By pigfong & darkside

今朝照舊七點幾就起身喇, 天氣唔錯, 響房度望出去個view幾靚。梳洗完畢後就落去大堂度享受我地o既早餐喇, 成個旅程入面, 得呢兩日叫做有個正正式式o既酒店早餐咋, 原本都無乜期望o既, 點知又唔錯喎, 一入到餐廳就見到有好多野食, 有西式同日式, 有沙律, 麵包, 多士, 蛋, 腸仔, 粥等等, 最攪笑o既係有咖喱飯囉, d野食都幾好味嫁, 所以唔覺唔覺食多o左添。仲有一邊食一路都聽到周圍有人講廣東話, 大阪第一都好多香港人同旅行社團住…

食飽就要開始我地緊湊o既行程喇, 第一站係大阪城, 我地響[大阪]站搭[JR大阪環状線外回り], 大約10分鐘左右就到[大阪城公園]站喇, 出站之後就沿住條河行, 路旁有d銀杏樹, 再加d落葉, 周圍都係黃色, 都幾靚嫁, 行下行下過左個類似棒球場o既物體轉彎過多條橋就進入大阪城o既庭園範圍喇<見Day6相簿DSC06628>, 大阪城唔似姬路城咁要兜成半個鐘至到城堡門口, 我地行左幾分鐘已經成座大阪城響我地面前喇。大阪城非常之現代化, o係佢o既左邊已經係一座電梯可以上去城入面<見Day6相簿DSC06654>!!! 其實大阪城外觀都幾靚o既, 顏色比姬路城鮮艷, 不過同姬路城比就冇o左果種原汁原味o既感覺, 同埋大阪城細過姬路城好多。

其他人講得冇錯, 去完姬路城之後真係可以唔去大阪城, 佢地實在分別太大喇!!!不過其實大阪城附近d景色都唔錯架, 大阪城公園都幾大, 周圍都有好多銀杏樹, 我地就係因為o黎個原因所以點都要專登去一去~~由於我地對大阪城o既歷史同埋內部無乜興趣, 所以無入到去參觀, 我地只係響外圍影o左幾張”到此一遊”相就算喇。大阪城隔離都有d手信舖, 不過唔多, 我地影完相就入d手信舖行喇, 響門口仲見到有d日本仔<學生>”裝”d女學生裙底添呀, 真係好變態呀, 可惜影唔到佢地d罪証呢。

行完d手信舖之後就離開喇, 我地由大阪城o既另一邊行返出去, 中途見到條類似護城河o既物體, 個view幾靚嫁, 過左河之後就去到一個公園, 我地估計係大阪城公園o黎, 呢度有個噴水池, 附近有唔少露宿者, 佢地d帳篷就響d樹林入面, 真係唔細心d都發現唔到呢, 不過d帳篷全部都係藍色o既, 唔通係有人派o既!? 另外我地咁岩又見到有人餵白鴿, 又一個唔驚禽流感o既大叔!! <見Day6相簿CIMG2349, CIMG2350>

行左無幾耐就到[森ノ宮]站喇, 由於時間尚早, 我地決定去天神橋筋六丁目度行下, 由[森ノ宮] 站搭[大阪市営中央線]去[堺筋本町]再轉[大阪市営堺筋線], 大約15分鐘就到達[天神橋筋六丁目]站喇。天神橋筋就好似心齋橋筋咁, 係一條有蓋o既商店街, 不過天神橋筋就長得多喇, 佢係日本最長o既商店街, 基本上係冇可能睇到尾的<見Day6相簿DSC06682>。我地一心諗住o係天神橋筋會買到好多手信, 點知原來係無咩好行嫁, 舖頭雖然係多, 不過d舖頭比較街坊, 可以買o既手信唔多, 而且好似冇咩人行, 唔通因為時間仲早!? 我地行行下見到有間專賣鰻魚o既食店, 佢有個鰻魚玉子好似幾好味, 於是就買o黎食啦<525yen>, 點知唔食由自可, 一食就把鬼火, 原來舊玉子係凍嫁, 同埋平時d玉子甜甜地架嘛, o黎舊就冇咩味o既, 可能佢係俾d人買返屋企叮返熱o黎食啦~~哈哈!! 仲有就係我地本來想企響佢門口食, 點知d店員竟然唔俾喎, 今時今日咁o既服務態度真係唔得呀 <見Day6相簿DSC06685, DSC06686>! 食完鰻魚玉子之後就繼續行, 行行o下又見到有mister donut, 咁o岩黎緊幾日有promotion, 大部分donut都特價100yen, 雖然食完玉子飽飽地, 但係都係忍唔到口買o左o黎食~~~

