By pigfong & darkside

行程o既第三日…今日7:30就起身, 梳洗完畢之後就浩浩蕩蕩咁落去食早餐lu,今日好似特別多香港人咁o既, 早餐兩旁坐著的都是香港人, 感覺好似返左香港咁 -_-“。早餐依舊豐富, 選擇同琴日差唔多<見DSC06402 ~ DSC06411>, 當然唔會放過佢o既原隻椰青啦~~ 嘆完早餐之後就出泳池兜o左個圈, 泳池四周都種滿樹木, 都幾resort feel丫<見DSC06414 ~ DSC06422>。本來仲諗住今日食完早餐游一陣水的, 點知見天氣唔係咁好, 冇咩陽光, 最終都係打消o左o黎個念頭…

跟住我地就返房hae o左陣, 10點零就整裝出發開始今日o既特別行程喇!!! 其實之前兩日都有留意住泰國o既電視節目, 睇o下有冇政變o既消息, 雖然完全聽唔明電視講乜, 不過睇新聞片段見有好多當地人/遊客都去睇d軍人, 為佢地打氣, 同d坦克影相…等等, 橫豎今朝我地又無乜特別地方想去, 於是就決定加插一個搵坦克o既行程喇!!!

只係睇電視, 都唔知d坦克o係邊o度出沒, 於是就去問酒店職員喇, d職員好好咁響地圖上面圈左d地方, 位置係響大皇宮附近…不過附近冇地鐵, 又冇BTS, 最終唯有搭的士去啦。我地一邊睇住手上o既地圖, 一邊睇住周圍o既環境~~越近大皇宮, 漸漸就開始見到越來越多軍人響街度站崗了, 從來都未見過咁o既情境…我地o既心情亦越來越興奮, 哈哈, 真係唔知驚呀!! 不過軍人就多喇, 去到大皇宮附近, 竟然係方圓100米連一架坦克都冇law, 落車之後我地一邊行, 一邊搵, 都係冇咩蹤影…不過見一場o黎到, 循例都入去大皇宮度參觀下啦。 Grand Palace好似係以前泰皇o既皇宮o黎架, 即係以前泰皇就係住o係o黎o度架喇。正當我地踏入皇宮範圍o既時候, 就俾門口o既保安攔住了, 原來大皇宮係唔俾人著短褲/短裙入去架!!! 不過唔緊要, 果度有得免費借d泰式裙<用一塊布圍成條裙>俾d有需要o既人圍住入去o既參觀o既~~

好喇, 擾攘o左一輪, 終於都入去參觀喇, 原來Grand Palace都幾多人架bor<見DSC06438 ~ DSC06443>, 不過主要都係泰國人同埋外國人。其實入面都無乜野睇, 可能係因為我地對o黎d歷史o野冇咩興趣啦~~入面仲有一part係要俾錢入去o既, 應該係宮殿之類, 不過我地冇入到去, 最終都係o係出面兜o左陣, 影o下相就走人了。返o黎睇返d相…Grand Palace其實都幾宏偉丫<見DSC06437 ~ DSC06454>。

出去之後就繼續尋找坦克喇, Grand Palace隔離就係湄南河, 行行下又走去睇o下先, 原本都有少少期望嫁, 以為d景會幾靚, 點知原來係泥水河一條, 真係把鬼呀<見DSC06458, DSC06460>。我地就好似蕩失路咁拎住張地圖周圍問人, 沿路問左幾個人都冇咩得著, 最好笑係其中一個旅遊巴司機指我地行去大皇宮附近o既一個地方, 話有”big gun”睇喎, 等我地仲滿懷希望咁走過去以為有坦克添, 點知…原來係d類似文物咁o既大炮o黎架咋, 真係激死人呀-_-“。

跟住再行行o下, 都係o係大皇宮出面, 有個男人見我地咁迷惘, 於是就主動問我地想去邊, 當知道我地想去睇坦克時, 佢就o係地圖上指點我地o係邊o度先有喇。佢好似好好人咁, 推介o左d地方叫我地去d temple參觀, 又話可以坐d政府贊助o既tuk tuk車去, 只需要20Baht就可以包車一個鐘頭帶我地去遊覽。其實我地之前從未坐過tuk tuk車的, 唔知道tuk tuk車收費之餘, 又好有興趣想試o下…正當我地猶豫之際, 佢已經幫我地截左架tuk tuk喇, 仲幫我地訂埋路線添, 原本我地都唔想去d temple嫁, 不過是但啦, 諗住上o左車先同司機講算。

上車之後初時都都咩丫, 同個司機有傾有講, 睇落佢都幾好人丫。仲有原來tuk tuk車都幾刺激架, 開得快之餘又好似唔係好安全咁, 唯有扶住兩邊o既扶手死都唔開啦~~都味話唔驚!!

