今日係旅程o既最後一日, 朝早七點半起身,梳洗過後就落去食早餐喇, 感覺上大阪第一都幾多香港人住, 仲有唔少係旅行團添。食完豐富o既早餐之後就返房收拾行李, 跟住就check-out喇。

今日其實冇咩景點, 活動範圍主要都係難波一帶。由於最終我地會由難波站搭南海電鐵去機場, 所以Check-Out之後首要目標就係去難波站放抵d行李o係locker。我地由[梅田]站搭[大阪市営御堂筋線]去到[なんば]站落車, 亦即係難波站。難波站有唔少locker, 大中小size任君選擇, 我地一人一個中o既locker, 每個一日要500yen, 要入100yen coin架, 我地就係因為冇100yen coin所以要去附近d舖頭唱。

放好行李之後就出發去第一個目的地 - 道具屋筋, 我地由難波city那邊的出口出去, 好快差唔多10:00就到達道具屋筋喇。道具屋筋其實都係一條商店街, 不過主要買o既係d餐廳o既用品, 例如有刀刀叉叉, 定食用o既盤, 招牌, 就連八瓜魚丸機都有得賣。除o左餐廳用品之外仲有d賣o野食o既乾貨舖, 都有d手信賣o既。雖然我地唔會買o個d餐廳用品返香港, 不過睇o下都幾得意丫, 我地仲見到前日燒餅舖老闆送俾我地o既燒餅剷賣添。

我地o係道具屋筋行o左大約半個鐘, 之後就去附近o既黑門市場喇。黑門市場其實即係一個街市, 即係賣d街市賣o既o野, 有菜有魚有生果有零食。黑門市場有d似東京o既築地市場咁, 不過築地市場主要賣海產, 黑門市場就咩都有。值得一提o既係黑門市場d零食舖頭幾平, 我地之前o係道頓崛筋買o左包tiramisu朱古力, 523yen, 不過o係黑門市場買就平差唔多一半。另外黑門市場亦有幾間supermarket, d生果都幾平, 我地就買o左盒士多啤梨, 498yen, 好甜, 好味!!!

我地o係黑門市場兜o左個圈, o個o度有間壽司店叫”壽惠廣”, 上網都見有人推介過, 於是就入去食喇<見Day7相簿DSC06907>, 入去o既時候佢地o岩o岩開門, 入面有兩個師傅同一個waitress, 不過佢地就好似唔多理我地咁, 睇o左一輪, 最終我地只係share o左一個最平o既set<見Day7相簿DSC06904-DSC06906>, d壽司係普通款式, 就連味道都係一般, 唔係十分新鮮, 冇咩驚喜, 同上年去築地市場食o既壽司清簡直係兩回事, 仲諗住可以重拾返o個種味道添~~~所以o黎間”壽惠廣”唔係咁推介。

食完一餐普遍o既壽司餐, 跟住就繼續我地o既行程喇, 下一站係Den Den Town, 我地一邊行一邊食住之前買o個盒士多啤梨, 冇耐就到達Den Den Town喇。Den Den Town位於日本橋, 就好似秋葉原咁, Den Den Town有各式各樣o既AV產品, 玩具同動漫o野賣。我地今次o既目的就係玩具/扭蛋。之前o係一個講玩具o既forum見到有人好詳細咁介紹Den Den Town o既玩具舖, 於是我地就跟住o個d介紹行喇。去到Den Den Town o既時候未夠十二點, 行o既人唔多, 亦好似唔係好多o野睇咁, 不過價錢方面平過其他地方, 就好似之前o係Yodobashi買o左排AA叉電, 16xx yen, 點知o係Den Den Town見到只係賣13xx yen, 即係平o左300yen。另外仲買o左隻小木偶o既SMILE SNAP figure, o係香港買最平都要百幾二百蚊, 點知o係Den Den Town見到, 760yen!!! 即係大約$50港紙, 平咁多, 即買!!!

不過行完Den Den Town覺得似乎都係秋葉原熱鬧d, 秋葉原賣d o野比較新d, 舖頭多d密集d, 而Den Den Town就比較平民化d, 似係d街坊舖多d~~

我地沿住Den Den Town一直向住惠美須町站行, 準備由惠美須町搭車返心齋橋喇。去到惠美須町站, 離遠見到有座好熟口面o既塔, o係人地d相簿o度間唔中都會見到的, 叫通天閣。通天閣不在我們的行程之內, 不過竟然咁o岩見到, 點都要過去行行, 影o下相都好丫。通天閣都算係大阪o既地標之一, 塔頂可供遊客上去觀光。據聞以前通天閣一帶非常熱鬧, 不過而家已經變得有d冷清。到達o既時候已經差唔多一點, 不過通天閣一帶o既舖頭/食肆好多都未開, 而離遠睇o既通天閣似乎有點殘舊, 所以我地只係o係o個o度逗留o左幾分鐘, 影o左幾張相就起程返心齋橋喇。