我地o係天神橋筋行到差唔多十二點, 跟住就由[南森町]站搭[大阪市営堺筋線]去[堺筋本町]站, 再轉[大阪市営中央線]去[大阪港]站喇。

[大阪港]站即係我地下個目的地 - 海遊館o既所在地, 我地落車之後沿住d指示行, 冇幾耐就見到大大個摩天輪喇, o黎個摩天輪好似話係全世界最大架喎, 不過我地冇上去玩, 因為覺得好似冇咩特別咁, 咪又係摩天輪一個, 反而覺得東京台場同神戶港o個兩個仲靚d, 因為o個兩個夜晚會不停變色同埋有好多圖案, 而大阪港o黎個就只係清一色綠色, 完全冇變化<見Day6相簿DSC06852>。

我地經過o左摩天輪, 隔離就係一個商場, 叫” Market Place”, o黎個商場都幾大幾多o野行o既, 好多舖頭都係賣紀念品同手信的, 而入面仲有一條叫"なにわ食いしんぼ横丁"o既食街, 好多o野食架。

Market Place再過就係一座藍色襯紅色, 頂層全部都係玻璃窗o既建築物, o黎座就係海遊館喇!!! 我地俾o左每位2000yen o既入場費之後就入去喇。海遊館大約有8層, 有好多唔同o既區域/水族箱, 由於佢係以螺旋式o既設計, 所以一入去首先就要搭lift上到頂樓, 之後就慢慢打圈咁行返落地下。

上到頂樓首先到達o左一個叫”日本森林”o既地區, 入面就好似一個熱帶雨林咁, 有花有草有樹有水, 響o黎o度可以睇到d o係水上生活o既動物, 行下行下就會到唔同o既區域, 亦會見到唔同o既動物, 好似海獺,企鵝咁。其中最想睇o既就係企鵝, 之前睇o左o個套<Emperor Journey>, d皇帝企鵝真係好靚好型, 仲好肥添!!!仲有十二月中天氣凍d海遊館就會搬d企鵝出室外架, 咁就可以好近咁見到佢地, 可惜我地去o個陣時間尚早, 冇得睇…

由頂層一路兜圈行, 慢慢就會見到水底世界, 其實我地主要都係圍住個好大好大o既水族箱行, 水族箱入面有好多魚, 例如鲸鯊啦, 魔鬼魚啦, 同埋好多唔知係咩o既魚, 最覺笑係入面連聖誕老人都有!!! 其實係聖誕期間d職員扮o黎搞氣氛o既o者~~

除o左中間o個個主水族箱之外, 其實o係側邊都有好多水族箱, o黎d水族箱有d係連住上面d企鵝/海獺o個d地方架, 即係你都可以見到d企鵝/海獺o係水中游水o既情況, 而每兜一個圈就落深d, 所以淨係企鵝都可以睇幾次。另外仲有我想睇好耐o既翻車魚, 不過得一條, 仲要係自己一條俾人困住o係個缸入面游o黎游去, 有d慘…佢個外形真係好奇特呢。除o左魚之外, 入面都有d其他海洋生物架, 好似有海龜, 長腳蟹, 水母等等, 其中o係長腳蟹個缸入面有隻長腳蟹零零舍舍大過其他好多架, 初時仲以為係假o既添, 睇睇o下先發現原來識郁架, 真係大得好可怕!!! 至於個水母館都好值得睇, 成part都係水母, 睇完先知原來水母有咁多唔同o既品種, 有d形態好靚。

另外海遊館同其他博物館一樣, 會有d特別展覽, 我地去o個陣就有個展覽係講鯊魚o既,可惜我地冇咩興趣丫, 反而期望睇o既”海天使”就冇得睇…海天使好似都係期間限定的。總括o黎講海遊館真係幾多o野睇, 同埋幾值得去o既。
我地行o左兩個幾鐘, 行埋入面間頗大o既手信舖, 三點幾就去隔離o既Market Place搵o野食喇。之前提過o個條"なにわ食いしんぼ横丁"o既食街<見Day6相簿DSC06832>, 有好多o野食, 就好似sky building o既"瀧見小路"咁, 裝修到好似d舊街咁。我地一早就搵o左d資料, mark定o左幾間食店, 最終試o左兩間, 分別叫"北極星"同"自由軒"。

