今次o既曼谷之旅, 其實冇咩準備, 因為來得太急了, 我地只係出發前兩個星期先決定去曼谷, 臨急臨忙去買package, 上網搵o下邊間酒店好…最終都係跟返安運買, 四日三夜, 泰航機, 住Swissotel Nai Lert Park Bangkok, 夾夾埋埋一人要$3016, 仲未計保險同當地機場稅, 其實唔平, 不過咁趕, 都冇咩選擇了, 冇所謂啦, 最緊要有得去丫嘛~~~

泰國, 其實只係去過一次, 仲要係幾年前跟團去的, 所以幾年後o既今日跟本就已經對泰國冇咩印象了, 更加唔知而加有咩景點, 點去, d商場o係邊…等等。不過唔緊要, 今次由女友全權負責, 食住行一手包辦…咁濟, 而我因為太忙了, 完全冇時間上網搵料做功課, 只好做一個跟班啦。

2006年9月19日晚, 一睇新聞…大件事!!! 泰國忽然間政變, d坦克士兵走晒出o黎, 氣氛十分緊張!!! 其實初時我地都諗住冇得去架喇, 問定晒有冇得退錢之類<當然係冇o既…>, 不過觀察o左幾日, 又好似冇咩動靜bor, 加上見thailandfans一d網友即時o既匯報, 都好似冇咩事丫, 所以最終我地決定照去, 最多有咩事咪o係酒店唔出街law…就係咁22/9日, 如期出發。

22/9日, 晨早未夠5:00就起身, 超眼訓, 冇計啦, 我地要搭TG603, 8:00起飛o個班機嘛, 好似都有好幾次旅行都係一樣咁早起身搭N車去機場了, 我地都係貪心架喇, 成日都想早機去晚機返~~

六點零去到機場, 攪點晒d手續, 之後就入閘食早餐了, 今次終於都試到入面o個間burger king喇<見DSC05971 ~ DSC05972>, 不過味道比想像中普通得多law, 好多人都話burger king好好味架嘛, 唔通佢d只有漢堡包好食, d早餐係唔得o既!? 食完早餐, 照舊o係機場兜o下hae o下, 差唔多8點就上機了。

飛機遲o左10分鐘先起飛, 班機一d都唔full, 似乎仲有唔少人因為政變而臨時取消行程。飛機餐方面竟然又係o岩o岩o係burger king食完o既蛋同薯餅<見DSC05989 ~ DSC05992>, 味道都係普通, 完全食唔晒。去程o既細機冇得一人一個電視仔<回程係大機都冇…泰航全部機都係咁o既!?>, 所以兩個幾鐘o既航程機本上冇咩好做, 空姐又唔見得笑容親切, 態度亦只覺一般, 真係唔明點解d機票會咁貴, 仲貴過CX!!!

當地時間約9:30<泰國慢香港1小時>終於都到達曼谷機場喇。仲記得幾年前就覺得曼谷機場有d舊, 就好似香港以前o既啟德機場咁, 而今次再次踏足曼谷機場, 印象係…一樣。不過而家曼谷已經有新機場了, 好似大好多同靚好多架, 我地今次就無緣見識喇。

落機後過關手續尚算順利, 跟住就o係機場唱o左d泰幣<間間一樣價>, 10點幾就已經o係離境o個層o既的士站等的士準備去酒店了。O係離境o個層o既的士站搭的士係要俾50baht手續費架, o黎50baht手續費, 其實只係佢會用泰文幫你寫低去邊間酒店, 同埋話俾你知幾多錢, 佢知我地係去Nai Lert Park之後就話要350baht!!! 明明上網睇d網友都係話要2xx baht之嘛, 350baht貴咁多o既!? 不過問佢係咪用meter, 佢又話係, 而上車前都再問多次司機係咪meter, 佢都話係, 於是最終都係上o左車。 上車後冇耐就上o左tollway喇, 經過o左兩個收費站<40 + 20 baht> , 同網友形容o既一樣…大約半小時就到酒店喇, 車費最終都只係250baht<已包50baht機場手續費同tollway fee>, 所以都唔明點解機場d人會話要350baht o既…

好喇, 介紹o下酒店先, 我地住o既Swissotel Nai Lert Park Bangkok o係Chitlom BTS站同Phloen Chit站中間, 所以搭BTS其實o係是但一個站落都得, 兩個站行返酒店都係約5mins就得, 都幾方便, 不過如果朝早o既話去Chitlom站好d, 因為Chitlom站旺好多, 多好多o野行, 又有早餐食, 之但係由酒店去Chitlom站條路都幾靜架, 只係一條小馬路, 所以夜晚返酒店都係o係Phloen Chit站行返去好d, 雖然都有少少靜, 不過至少係一條大馬路丫, 當然亦可以搭的士返去啦=>