我地由[恵美須町]站搭[大阪市営堺筋線]去到[長堀橋]站, 再轉[大阪市営長堀鶴見緑地線]就可以返到[心斎橋]站。由於我地想去o既景點都已經去晒, 於是就打算再一次由心齋橋行去難波, 作最後沖刺。日頭o既心齋橋同夜晚冇咩分別, 就好似旺角咁, 一樣咁多人。由於我地已經行過兩次, 所以已經冇咩好睇lu, 不過亦不忘再一次去sega夾公仔舖, 夾o左隻mickey mouse俾朋友做手信, sega d staff真係好好人, 幫我地擺個靚位之餘仲教埋我地點夾添!!! 不知不覺又行返去道頓崛筋, 第一日經過道頓崛筋見到間四天王拉麵, 當時已經想試, 今日最後一日, 當然唔會放過o黎個機會啦!!! 我地諗都冇諗就入o左去喇, 我地叫o左兩個叉燒拉麵, 價錢唔同, 其中一個同個店名一樣, 叫”四天王”, 大概係招牌拉麵啦, 不過其實都唔知有咩分別<見Day7相簿DSC06936>。好快就有得食喇, d網友果然冇介紹錯, 兩個拉麵都好好味, 雖然個”四天王”比較濃味, 不過日本拉麵係咁架啦, 都接受到丫。另外佢仲有d 拉麵set, 好抵, 800yen就有一個拉麵再加一個炒飯/白飯之類<見Day7相簿DSC06940>, 初時仲以為個拉麵會細d, 點知見人食, 個拉麵o既size係冇分別, 個飯都唔細, 真係兩個人都夠食。

食完四天王之後就差唔多時候要去機場喇,期間經過御堂筋o個條大馬路, 馬路兩旁長滿銀杏, 望落去成條路都係黃色, 其實之前睇紅葉情報見d相已經覺得好靚, 不過前兩次o黎o既時候都係夜晚, 一直都唔係好知o係邊, 今日竟然俾我地臨走之前見到, 真開心<見Day7相簿DSC06944 - DSC06947>。仲有, 雖然頭先食完拉麵有d飽, 不過臨搭車前經過琴日o個間”北極”o既時候, 點都要食多次佢o既大判燒先肯走, 真係平靚正呀<見Day7相簿DSC06951>!!!

食埋大判燒之後就去locker拎返d行李, 跟住就去隔離o既南海難波站搭15:40 o既空港急行去機場lu。大約45分鐘之後我地就到達關西空港喇, check-in晒d行李之後第一時間去拎第一日order o左o既士多啤梨糯米滋, 佢會俾埋d保冷o既雪包你, 都可以頂到o下o既, 仲有就係d士多啤梨糯米滋要即日食架law, 不過唔理啦, 返到香港放o左o係雪櫃幾日先食晒, 都冇變o既。關西機場有四層, 都幾多o野行, 亦有好多食肆, 最重要o既係我地買o既手信大部份都可以o係機場買到, 而且價錢一樣添!!! 由於我地冇咩時間, 所以唯有走馬看花, 買o左少少手信之後就要過關準備上機喇。過關之後都有唔少商店架, 不過冇出面咁多, 同埋出面多數都係賣o野食, 入面就多d其他o野。

跟住就上機離開大阪lu, 我地搭CX0507班機, 準時18:25起飛, 一上機就急不及待食o左粒士多啤梨糯米滋, 真係幾好味bor~~~班機雖然又係combine o左幾班唔同airline o既航班一齊, 不過都唔full, 仲比原定時間早o左返到香港, 大約9:30就到達香港國際機場喇, 亦即係話今次o既大阪•京都•神戶之旅就此結束。

今次終於都可以睇到想睇好耐o既紅葉, 真係好靚好壯觀。不過如果唔係紅葉, 我地可能唔會去京都, 因為對d寺廟, 神社興趣不大。神戶o既夜境相當漂亮, 如果有機會可以用多d時候去多d神戶其他地方。而大阪就絕對可以再去, 單單係梅田, 住o左咁多日都係攪唔清d路, 行極d地方都好似未行過咁, 尤其係個地下街, 真係大得好誇張。仲有夾公仔, 究竟可唔可以當一門生意, 去日本夾d公仔返香港賣呢~~哈哈!!! 總之今次大阪之旅就正啦, 玩得好開心, 亦都超累…

下個目的地希望係…北海道。