Viewed:675
|
|||||||||||||||||||||||||||||||||
|
|||||||||||||||||||||||||||||||||
| |||||||||||
| [leave message] [e-card] | 
|
From: darkside (Nov 30, 2007 21:57 HKT) 話咁快就到行程o既第三日喇, 琴日出完島一日已經有少少累, 不過今日繼續, 去另外兩個島, Coral Island + Raya Island。其實plan行程o既時候原本想聽日先join o黎個island tour的, 點知Mr. Chai過佢地只有星期一, 三, 五有o黎個團, 所以我地唯有今日去島, 聽日先city tour啦。 今日同琴日一樣, 都係晨早6點就起身了, 不過今日要執齊晒d行李準備食完早餐check-out, 去完島返o黎就要轉酒店喇。之前好天o左2日, 今日終於都要落雨了, 一起身o既時候已經落大雨, 仲要係好大o個種, 雖然有傘, 但係由房行去酒店lobby都已經濕晒…不過由lobby行去食早餐o既地方都仲有一段路係露天的, 幸好原來酒店係有架高爾夫球車o係雨天時做接送的, 於是我地就即刻跳上車喇, 至少冇咁濕先啦~~ 早餐方面同琴日差唔多啦, 款色都差唔多 <見IMG_3004 ~ IMG_3009>, 最特別4反而係同o左個好得意o既外國BB影相…哈哈<見IMG_3008>。 食到約7:30, 跟住就返房拎齊晒所有行李之後就去check-out喇, d行李寄存o係酒店之餘我地亦問o左酒店可唔可以借埋房入面o既沙灘毛巾俾我地今日出島用, 答案是可以的, 不過check-in時o既按金要還毛巾o既時候退返俾我地, 絕對合理丫, 冇問題~~最緊要有毛巾用… 攪掂晒之後8:00就等車喇, 今日架車竟然遲到, 遲o左15分鐘, 不過佢又唔係要接其他酒店團友所以遲到的, 因為全車人都係住Banthai的, 除o左我地兩人之外就係一行13人o既香港人, 可以約埋咁多人一齊去旅行, 真係難得!!! 差唔多一小時之後就到碼頭喇, 今日上船o既碼頭同琴日唔同, 今日個碼頭o係Chalong Bay, o係布吉島南面的<見DSC01458 ~ DSC01461>。 都係同琴日一樣, 去到碼頭之後等埋其他同團o既團友, 之後又係用100b租o左一對蛙鞋, 跟住就上船喇。上船o既時候仲係落緊雨, 而且今日o係沙灘上船, 要澗水的, 所以一上到船基本上已經濕晒… 大約9:15就開船喇, 落住雨搭快艇, 船頂不斷滴水, 個位又濕透, 真係狼狽得很<見DSC01462 ~ DSC01467>。今日o既行程, 首先第一站係去Coral Island浮潛, Coral Island距離碼頭好近, 大約15mins就到, 到達之後, 都係落緊雨, 又冇太陽, 都幾凍, 點知落水之後…仲凍…。其實完全唔清楚浮潛o既地點係o係Coral Island o既咩位置, 只知o係海中心, 冇得上沙灘, 同埋因為落雨, d水唔清, 又冇咩魚, 所以我地只係玩o左約半個鐘就返上船lu<見DSC01468 ~ DSC01478>。上船之後就有汽水同餅招呼我地, 都ok啦。玩到十點零, 大家就返上船準備去另一個景點喇, 就o係o黎個時候, o依!?好似停o左雨喇喎, 望向遠方仲見到藍天白雲添, 真係開心喇, 初時仲打定輸數諗住全日都會落雨添, 似乎藍天白雲有望喇 <見DSC01494 ~ DSC01497>。 第二個景點都係Coral Island, 轉個灣就到…今次有得上沙灘喇, 不過個沙灘似乎同琴日Egg Island差唔多咋bor, d 水唔係好清之餘珊瑚唔多, 大概係因為沙灘上有好多餐廳, 酒店等等, 人流多o既沙灘自然冇咁靚。 今次我地o係o黎個沙灘要逗留成個鐘, 之後仲要食埋lunch先走…似乎太長時間了…。沙灘上有好多唔同種類o既水上活動可供選擇, 水上電單車, 香蕉船, 潛水等等, 不過我地冇咩興趣, 於是唯有繼續浮潛同行沙灘啦。 o黎個沙灘都幾多魚的, 不過冇琴日咁多款式<見DSC01508 ~ DSC01543>。 我地又用麵包餵o左好耐魚, 之後就行沙灘, 個沙灘都幾大, 有resort之餘仲有d檔口賣d手工藝咁啦, 對我o黎講似乎冇咩行, 都係影o下相好過~~~期間我地個guide又預備o左d水果, 飲品等等招呼團友, 都幾好丫, 只係佢冇咩表情咁長時間o係沙灘上哀坐~~哈哈。 大約十二點就食lunch喇, lunch o既地方就係o係沙灘旁一間食店之類o既o野, 不過o黎餐比琴日o個餐差, o黎餐真係旅行團貨式law <見DSC01581 ~ DSC01583>, 隔離台真係有團康泰人食緊lunch~哈哈。