第四天…琴晚咁晏先返酒店, 今日晏少少, 7點幾先起身。 刷牙洗面之後就去食早餐喇。 食早餐o既地方叫Oriental Spoon<見IMG_3173>, 同Banthai一樣都係有室內同室外之分, 環境當然唔差啦, 一貫簡單, 開陽o既裝潢, 感覺真係好嘆~~ 食物方面, 都係有d熱盤, 有沙律, 有水果之類啦, 雖然選擇冇Banthai咁多, 不過Twinpalms d o野食比較高級少少, 有例如有煙三文魚<見IMG_3154>, 有一盒盒獨立包裝o既粟米片<見IMG_3163>, 仲有香賓飲添, 而且味道都比Banthai好, 真係一分錢一分貨呢…另外食早餐o既時候發現原來入住o既大部分都係外國人, 一個香港人都唔覺。

今日我地經Mr. Chai book o左一日車連司機<十小時>, 不過由於11:00先開始, 所以8點幾食完早餐之後就o係酒店入面周圍參觀喇。其實Twinpalms唔算大, 最大o既都已經係個泳池喇<見IMG_3192 ~ DSC01791>, 除o左泳池之外, 酒店仲有一間spa, 3間餐廳<包括食早餐同海灘旁o個間接>, 一間圖書館<可以借DVD返房睇>, 除此之外就冇咩特別設施喇。我地o係酒店入面周圍行, 周圍影相, 最記得o既係正當我地o係d沙灘椅上面影緊相o既時候, 遠方忽然有個類似係酒店manager o既人走埋o黎, 初時仲以為著住普通衫唔坐得沙灘椅添, 點知原來佢係o黎問我地使唔使幫手影相喎, 又幾好服務bor, 其實好多時對間酒店最印象深刻的都會係o黎d鎖事…

我地行到9點幾, 之後就返房收拾行裝準備去car tour喇。點知攪掂晒之後都只係十點幾, 襯仲有少少時間, 於是又落沙灘行一陣先。 今日又係勁好天, 藍天白雲, 我地真係好彩喇~~ Surin Beach都幾靚丫, 雖然d水唔係話好清, 不過咁好天, 又冇咩人, 真係正!!! <見IMG_3237 ~ IMG_3267>

好喇, 差唔多11:00就返酒店, 司機已經準時到達等緊我地喇。架車係一架普通私家車, 都ok啦, 至於個司機, 都係ok啦, 非常準時, 只係佢全日都冇咩點出聲, 叫佢去邊就去邊, 同佢冇咩交流…哈。

11:00我地o既car tour就正式開始喇, 之前兩日都係出o左島, 同埋o係巴東一帶出沒, 所以今日想去 Phuket Town行o下, 不過其實主要都係行商場為主…首先第一站係Tesco Lotus, 一個大型supermarket, 大大小小o既生活用品, 食品應有盡有, 係一個掃o野食o既好地方, 不過我地只係行o左一陣, 買o左d即食麵, 另外仲有o係入面o既boots買o左d o野之後就走人了。

跟住約12:30就到達下一站, Lotus 附近o既Central Festival。Central Festival係一個大型商場, 入面有好多食肆, 商店, 又有supermarket, 仲有戲院添<見IMG_3278 ~ IMG_3286>, 感覺有d似Jungceylon, 不過對我地o黎講都係冇咩好行咁, 只係o係入面一間叫S&P o既舖頭買o左d曲奇餅做手信, 兜o左陣就走人了。

行完Central Festival之後, 再o黎就係隔離o既BigC, 又係另一個大型supermarket, 上年去曼谷都有行過, 賣o既o野都係差唔多啦, 所以又係好快, 差唔多2:00就行完了, o係BigC我地又見到o個間S&P, 買o左一件叮噹燒餅同一件蛋糕食<見IMG_3293 & IMG_3297>, 好味!!! 同埋佢d曲奇餅真係幾好味架, 不過去布吉買曲奇餅做手信似乎怪o左d~~哈哈。

行完BigC 之後就去食lunch喇, 原來o係香港一早已經plan定去o個間Natural Restaurant食o野, 不過出發前幾日先知由此九皇節o既關係, Natural Restaurant o個邊有封路, 所以Natural Restaurant都冇開…我地唯有揀另一個地方食lunch, 就係Rang Hill上面o既Tunk Ka Cafe喇。

大約10mins就上到去lu, Rang Hill似乎係phuket town最高o既地方, 所以o係上面可以望到整個phuket town, 個view唔錯<見IMG_3300 ~ IMG_3305>。影o左陣相之後就去隔離o既Tunk Ka Cafe食飯lu。間cafe個view同頭先一樣, 無冷氣, 周圍都被樹木包圍, 環境幾好丫<見IMG_3314 & IMG_3320 ~ IMG_3321>。食物方面都唔錯bor, 我地叫o左一個春卷, 通菜, 炒飯一個, 仲有一個椰汁咖哩<見DSC01836 ~ DSC01840>。除o左個炒飯普通o左d之外其他都唔差, 特別係個椰汁咖哩, 辣辣地又勁多菠蘿, 正!! 食飽之後見隔離台一人一杯凍咖啡好似好好味咁, 於是我地又叫o左一杯試o下<見DSC01842>, 點知…超甜law, 完全好似飲緊糖水咁…唔掂呀。今餐埋單465b, 好滿意。

