darkside :: 泰國布吉之旅 - Phuket Trip :: Day2 遊記 Upload Date:10-29-2007 23:22:47
Viewed:869
  [flash mode: on]default size: [ normal | full ][Exif] 
 www.fotop.net  darkside's album  泰國布吉之旅 - Phuket Trip  泰國布吉之旅 - Phuket Trip   
    1 (of 138) Next Photo Last Photo
Day2 遊記


[leave message] [e-card]


From:   darkside   (Nov 04, 2007 23:00 HKT)

第二天, 今日由於報o左local tour去Phi Phi Island + Egg Island, 所以晨早6:00就起身了, 梳洗完之後就去食早餐喇。Package包早餐, 唔使講都知係buffet型式啦, 食早餐的地方彼大, 分室外同室內, 我諗冇乜幾可坐得滿 <見IMG_2919>, 去到o黎d陽光海灘o既地方, 我地當然又係坐室外啦 <見IMG_2933>。食物方面, 種類都算多, 單是麵包類已經有好多種選擇 <見IMG_2920>, 另外水果, 果汁o個d當然唔少得 <見IMG_2921 ~ IMG_2925>, 最有趣係佢d橙汁係要自己一個個渣的, 不過d橙汁冇咩味的…<見IMG_2926>, 另外佢o既咖啡係即磨的, 都係自助型式, 唔錯 <見IMG_2935 ~ IMG_2936>。 而熱盤方面都係o個d啦, 麵呀, 炒飯, 粥, 香腸, 火腿等等等等。 至於味道方面, 整體o黎講都唔差啦, 環境又唔錯, 員工亦慇勤有禮, 滿意!!

享用完早餐之後就返房拎齊行裝準備今日出島玩啦, 順帶一提, 房入面係有兩條黃色o既沙灘毛巾可以拎出島同海灘用的。8:00 island tour o既van仔就o黎接我地去碼頭喇。 大約45mins就到達一個不知名碼頭喇<之後睇返leaflet先知個碼頭應該係叫 Club Speedboat Rassada Pier, o係phuket town附近的。

去到碼頭由於 要等埋其他車o既團友, 於是我地就影o下相, 坐o下咁啦, 而佢亦都有d飲品, 小食招呼我地。好喇, 等齊人之後今日o既tour guide就開始講解今日o既行程喇, 不嬲都以為tour guide會係當地人添, 點知原來係一個外國人, 似乎是來自澳洲的。 講解完之後就差唔多上船喇, 上船之前各位團友可以租埋fin, 即係蛙鞋<見DSC01190>, 每對100b一日, 對於浮潛o黎講好有用的, 因為可以游快d, 唔驚俾d浪沖去老遠返唔到船...哈哈~~我地兩個人租o左一對。

攪掂晒之後就上船了, 去Phi Phi Island o既tour多數都係分兩種的, 一種係坐快艇, 另一種係坐大船的。 我地當然係揀speedboat啦, 因為快d, 不過亦都貴少少。 去到碼頭o個陣初時我見全團有成50-60人, 碼頭周圍又只見d大船, 仲諗緊我地會唔會俾人騙o左要坐大船添, 不過好彩原來最終都係坐快艇的, 只係d快艇俾d大船遮住晒, 而隻快艇原來又係大型的, 可以坐成55-65人...-_-。

大約9 :00就正式出發喇, 第一個景點係Khai Island, 即係蛋島。 蛋島好近布吉島, 由碼頭出發大約15mins就到。 蛋島好細, 差唔多一眼就可以望晒, 不過雖然細, 但係島上都有餐廳, 又有d檔口賣d手工藝品<見DSC01228 ~ DSC01229>, 另外沙灘上有d沙灘椅, 不過是要俾錢租用的, 好似都係100b, 由於我地只會逗留約一小時, 所以冇必要租用。

蛋島d水都ok清啦, 不過魚唔多, 初時我地o係架speedboat附近玩浮潛, 發覺d水唔多清, 又冇魚, 仲有d失望添, 點知個guide就走o黎叫我地去島o既另一邊, 佢話o個邊多魚好多, 於是我地就過去喇, 原來我地好多團友都一早過晒去喇, 淨得我地o係快艇o個邊玩...真係攪笑~~~o個邊又真係靚d bor, d水清d, 魚又多d<見DSC01254 ~ DSC01258>...不過感覺上蛋島其實唔係太靚, 可能因為太多人去了, 唔多唔少總有點污染。

我地o係蛋島逗留o左差唔多一個鐘, 之後就起程去下一個景點, monkey beach喇。monkey beach其實係o係Phi Phi Island架喇, 所以比較遠, 要半小時有多先到。去到monkey beach一落船就已經有大批馬騮恭候了, 佢地完全唔驚人的, 相反仲好狼, 因為佢如果拎住個袋佢就會以為你有o野食, 可能會走o黎搶的。我地d船員俾o左d香蕉餵佢地食, 而我地就o係側邊影相<見DSC01267 ~ DSC01273>, 其中有一隻馬騮仲好細隻添, 不過佢唔夠其他大馬騮掙啦, 只可以食人地食淨o既o野...<見DSC01274 ~ DSC01277>。