好又一餐唔好又一餐, 食完lunch之後十二點幾, 出面開始勁好天喇, 出晒猛太陽, 當堂顯得個沙灘靚o左…<見DSC01584>。 差唔多一點就起行去下個景點喇, 仲以為係Raya Island添, 點知個guide話由於有人想玩降傘, 所以我地全船要去o左玩降傘先…真係啤一聲law, 之前o係沙灘咁耐又唔帶d團友去玩, 而家要全船人等幾個人玩降傘, 其實真係有少少不滿, 因為我地只可以o係船上等, 冇咩好做了…不過好彩唔算好耐, 又咁好陽光, 唯有影相啦…<見DSC01591 ~ DSC01594> 一點幾終於都起程去Raya Island喇, Raya Island距離Coral Island唔遠, 大約20mins就到。去到離遠已經見到碧綠色o既海水, 島上有唯一一間酒店The Racha, 藍天碧海, 加上寧靜o既環境, Raya Island就好似一個世外桃園咁, 有機會真係想o係入面住返晚<見DSC01603 ~ DSC01612>。原來仲以為可以上岸遊覽影相, 點知個guide話水退上唔到沙灘law…期待o左咁耐o既Raya Island竟然冇得上岸, 真係有d失望!!! 架快艇停o係遠處俾我地影相之後就轉去Raya Island o既另一邊再次浮潛喇, o個邊d水都係一樣咁清咁靚<見DSC01619 ~ DSC01621>, 船一停定我地又再次落水浮潛同用麵包餵魚喇。感覺上o黎o度d水比起琴日o既Phi Phi Island更清, 魚更多, 我地不斷用d麵包引d魚埋o黎影相, 俾咁多魚包圍真係好玩喇 <見DSC01623 ~ DSC01696>。 我地玩到2點幾, 個guide就叫我地返上船回程喇, 真係潛到好唔捨得走添…回程o既時候架快艇再兜o左我地去另一個沙灘, o個o度就係有條長浮橋o既沙灘喇, 不過可惜又係冇得上岸law…見入地d遊記可以o係條浮橋上拍照留念, 真係羨慕呀。 最終3:00就返到碼頭lu, 今次唔係o係沙灘上岸, 而係o係o個條超長碼頭尾上岸, 好彩上岸有shuttle bus搭返去上車地方o者, 唔使慢慢行<見DSC01711 ~ DSC01717>…跟住就搭返朝早架車返Banthai喇, 總括o黎講我覺得琴日個tour好玩d, 多d景點之餘個guide又好d…不過Raya Island又真係好靚…下次真係要上岸參觀o下先得~~~ 返到Banthai, 還返兩條毛巾, 拎返deposit同行李, 之後就離開Banthai出去搵車搭去之後兩晚住o既Twinpalms喇。原來仲諗住好易搵的士, 點知全街都係TukTuk車, 行o左好一陣子都唔見有的士, 所以最終都係搭TukTuk車, 340b。 Twinpalms o係Surin Beach隔離, 由巴東去大約20mins啦。 Twinpalms係一間比較新穎o既酒店<即係所謂o既Boutique Hotel>, 雖然冇咩泰國o既特色, 不過全間酒店都設計得好靚。 單單去到check-in o既時候就已經可以感覺到佢o個種寧靜, 因為酒店係以黑色白色為主, 裝飾間單, 無咩花巧o野, 就連個front desk都只係一張書”木台”咁, 另人唔覺入o左一間酒店咁, 好舒服 <見DSC01721 ~ DSC01722>。 Check-in完之後當然係入房啦, 我地住o既係Grand Deluxe Palm Room, 原本想book有pool access o既Grand Deluxe Lagoon Room的, 點知full晒。其實佢都有另一種pool access room的, 叫Deluxe Lagoon Room, Grand Deluxe同就咁Deluxe o既分別就在於Grand Deluxe係有浴缸+企缸的, 而Deluxe就只有企缸, 所以最終我地都係揀o左冇pool access但有浴缸的Grand Deluxe Palm Room。一入房就即時覺得我地冇揀錯酒店, 間房大之餘仲好靚添, 首先個廁所, 真係大得誇張, 除o左浴缸+企缸之外, 洗手盤都有兩個, 仲有張椅添 <見IMG_3016 ~ IMG_3027>。張床係king size的, 好大張, 好舒服<見IMG_3041 ~ IMG_3042>。另外雖然冇pool access, 不過由於我地間房都係o係地o下, 所以露台可以直出房外, 都算係garden access啦~哈<見IMG_3045 ~ IMG_3047>。