第二天, 7:00就起身了。梳洗過後就落樓食早餐喇, 食早餐o既餐廳位於lobby隔離, 叫iso, 樓梯一落就係。可能仲早啦, 所以食早餐o既人唔多<見DSC06224 , DSC06225>。早餐當然係buffet形式啦, 食物種類尚算多選擇, 除o左麵包, pancake, 一d熱盤之外, 當然唔少得生果<見DSC06232>, 仲有好多款o既果汁<見DSC06231>, 而且仲有一個個o既椰青飲架, 又幾好bor<見DSC06229>, 味道方面, 都幾好啦, 雖然講唔出有咩特別好味, 不過整體o黎講都幾滿意架喇, 另外餐廳職員服務亦好殷勤好細心呢。

食過早餐後, 跟住就返房收拾行裝, 準備出發開始今日o既行程喇。我地今日首先會去JJ Market。 酒店食早餐o既餐廳旁邊就係泳池<見DSC06257 ~ DSC06261>, 泳池旁邊有一個小通道<見DSC06260>, 由此路出去就係酒店o既後門<見DSC06264>, 出去之後只有一條馬路<見DSC06265, DSC06266>, 馬路旁係一條河, 而沿住馬路一直行, 唔使10mins就到達Chitlom Central Department Store o既food hall喇, food hall其實即係一個日式supermarket + food court<見DSC06267, DSC06269>, 個supermarket好大好多o野買, 不過好多都係外國貨, 價錢唔算平, 而個food court亦有好多o野食賣的。Chitlom Central Department Store隔離就係Chitlom BTS站, Department Store入面有出口直接連接去車站的。

只需大約15mins, 我地就到達Mo Chit站了, 落車後已經見到有好多人, 見佢地大多數都係向住同一方向進發, 估計佢地都係去JJ Market的, 於是我地就跟住人群行, 好快到達JJ Market喇<見DSC06276>。

JJ Market 係一個周未市場, 只有星期六日先開。JJ Market真係大到可以用恐怖o黎形容, 佢係全世界最大o既跳蚤市場, 由無數o既小巷縱橫交錯而成, 有超過一萬間店舖, 咩都有得賣, 不過基本上係冇可能行得晒, 好多時行行o下就會唔知自己行o左去邊, 要睇返地圖先知…不過好彩佢都有分開好多個唔同o既區域, 每個區域賣唔同種類o既貨品, 而且每條巷都有編號作析別, 所以都算係亂中有序o既<見DSC06276 ~ DSC06286>。另外全個市場都係冇冷氣的, 一邊行一邊出汗係必然o既事, 其實都幾辛苦的, 不過見到有咁多舖頭, 咁多平o野, 又點捨得咁快走呢。

我地手上只有旅遊書所介紹o既一d店舖, 所以跟本冇咩idea要睇d咩, 同埋點行, 所以最終都係見路就行, 見到邊o度似有o野睇就行過去。入面大部分都係一d小店舖, 好多都係賣衫, 又有好多都係賣d擺設, 裝飾咁, 另外亦有好多特色小店, 賣d店主自己design o既貨品…就好似琴日o既夜市一樣。入面有一區係賣狗仔同埋狗用品的, 間間舖都有好多狗仔俾人揀, 好得意, 真係唔買都要去睇o下呀。而狗狗區o既邊一邊又有雀仔區, 入到去好似行緊雀仔街咁。

我地行呀行, 睇呀睇, 行到大約12:00就去食飯喇。咁o岩行到去Jatujak Plaza附近, 於是就去旅遊書介紹o既Toh Plue Restaurant食飯喇, Toh Plue Restaurant都幾大架, 由幾間舖位組合而成, 其中有幾間仲係有冷氣o既添, 行到身水身汗, 當然係搵間有冷氣架啦<見DSC06287 ~ DSC06289>。食物方面, 都係d泰式食品咁啦,  我地叫o左一個冬蔭公飯同一碗雜菜, 另外仲有菠蘿沙冰同椰子沙冰<見DSC06291 ~ DSC06294>。冬蔭公飯都係咁o既味啦, 酸酸地咁, 而碗雜菜, 都係志在清清地o既o者, 反而兩個沙冰非常美味, 特別係椰子沙冰, 可能因為太熱喇~哈。食完之後又叫多個芒果糯米飯<見DSC06302>, 雖然芒果唔甜, 不過糯米飯好好味, 好香椰子味, 又好有口感!!! o黎餐埋單418baht。

食完lunch之後盲 繼續行喇, 其實都係漫無目的咁行, 都係見到咩o岩做手信就買咁啦。沿途又見到好多街邊小食, 好似,雪條, 串燒, 果汁咁<見DSC06321, DSC06326>, 好似好好味, 不過又唔敢食, 怕水土不服嘛, 最終只係買o左個椰皇飲, 只係20baht, 好平, 仲要係超甜添, 所以之後兩日一見到椰皇都買o黎飲, 消暑一流!!!