酒店樓高只有5層, 不過每層都有好多間房。踏入酒店大堂, 感覺都幾新淨同幾靚, 裝修亦幾特別, 幾有style架<見DSC06022 ~ DSC06033>。我地book o既房係Swiss Business Advantage , 房間尚算闊落, 同埋據聞d房返新過, 所以感覺都幾新淨幾正 <見DSC06009 ~ DSC06021>。

一如以往, 我地check-in完放低晒d行李o係房之後就即刻出動喇, 第一站係去附近o既水門海南雞飯店食海南雞飯。由酒店大門口一出轉左就係一條河, 過o左河之後再轉左繼續行, 大約10分鐘就到達水門海南雞飯店喇。間海南雞飯店外表只係一間好普通o既飯店<見DSC06046>, 冇冷氣, 入面個個都係清一色食海南雞飯。我地只係share o左一個海南雞飯, 結論係碟飯得好少雞, 雞肉唔覺滑, d飯又好乾, 冇咩味<見DSC06043>, 比起之前去沙巴同新加坡食過o既海南雞飯差好遠, 所以都唔明點解d旅遊書會咁推介o既!? 唯一好處就係平, 只係30baht, 即係大約HK$6。

食完o係泰國o既第一餐之後, 我地就慢慢行去Chitlom附近d商場喇。海南雞飯店附近就係Ratchadamri Road, 沿路行o左一陣就係一個叫Metropolis<好似係> o既商場, 亦即係Big C o既所在地<見DSC06053, DSC06057 > 。Big C係一個好大好大o既supermarket, 入面咩都有得賣, 而且價錢唔貴, 非常大眾化。

我地o係Big C行o左個圈, 只係買o左盒橙汁飲, 因為諗係最尾o個日會再o黎丫嘛。反而離開o既時間無啦啦見到有o係日本成日食o既mister donut喎!!! 估唔到連泰國都有, 點解香港仲未有架??? 見佢d donut只係十幾廿baht, 好平, 更係買o黎食啦<見DSC06049 ~ DSC06052>, 不過食落同o係日本o個d有d出入, 都係日本o既好味d 。除o左supermarket之外, 商場入面仲有好多唔同o既舖頭, 頂樓仲有一個food court添, 不過我地好快就行完lu。

跟住我地就過行人天橋去對面o既Central World Plaza喇。首先係去伊勢丹喇<見DSC06054, DSC06061 ~ DSC06063>。Isetan係一間日式百貨公司, 就好似吉之島, 西田咁。Isetan有好多層, 每層都有唔同貨品, 而我地都係對佢個supermarket興趣大d, 仲買o左舊榴槤即時o係門口隊o左添<見DSC06071>…不過唔甜o既…

Central World Plaza好鬼大, 其實都唔係好分得清邊o度打邊o度, Isetan隔離係一個陰暗的商場, 其中有一間賣figure公仔o既舖頭, 幾有趣, 有好多電影人物o既figure, 仲有好多係日本卡通o既女角添, 不過大部分都係三級的~~哈哈<見DSC06073 ~ DSC06076>。

過o左o個個陰暗商場, 之後就到達光猛o既ZEN喇, o黎邊新好多, 好似o岩o岩裝修完咁。o黎邊有玩具反斗城, 一間幾層叫B2So既書店, 仲有好多賣衫o既舖頭, 而商場入面亦放o左好多特別o既藝術品<見DSC06094, DSC06097>。

行完ZEN, 到此一遊埋對面o既Gaysorn<見DSC06104 ~ DSC06105>, 3點零, 跟住就繼續去附近o既Amarin Plaza喇, 仲記得幾年前跟團都o黎過, 同幾年前都係一樣, Amarin都係冇咩好行, 有少少頹咁, 不過入面有合記林真香<見DSC06120>, 林真香基本上係香港人必去o既手信店, 入而全部都係香港人, 職員仲個個都識廣東話添。本來諗住都係最尾o個日先買, 不過見佢有得免費送貨去酒店, 於是就買o左大部分o既o野食手信喇。另外林真香仲有得唱錢架, 而且仲比出面平添, 所以好多香港人都會o係林真香唱埋錢先走。

跟住落o黎就係酒店附近o既Central Department Store喇。Central亦係一個大型百貨公司, 又係有好多層, 層層賣唔同o既o野, 而地庫仲有一個好大o既supermarket添。不過我地一連掃o左咁多個商場, 已經非常累了, 於是就上o左Central上面o既Food Loft坐低休息了。Food Loft係一個food court, 不過望落完全唔似一個food court, 似係一間高級餐廳多d<見DSC06123 ~ DSC06129>, 入去o既時候佢會俾張card你, 買o左食o既時候就咁俾張card佢就得, 走o既時候先一次過計數。其實曼谷有好多food court都係咁o既, 同埋好多food court環境都好靚, 香港就冇d咁o既food court了。我地是但叫o左碗新加坡喇沙同汽水一枝<味道唔錯>, hae到差唔多5點, 跟住再行o左陣Central, 之後就起行去下一個景點喇。

