大多數展望台都係室內的…我地好幸運, 今晚個天非常清, 可以望到好遠o既景色, 我地仲望到大阪城呢, 不過上面都幾大風幾凍, 見到佢地有d保安要企o係上面當值, 都咪話唔辛苦。大阪o既夜景五光十色, 高樓大廈眾多, 比起京都o既夜景的確係精彩好多。

睇完夜景之後已經差唔多十點, 之後就再一次穿過之前條地道, 再慢慢行返酒店休息lu。