仲有Twinpalms比其他一段酒店唔同o既地方係佢間間房都有個大LCD電視加一套HiFi連DVD player<見IMG_3036 ~ IMG_3037>, DVD可以o係酒店借或者自己帶去。而我就自己帶線去接駁有MP3 o既電話同HiFi, 玩完一日返到酒店又有得聽歌, 幾好feel架~~除此之外, 我地亦幾欣賞酒店o既一d小小心思, 例如check-in時會送串花俾你, 好香的<見IMG_3033>, 另外房入而又有好多用鮮花裝飾<見IMG_3020, IMG_3026, IMG_3048, DSC01773>, 仲有房入面有一碟朱古力<見IMG_3033>, 同埋晚上亦會有兩片朱古力請客人食的<見DSC01774 >。 Settle down之後第一件事當然係沖涼啦, 朝早出完島, 到而家先有得沖涼…跟住執完o野之後差唔多6:00又出發喇。首先我地去睇日落, 酒店好近Surin Beach, 由酒店行去只需5mins。Surin Beach有間酒店餐廳<見IMG_3061>, 另外又有d酒店轉用o既沙灘椅, 我地就係坐o係d沙灘椅上面欣賞日落美景喇<見IMG_3062 ~ DSC01757>, 沙灘對正日落o既位置, 真係正~~ 睇完日落, 之後就返酒店出面o既的士站搭的士去食氯o既地方喇。我地今晚會去巴東o既Kaab Gluay食飯, 由Twinpalms去要400b…貴。Kaab Gluay係o係巴東近Surin Beach的, 琴日去碼頭o既時候都經過的。餐廳唔大, 唔多人, 而且冇冷氣, 不過環境都唔差<見DSC01758, DSC01768, IMG_3121 ~ IMG_3124>。 我地今餐叫o左一個炒飯<55b>, 一隻生蠔<30b>, 一個椰子湯煮雞<80b>, 一個蝦剌身<80b>, 一個金邊粉<60b>同埋一碟通菜<40b>, 好似好多o野食咁, 不過其實d份量唔大的。 味道方面, 炒飯, 椰子湯煮雞d湯同埋蝦剌身都幾好味, 生蠔就一般, 好似唔太新鮮, 而金邊粉就都係第一食o個個最好味。 o黎餐埋單只需375b, 抵食!! 食完飯差唔多8點lu, 雖然好累, 不過仲有一個地方要去, 就係Let’s Relax喇。做spa/按摩係出發前女友指定o既行程之一, 而見Let’s Relax o既口碑好似都唔錯, 於是食完食就坐tuktuk去喇。布吉有兩間Let’s Relax, 一間o係Royal Paradise Hotel附近, 而我地去o個間就o係Sea Sun Sand Resort對面的, 所以同tuktuk車司機講去Sea Sun Sand Resort就得, 由Kaab Gluay去車費100b。 去到門口, 睇o左一輪個價目表, 之後就入去喇 <見IMG_3128 ~ IMG_3130>, 我地做o既係Foot Reflexology<45mins, 400b> + Body Scrub<1hr, 1200b>。首先係Foot Reflexology, 即係腳抵按摩, 感覺都幾專業, 只可惜我不嬲對o黎d按摩做spa興趣不大, 所以唔識欣賞~~哈哈~~之但係佢張凳好舒服的, 好好訓!!! 跟住就係Body Scrub, 即係磨走身上o既死皮, 佢有好幾種用o黎磨走死皮o既材料, 適合唔同種類o既皮膚…我揀o左芝麻蜜糖, 適合乾性皮膚喎…而女友的是適合敏感性皮膚, 唔記得o左係咩lu。個Body Scrub其實只係磨死皮, 完全冇按摩的, 只係俾佢”查”到成日都係黑芝麻<好恐怖>, 擦o下擦o下咁, 之後女友話d皮膚真係滑o左喎, 我就唔覺喇, 我都係唔識欣賞架喇….不過下次都係做返個全身按摩好似好d。做到十點幾就走人了, 點知o係o黎個時候先醒起…竟然入o黎o既時候唔記得o左用coupon!!! 唉…一早已經俾晒錢…冇計啦…真係失策!!! 出o返o黎都已經十點幾喇, 於是我地就諗住搭的士返酒店喇, 行行o下最終行到去Jungceylon先有的士, 返Twinpalms 400b…同出o黎一樣。今次個的士司機好攪笑, 佢d英文好好, 不斷同我地講o野, 佢架車又有套好正o既HiFi, 一上車佢竟然o係o度播國語歌law, 佢話接咩國籍o既客就播唔同o既歌喎~~哈哈, 另外佢又話之前o係Treetops Hotel做bartender的, 唔通o係布吉渣的士仲好搵過bartender!? 成十一點先返到酒店, Twinpalms好靜, 只有食早餐o個間餐廳仲未close<見IMG_3131 ~ IMG_3138>。周圍兜o左一陣之後就返房沖涼訓覺了。 |
|||||||||
|
|||||||||||||||||||||||||||||||||||||||