首先個司機車左我地去一間廟, 見橫豎都係順路, 即管落去睇睇啦。入到去, 完全冇特別, 只見有一座似乎日久失修o既廟<見DSC06472>, 不過o係入面我地遇到一個人, 佢自稱來自馬來西亞, 去泰國旅遊, 言談之間佢話今日有個一年一度o既珠寶展覽會, 就o係附近的, 話係政府資助的, 所以d寶石之類會比出面平, 仲話有個香港朋友年年都會去買d寶石返香港轉賣添。其實當時我地完全冇懷疑過佢講o既o野, 因為我地都以為佢所講o既展覽會佢d好大規模, 有好多展銷商o個d, 仲有其實o黎個展覽會之前幫我地截車o個個男人已經提及過, 當時我地都話冇咩興趣的...離開o既時候, o黎位” 馬來西亞”人仲叮囑我地如果買一定幫襯一間叫Blue Dragon Factory Export Center, 因為係最抵的。

好喇, 出返去正準備上車o既時候tuk tuk車司機話想去toilet, 叫我地等佢一陣。正當我地好開心咁同tuk tuk車影相o既時候, 忽然有個外國人向我地問路, 佢問d景點太概都係之前o既截車男人介紹過的, 其間又同佢傾o左幾句, 佢話外國d學生鍾意響泰國買珠寶, 跟住拎返去家鄉賣o黎賺洗費, 仲提及一間珠寶公司添, 又係Blue Dragon!!! 哈哈, o黎個時候我同女友都講笑咁話咁似警訊d騙局o既, 兩個人都講埋d類似o既o野, 不過真係講笑咁講, 都冇認真去案件重組。

等左一陣司機就返來了, 跟住佢就問我地係咪去展覽會, 同之前一樣, 雖然興趣不大, 不過最終都係半推半就之下去睇下係個所謂o既展覽會。o個o度都係好近我地要去搵坦克o既Marble Temple的, 不過一去到就知唔對路喇, 原來所謂o既展覽會, 只係一間珠寶店, 亦即係之前d人提及o既Blue Dragon Factory<見DSC06484>, 我地o係門口已經覺得不妙, 門面好似黑店咁, 入到去就完全係旅行團必去果d珠寶店, 不過入面冇咩人, 只有幾個外國人睇緊珠寶, 我地入去只係行o左個圈, 逗留o左5分鐘都冇就走人lu, 好彩佢地無困住我地唔買唔俾走o者。

出到o黎就上返tuk tuk車了, 仲以為下一站就係Marble Temple, 點知行左一段路佢無啦啦響路邊停低, 開頭就係介紹隔離o既皇宮之類, 點知講講o下就問我地頭先做咩唔買o野, 佢話頭先我地無買野, 所以間公司冇俾gasoline coupon佢, 之後就極力要求我地去另一間台舖, 係賣工藝品的, 佢話我地入去間o野就會俾gasoline coupon佢, 如果買野就多d coupon咁啦, 我地初時都話唔去的, 仲話明我地唔會買o野, 不過佢話即使唔買佢都會有coupon, 於是我地都有d心軟了, 咪由得佢帶我地去囉, 果度又係d旅行團格局, 有個sales跟住行…間o野賣好多唔同o既產品, 例如魔鬼魚/鱷魚皮用品, 工藝品…等等, 無論係quality同價錢都唔多掂, 就好似幾年前跟團去買魔鬼魚皮具o個間差唔多, 都唔知係咪同一間o黎添呀~~哈哈!! 最終我地一樣野都買唔落手就出返去了。出到去等左一陣tuk tuk車司機至返來, 唔返來由自可, 一返來就知道我地冇買o野就態度大變了, 話我地冇買o野之類啦, 又話車o左我地成個鐘, 有coupon都唔夠回本之類, 上o左車之後佢就冇再同我地講o野了, 當時都有d驚唔知佢會對我地點架, 不過好彩佢最後車我地去Marble Temple附近就放低我地了, 佢都算有返少少良心o既, 至少話俾我地知點樣行去Marble Temple睇坦克, 我地俾o左50Baht佢之後就落車了, 就係咁親身體驗遊客騙局o既特別行程就此結束。 之前我地一路上都冇時間諗清楚成件事, 仲信佢地講o既o野添, 不過落車之後, 諗返成件事, 原來係一個好漂亮o既騙局, 一開始o既旅遊大使, 響寺廟度撞到果馬來西亞人同外國遊客, 仲有司機扮去toilet…等等都係為呃我地而設o既。 另外, 其實期間佢仲有車我地去另一間廟參觀的, 不過一入去就有人話廟入面有人做緊參拜, 唔入得去住, 仲叫我地坐一陣等等添, 不過我地冇等就走人了, 諗返o個一刻好似有個外國人等緊參拜完入去參觀的, 仲叫我地坐埋去一齊等添, 那個外國人好大機會都係一個演員吧, 目的係要我地去o個間Blue Dragon Factory o度買o野…竟然出動到外國人去呃d遊客, 真係利害!!! 唔怪得o係街上行o既時候成日都遇到有d泰國人介紹d遊客去d廟o度參觀啦, 原來佢地一早已經有大批演員註守, 每日o既工作就係引導d人去買珠寶。

其實我地真係好好彩彩, 完全冇買o野, 冇乜金錢上o既損失, 只係俾佢帶我地遊o左大約1個鐘花園, 同埋受左少少氣咁o者, 只怪我地太過心軟啦, 俾佢帶我地周圍去…其實唔想去o既地方應該極力拒絕先係, 仲有要o係香港做足功課先出發, 因為返到香港上網search先知原來o黎個騙局已經存在o左好多年架喇, 我o地咁都上檔, 真係慘呀。 奉勸各位去到邊度都好,千祈千祈要小心無啦啦向你獻殷勤o既人啊!