最終我地行到差唔多3:00, 出晒汗濕晒咁就行返去Mo Chit搭車走人了。JJ Market實在太大太多o野行喇, 好值得一去, 雖然我地買得好少o野, 不過都行得好開心, 比起第二d地方, 咁熱, 一早就走o左啦, 點會行咁耐喎=P

大戰完個JJ Market之後, 又熱又累, 最好當然係去做返個massage啦<其實係女朋友的提議>。我地o係Mo Chit站諗住打電話去Emporium隔離o既Asia Herb Association book時間做massage, 不過唔知點解個電話打極都打唔通law, 咁o岩隔離有個泰國女仔打緊電話, 於是就請佢幫忙喇, 佢好好人呢, 雖然都係唔通, 不過佢係用自己d錢入落個電話o度, 之後我地俾返錢佢佢竟然話唔使喎!!! 就係o黎次, 我地覺得泰國人都幾nice丫, 除o左第三日o既遭遇…最終我地打Asia Herb另一間分店o既電話, 終於都打得通喇, 仲叫佢代book Emporium隔離o個間添。之後我地就搭BTS向Phrom Phong站進發喇。

大約20分鐘車程, 大約3:30就到達Phrom Phong站了。車站隔離就係Emporium, 而由Emporium隔離o既馬路一直行, 沿途會見到好多唔同o既massage/spa舖頭, 大約5分鐘之後就到達Asia Herb Association喇<見DSC06332, DSC06333>。

我地都係第一次o係泰國做massage…呀唔係, 幾年前跟團都有包埋古法按摩的, 即係好難頂好痛o個種=P。Asia Herb有好多種package, 有d係古法按摩, 有d係腳底按摩, 有d係做facial treatment等等, 而我地就揀o左120mins Pureoil Body Massage with Herbal Ball, 1200baht。開始之前會填張問卷先, 主要都係想要o既力度, 重點按摩位置, 同埋沖涼先後等等, 我地去完JJ Market, 更係沖完涼先做massage啦。

其實我不嬲都對massage冇咩研究, 都冇咩興趣, 雖然幾舒服, 不過又未至於好似女友咁舒服到訓著o左…真係咁正咩!? 睇o黎我都係唔多識享受架喇。由於我地揀o既係Pureoil, 即係會擦到成身都係香薰油, 另外仲有Herbal Ball, 即係一個用草藥扎成o既球, 熱熱地, o係身上印印o下咁, 都幾舒服o既。

話咁快就過o左兩個鐘, 感覺好似休息o左好耐咁, 都有d叉足電o既感覺架~~而女友就訓醒一覺, 當然好精神啦!! 好喇, 做完massage已經6點幾, 又可以繼續我地o既行程喇。

首先行o左一陣Emporium, 之前跟團都o黎過架喇, o個陣覺得完全冇o野行, 因為好多都係高級舖頭, 不過入面有間Propaganda<見DSC06351, DSC06353>, 賣好多design特別o既家居用品的, o係香港都成日見到o既, 不過o係泰國買平好多, 上次跟團o係Propaganda買o左好多手信, 所以今次都專登再去睇o下。 d o野好似貴o左好多lu, 不過都仲有d平o野o既。

行完Emporium之後我地就去食飯lu, 原來諗住聽日先去Siam的, 不過見仲早, 於是就過去搵o野食喇。由Phrom Phong站搭BTS去Siam站, 7:15就到達Siam了。首先去Siam Paragon o既food court睇o下, 佢地o下一層有兩個food court, 一個係平時香港o個d food court咁, 俾錢買o野食, 而另一個就靚d, 高級d, 又係俾張card係買o野食o既時間”do” o既, 兩個food court都靚過香港o個d<見DSC06362, DSC06363>, 不過兜o左個圈d o野唔係咁o岩食, 於是就繼續搵地方食飯喇。

Siam Paragon隔離係Siam Center, 入面有食日本o野o既Fuji同ZEN, 穿過Siam Center之後就係Siam Discovery Center, 感覺o黎個商場比較高級d, 冇咩好行, 不過o黎o度都有間Propaganda, 仲有Loft…等等。我地最後決定去Siam Discovery Center入面o既Oisih Grand食飯, 佢係一間食日式buffet o既餐廳, 入面幾靚架, 感覺都幾高級<見DSC06369, DSC06371>, 不過其實又唔係好貴, 晚市buffet 850baht一位, 即係大約160HKD。

我地入去o既時候冇咩人, 完全唔使等位, 旅遊書又話要book位o既!? 坐低之後就出去拎o野食喇!!! 佢d食物種類有好多架, 除o左主打o既壽司, 翅身, 天婦羅等等日本o野食之外<見DSC06375 ~ DSC06377>, 仲有幾多其他o野食架, 好似中式點心, 多款果汁, 生果, 一d熱盤咁, 另外仲有個海鮮counter同扒類counter, 可以自己揀d海鮮同扒俾佢即時整, 都幾新鮮丫。味道方面, 壽司/翅身ok, 天婦羅普通, 冇咩味, 全晚最好味o既反面唔係d日本o野食, 而係即煎o既紐西蘭牛扒<見DSC06378, DSC06382>, 煎得o岩o岩好, 好好味, 食o左兩round之後仲想再叫架, 不過太飽了…另外即煎銀雪魚都好美味的。甜品方面亦有點驚喜, 種類多, 夠精美<見DSC06380>, 賣相絕對有酒店o既水平, 好多款都想試的, 不過實在太飽喇, 只係試o左相中的一款, 幾特別。最終我地只係大戰o左約1小時已經投降了, 9點幾就埋單走人喇。

跟住我地原路返去Siam站喇, 沿途商場入面o既商店大部已經收晒lu。返到Siam站就搭BTS返酒店, 今日我地o係Phloen Chit站落車行返去, 沿路都幾靜, 冇咩人, 不過全程都係o係馬路隔離, 所以感覺都安全o既, 我諗會好過由Chitlom站行返去條路o既。10點零就返到酒店, 第二天完。