首先係"北極星"<見Day6相簿DSC06817>, 佢出名食蛋包飯, 有好多款唔同o既蛋包飯供選擇, 我地就是但叫o左個似係最經典o既蛋包飯餐share o黎食, 個餐除o左蛋包飯之外仲有炸蝦同布丁, 都只係890yen, 幾抵架。蛋包飯食過好多次, 不過好多次都係睇就好似好好味咁, 食落就完全唔掂…今次"北極星"o黎個就唔同喇, 賣相已經唔錯<見Day6相簿DSC06814>, 而且味道都相當滿意, 雖然個蛋包飯入面冇咩得別材料, 不過食落又幾好味喎, 至少佢真係用d蛋包住d飯, 唔似好多地方咁只係用蛋皮蓋住d飯。

食完美味o既蛋包飯之後就再去另一間叫"自由軒"<見Day6相簿DSC06831>o既食店食咖哩炒飯喇。佢個咖哩炒飯好似係好出名架<735yen>, 咁就當然唔可以放過啦。同之前一樣, 兩個人share, 個咖哩炒飯本身已經濕濕地, 上面再加一隻生雞蛋<見Day6相簿DSC06826>, 所以食落其實好”lim”, 有d似食緊糊仔咁, 哈!!! 味道都唔錯o既, 不過其實都幾辣, 同埋咖哩味唔係好香, 所以覺得都係蛋包飯好味d!!!

食完兩餐之後, 跟住就行Market Place入面d舖頭喇。感覺都幾多o野行, 雖然好多都係賣o野食o既手信舖, 不過o黎d就正合我地o既心意~~~另外入面有間有好多龍貓o野賣o既舖頭, 喜歡o既朋友不防睇o下<見Day6相簿DSC06834- DSC06837>。此外入面又有間sega夾公仔舖, d公仔又係幾易夾架。

我地o係Market Place入面逗留到5:00先離開, 出o黎o既時候已經天黑lu, 又係影夜影o既時候喇。海遊館門口有棵聖誕樹, 只係用d燈砌成, 朝早睇冇咩特別, 不過夜晚著o左燈, 簡簡單單, 又幾靚喎<見Day6相簿DSC06839- DSC06850>~~我地o係o度影o左陣海遊館同摩天輪之後就走lu。

六點未夠, 我地今日plan o左o既地方已經去晒喇, 於是我地就決定返難波一帶再行過。由[大阪港]站搭[大阪市営中央線]去到[本町]站, 再轉[大阪市営御堂筋線], 大約半個鐘就去到[なんば], 即係難波站喇。我地由[なんば]站向返心齋橋方向行, 其間經過一間叫”北極”o既舖頭<見Day6相簿DSC06858>, d旅遊書介紹佢d雪條好好味, 於是我地又買o黎食, um…都ok o既, 幾滑丫, 不過唔係特別好味咋bor…反而我覺得佢d大判燒好正, 有紅豆同似係奶皇味, 兩樣都咁好味, 只係70yen一個, 平靚正<見Day7相簿DSC06951>!!!

食完雪條同大判燒, 之後行行o下又行返去第一晚去過o既道頓崛筋, 由於第一晚行o既時候好多舖頭都收o左lu, 今日趁仲早<~7:00>, 梗係行返夠本啦。行o下東行o下西, 影o下相, 又買o左d手信, 仲有夾公仔, 直到差唔多9:00, 又未肚餓, 於是決定返[梅田]先搵o野食。

我地由[心齋橋]站搭[大阪市営御堂筋線]返去[梅田], 今次終於都搵到”新梅田食堂街”喇, 原來就o係第二晚食拉麵o個條街附近。”新梅田食堂街”果然係勁多o野食, 而且唔只一層添, 全部都係d極之地道, 細細間o既食店, 但係好多都係”立食”架, 即係企o係o度食law, 我地行o左成日咁累梗係唔制啦。行o左一陣, 雖然好想試o下o黎d地道o野, 不過又覺得冇咩o岩食,最終都係返番去第二晚食拉麵o個條街搵o野食。我地是但搵o左間平民o野, 好似吉野家咁, 是但叫o左一個滑蛋豬扒飯同一個牛肉定食<見Day6相簿DSC06868, DSC06869>, 夾埋都係1270yen, 味道又唔錯bor, 眼見都幾多人食架, 不過冇記低間舖個名添。

食完飯之後就返酒店lu, 今日係旅程o既最後一晚, 一如以往, 我地又拎晒咁多日o既戰利品出o黎影相, 之前一路買o既時候仲覺得買o左好多o野添, 點知舖晒出o黎又好似唔係好多咋bor, 仲要係大部分都係o野食同夾返o黎o既公仔, 真係失禮喇~~~~~~~<見Day6相簿DSC06874-DSC06878>, 影完相就訓了。