下一站係去扮上等人, 我地首先去Chitlom站搭BTS, BTS即係skytrain, 係一條架空o既鐵路<見DSC06134 ~ DSC06137>。記得上次跟團仲專登叫導遊帶我地去搭BTS, o個陣真係好興奮, 真係大鄉里呀!! BTS好易搭, 只要睇住要去o個個站o既數字<1-7><見DSC06131>, 只要跟返數字入錢買飛就得。我地要去Sala Daeng, o係Siam站轉車, 好快就到。落車之後我地就向Banyan Tree Hotel進發喇, 不過原來由車站行過去都幾遠架, 差唔多半個鐘先到<見DSC06142 ~ DSC06144>。Banyan Tree Hotel出名高級, 當然亦都出名貴啦, 而我地去Banyan Tree其實只係去飲o野o者。Banyan Tree頂樓有間高級餐廳, 叫Vertigo, 餐廳隔離有個bar corner, 叫Moon Bar, 我地o既目的地就係去Moon Bar飲o野, 同埋睇日落&夜景。上到去o既時候已經6點幾lu, 天色昏暗, 今日而好多雲, 所以冇日落睇。不過唔緊要, 因為上面睇夜景都好正, 曼谷比我想像中繁榮, 由61樓望落去, 周圍都係高樓大廈, 就好似香港/日本咁<見DSC06156 ~ DSC06172>。我地一人叫o左一杯飲品<見DSC06146 ~ DSC06155>, 坐o係o黎個露天o既Moon Bar一邊飲o野, 一邊睇曼谷o既夜景, 的確係一種享受, 絕對值得推介~~~我地o係上面坐到7點幾就離開了, 埋單605baht, 當見識o下, 都幾抵丫~

飲完o野之後就去行夜市喇, Banyan Tree附近就係Suan-Lum Night Bazzar<見DSC06175>, 佢隔離有一個摩天輛, 所以好易搵<見DSC06178 , DSC06179>。Suan-Lum Night Bazzar好大, 分開一條一條小巷咁, 有好多小店舖, 而某d店舖賣o既o野都係店主自己整/design的, 獨一無二, 幾值得行o下睇o下<見DSC06180 ~ DSC06183>。夜市雖然冇冷氣, 不過由於係夜晚, 所以唔算好熱, 行落都幾舒服, 不過我地都係兜o左個圈就走人了, 冇咩收獲, 因為諗住JJ Market會有更多選擇同平d嘛~~

8點零我地就o係Suan-Lum Night Bazzar門口o既Lumphini站搭MRT去Si Lom站喇, 原來MRT o既車飛係一個coin咁o既, 就好似深圳地鐵咁, 幾得意<見DSC06191 ~ DSC06196>。Si Lom站一出就有指示行返去BTS o既Sala Daeng站, 不過我地諗住o係附近食埋飯先返酒店, 於是就去BTS站對面o既Bug & Bee食o野喇。o黎間Bug & Bee有幾層, 裝飾似一間café, 環境幾舒適<見DSC06200 ~ DSC06204>…我地叫o左一個單骨雞翼, 一個旅遊書介紹o既冬陰公海鮮飯, 同埋一杯橙汁沙冰<見DSC06199, DSC06208 ~ DSC06211>, 味道方面, 單骨雞翼有d乾, 不過d汁OK, 而冬陰公海鮮飯都幾好味, 酸酸地, 又唔太辣, 好開胃呢。食完飯我地仲去埋隔離o既Baskin Robbins食雪糕添<見DSC06212>, 哈哈, o黎o左泰國唔夠一日就食o左咁多o野!!

跟住就搭BTS返酒店了, 點知一踏上月台就落大雨喇, 我地真係好好彩, 回程o既時候先o黎落雨。返到Chitlom站, 雨依勢然很大, 所以唯有o係Central Chitlom搭的士返酒店…等o左好一陣先有的士, 點知個的士司機又近視睇唔到我地酒店張咭片, 佢又唔明我地想去邊, 雞同鴨講o左一倫之後, 唔理喇, 叫佢開車, 我地指示佢返酒店o既方向。酒店其實好近Central Chitlom架咋, 基本上由Central Chitlom直行轉左再直行就到, 的士一邊行我地一邊留意酒店位置, 不過太大雨了, 唔係好睇得清兩邊o既景物…突然間我地就指住一邊大叫: “here!! here!!”, 最終我地都能安全返到酒店, 咁樣搭的士都係第一次, 幾有趣丫。返到酒店就沖涼刷牙訓覺了, 第一天完結。