餵完馬騮之後又玩浮潛, monkey beach o既水比蛋島清, 魚亦多好多, 個船員仲用香蕉餵魚添, o個d間條魚似乎真係咩都食...<見DSC01280 ~ DSC01306>。 o係monkey beach逗留o左好短時間, 約半小時之後, 大約十二點又上船去食午飯喇。

食午飯o既地方都係o係Phi Phi Island, o係個叫Loh Dalum Bay o既海灘隔離, o黎個灘都幾差, 好多垃圾同樹枝等雜物, 似乎係因為有酒店o既原因啦...食飯o既地方係o係一間Viewpoint Resort o既酒店隔離, 好似係屬於間resort的。午餐係buffet型式, 種類唔多, 本身對o黎d跟團o既饍食都冇咩期望架啦, 不過o黎餐味道又唔錯bor, 可能曬o既一朝, 食咩都好味~~哈 <見DSC01315 ~ DSC01323>。

食到大約一點, 我地又再次起程去下站, Maya Bay喇。Phi Phi Island其實分開2 part的, 之前monkey beach同午餐o個邊叫Phi Phi Don Island, 而Maya Bay就o係另一邊, 叫Phi Phi Lay Island。 Maya Bay係電影迷幻沙灘o既拍攝場地...都好多年前lor, 而家可能已經冇咁靚。 不過現場所見又真係幾靚, 至少比之前o既蛋島同monkey beach靚, 而且d沙十分幼, 好舒服<見DSC01343 ~ DSC01365>。 另外沙灘上有d長尾船, 可以附費帶你o係附近o既海上遊覽 <見DSC01334 ~ DSC01340>。雖然Maya Bay咁靚, 不過竟然係冇魚的, 真係一條都冇, 所以冇得玩浮潛...真係奇怪。

又大半小時, 約2 :00就去今日最後一個景點喇。最後一個景都係浮潛, 地點好似叫Loh Samah Bay, 都係o係Phi Phi Lay Island的。 o個o度冇沙灘, 只係o係海上面, 不過o個o度d水好清, 是全日最正o既浮潛地方<見DSC01372 ~ DSC01385>。 架快艇一停定, 我地就跳落水喇, o黎o度真係超多魚, 而且種類比其他地方多。 我地早餐o既時候o係酒店拎o左d 麵包, 去到o黎o度就用o黎餵魚喇。 一拎住d麵包, d魚群就會踴埋o黎起勢咁叮, 仲好多時都會叮到手拍添<小小痛, 不過唔會損>...真係有d可怕~~哈哈<見DSC01387 ~ DSC01414>。 我地o係水低影o左好多餵魚相同珊瑚相 <見DSC01425 ~ DSC01435>, 差唔多3點就要離開了, 真係有d唔捨得走...

回程o既時候仲有經過一個叫Viking Cave o既山洞, 個guide話以前可以入去的, 入面有好多燕子巢, 不過自從海嘯之後就唔俾遊客進入了 <見DSC01437 ~ DSC01440>。 回程差唔多一小時, 返到碼頭之後就搭返今朝o既van仔返酒店了。 總括o黎講對於今日o既island tour幾滿意, 個guide同d船員亦好好人, 天氣又好<最緊要>, 玩得好開心。

返到Banthai, 沖完涼之後6點幾就出發去食飯了。出酒店轉右, 返到去酒吧街, 穿過酒吧街見到Jungceylon之後轉左再行約5mins就去到一排大排檔o既地方喇, o黎o度就係好見多香港人鍾意o既99同yoyo所在o既大排檔喇。之前上網見d人話99已經冇之前咁好味, 所以我地決定試yoyo, yoyo個舖位唔大, 亦唔算多人。 我地叫o左一隻龍蝦 <唔係生猛的, 840b>, 芝士汁整, 另外仲有蝦剌身, 青咖哩豬肉同埋通菜。 味道方面, 最好味都係個龍蝦, 雖然唔係生猛的<可以因為九皇節, 似乎周圍都冇新鮮海鮮食...>, 不過用芝士汁整, 亦都非常美味。 另外個蝦剌身同通菜都唔錯, 最唔掂反面係個青咖哩入面d豬肉, 很"鞋"的, 所以我地都係用d青咖哩撈飯算了<見IMG_2955 ~ IMG_2969>。 o黎餐都幾滿意啦, 埋單1320b, 仲有生果送添。

食完晚飯之後又心思思想食雪糕, 於是又行返去Jungceylon食Swensen's喇, 今日食琴日食過o既蘋果紅莓, 另外仲有雪糕窩夫, 好味 <見IMG_2974 ~ IMG_2979>。

食完雪糕, 跟住又沿酒吧街返酒店了, 一到夜晚, 酒吧街又熱鬧起來了, 琴日見d人妖同人影相, 今日我地竟然夠膽走埋去同佢地影, 俾人妖面貼面咁影相...硬係有d唔知點咁~~哈。 影完先知原來要俾錢的, 佢地3個人, 俾o左100b就走人了。 回程沿中見到有香蕉pancake<35b>, 雖然已經好飽, 不過點都要食埋佢先返酒店, 好好味 !!!

9點幾就返到酒店了, 玩o左成日, 累到癲 !!! 即刻沖涼刷牙訓覺啦, 因為聽日又要再戰Island Tour喇~~
    1 (of 138) Next Photo Last Photo
 www.fotop.net  darkside's album  泰國布吉之旅 - Phuket Trip  泰國布吉之旅 - Phuket Trip   
0.946395874023