之前仲以為泰國周圍都有林真香賣, 點知只係o係Jungceylon見過, 而且款式唔多, 於是食飽飯之後就諗住去搵喇, 見地圖phuket town有個Ocean Shopping Mall, 之前上網又好似見過o下咁, 於是就叫司車我地去喇, 但係去到先知唔對路, 原來o個o度只係一個好地道o既商場, 賣衫為主, 就好似旺角中心咁…所以唔夠10mins就出返o黎喇…哈。出返o黎之後見隔離就係Robinson, 於是就過埋去行喇, 終於我地o係Robinson搵到有林真香賣, 不過價錢好貴law, 完全唔抵, 所以最終都係冇買…反而Robinson又有S&P, 又買o左d手信…

行完Robinson已經4:30了, 想行o既商場都行晒lu, 於是我地又返回大自然, 趕去日落崖睇日落喇。Phuket Town距離日落崖好遠, 要45mins車程先到。我地差唔多5:30到達, 雖然仲未日落, 不過已經有好多人等緊lu, 而且有好多都係當地人, 估唔到當地人都咁鍾意睇日落。我地亦事不宜遲, 去搵個靚位先, 最終我地坐o左o係山坡上, 等呀等, 太陽慢慢移近水平線, 天色亦慢慢變暗, 當然唔少得影相啦, 影呀影, 影o左好多好多相<見IMG_3340 ~ IMG_3431>, 幸好今日天色唔錯, 真係好靚。

我地o係日落崖等到6:30, 天色差唔多黑齊就離開了, 由於個car tour只係去到9:00, 所以我地要把握時時, 趕去食飯了。原本我地打算去lotus食飯的, 因為見佢好評如潮, 可惜又係臨出發先知佢裝修緊, 所以又冇得去了…取而代之我地唯有去鄧記啦。

由日落崖去鄧記要45mins, 都幾遠, 去到已經7點幾了。鄧記好大, 好多位, 仲o係正個沙灘隔離, 沙灘上有幾隻長尾船停迫在著<見DSC01961- DSC01967>, 環境都唔鍺, 不過唔知點解得好少人, 只係得幾”木台”客…。

由於car tour只係去到9:00, 所以我地一坐抵就快手快腳叫o野食喇, 點知佢話俾我地知因為九皇節, 大部分人都係食素, 所以佢地買唔到新鮮o既海鮮, 只有雪藏o既海鮮食!!! o下!? 我地搭咁耐車都係為o左食生猛海鮮, 而家竟然冇得食…不過都冇辦法啦, 最終我地叫o左黑椒炒蟹<見DSC01971>, BBQ蝦<見DSC01972 & DSC01973>, 一個酸酸地唔知咩魚, 仲有金邊粉<見DSC01976>同埋另一個waiter推介o既唔知咩菜<見DSC01974>。等o左一陣, 終於都有o野食喇, 個黑椒炒蟹果然好野味, 好正, 另外個魚同BBQ蝦都唔差, 整得幾好味, d蝦又大隻。不過個菜就唔掂喇, 好似食緊草咁, 完全食唔慣, 而個金邊粉都ok啦, 始終都係第一日o個個好味d…。

一輪狂風掃落葉, 8:15食完之後就走人了, 埋單810b, 其實冇想像中咁好味, 可能真係因為冇游水海鮮食啦。由於我地仲未買到林珍香, 所以食飯前已經問o左司機可唔可以俾錢extend多1-2小時, 點知佢一口就拒絕了, 有d失望…既然冇得extend, 我地又要買o野, 所以唯有唔返酒店住, 叫佢真接車我地去巴東啦。

o係車上我先醒起其實我地可以打俾william問佢地知唔知邊o度有林珍香, 因為佢地識話廣東話的, 溝通絕對冇問題, 結果佢地亦不厭其煩地告知原來巴東o既Ocean有得賣的…只怪我冇做足功課啦, 竟然撞o左去phuket town o既 ocean…大約9:00就返到巴東了, 我地o係Holiday Inn附近o既Ocean落車, 而今日o既car tour就此結束, 整體o黎講個car tour係尚可接受的, 只係冇咩特別好的地方。

今次我地終於都o係Ocean搵到林珍香手信了, 而且平過先前o係Robinson售賣的。我地毫不猶豫買o左一大袋便離開了。見今晚係布吉之旅o既最後一晚, 又橫豎已經o係巴東, 所以唔想咁早返酒店, 既然係咁不如去食多次Swensen's啦~~哈哈。我地向酒吧街進發, 再一次穿過酒巴街, 再一次去Jungceylon o既Swensen's, 再一次食返第一日o既四球雪糕, 真係好好味呢<見IMG_3466 ~ DSC01980 >~~~

食完雪糕十點零, 跟住又去返Jungceylon門口搭的士返酒店喇, 同琴日一樣, 都係400b。返到酒店, 當然係襯最後一晚同d手信大合照啦<見IMG_3476 ~ IMG_3484>。今次都係買得好少o野咋, 主要都係o野食。