言歸正傳, 我地行o左一陣就見到遠處有一大堆人圍住架坦克車喇, 原來真係好多人專程去搵d軍人同坦克影相架, 佢地揀直就好似大明星咁, 最攪笑係好多當地人都遞d BB俾d軍人抱住影相, 唔知有咩意思呢!? 另外就係有好多人拎d o野食, 花等等送俾d軍人<見DSC06491 ~ DSC06515>, 睇o黎都幾多人支持今次o既政變呢。而d軍人都好似好好人丫, 有求必應, 任影唔嬲, 氣氛輕鬆!! 我地好辛苦至影到架坦克, 仲有同d軍人合照, 都係第一次親身見到真正o既坦克車。

其實響果度附近有幾處地方都有軍人駐守o既, Marble Temple附近就係一個叫Anantasamakhom Throne Hall o既地方, 大概係泰國o既政府總部<見DSC06537, DSC06539>, 琴日睇電視見o個o度d坦克駛晒出o黎一字排開架, 點知今日去到o既時候已經收埋晒lu, 只係有d軍人把守。我地又再搵d軍人影相, 湊完熱鬧就搭的士返去MBK lu。搵o左幾架的士先肯用meter, 今次個司機好好人的, 雖然佢唔識英文, 但去到MBK時都好努力咁同我地介紹附近o既景點呢<60baht >。

MBK係一個大型商場, 有好幾層, d舖頭賣o既o野比較平民化, 唔似得Siam Paragon咁全部都係名牌o野<見DSC06552 ~ DSC06557>。去到MBK首先係去醫肚, MBK有個叫The Fifth Food Avenue o既foodcourt, 好似係最近先開o既, 個foodcourt裝修得好靚, 仲靚過第一日去o既Food Loft, 而且面積好大, 入面分開o左幾個area, 每個area o既裝修桌椅都唔同架, 坐在唔同o既area就好似去o左唔同o既餐廳咁。而食物種類亦十分多, 中西日泰式咩都有<見DSC06549, DSC06550>。我地兜o左幾個圈先諗到食乜, 叫o左一個海南雞飯同泰式河粉, 海南雞飯d飯都幾好味丫, 不過d雞就普通, 而個泰式河粉都ok啦<見DSC06545, DSC06548>, 食完其實都飽飽地, 不過俾我地見到有榴槤糯米飯食, 算佢唔好彩, 俾我地KO埋, 都幾好味丫, 食完超飽…o黎餐埋單210Baht, 抵食!!

食完飯之後我地響MBK行o左陣, 雖然有好多舖頭, 不過我地都好似冇咩興趣行咁, 可能因為太多人了, 最終只係買o左d榴槤乾之後就行返去去Siam Discovery Center 同 Siam Center o個邊喇, d商商全部都有天橋連接的, 好方便~~行行o下我地就到達Paragon o既水族館 – Siam Ocean World了<見DSC06573>。

o黎個水族館好似都幾受歡迎架, 見好多去完泰國玩o既人都有去。入場費一人450baht, 都唔平呢, 買完飛之後就入場了。入面其實唔算好大, 不過都幾多o野睇, 有一枝枝o既魚<見DSC06578>, 龍蝦, 長腳蟹, 海馬, 海膽, 鯊魚,企鵝, 海獺等等等等, 仲有得搭船o係水族箱上面遊覽<當然要另外俾$啦, 見DSC06597>。行行o下又有喂鯊魚o既表演睇, 不過旁述都係泰文的, 睇o左一陣就走人了<見DSC06625 ~ DSC06626>。另外值得一提o既係佢入面有一part係可以俾人親手摸o下d海洋生物架, 不過好似只係得海星<見DSC06634, DSC06638>, 有得咁樣近距離接觸, 都幾得意丫。個Ocean World雖然唔係好大, 不過唔覺唔覺都行o左個幾兩個鐘, 感覺係估唔到泰國會有個咁有規模o既水族館, 個人覺得都幾值得參觀o下, 不過比起之前去過o既大阪天保山海遊館, 都係日本o個個好睇d, 同埋大好多。

出返o黎已經6點了, 之後又行Paragon, 買o左d女人野, 話時話, 真係又平又靚呢 :P。Paragon真係唔係好o岩我地行, 太高級了~~於是行完, 做完正經o野<買女人o野>之後就去附近o既Siam Square了。

Siam Square並唔係d咩商場, 佢係由好多橫街雜巷組成o既地方, 即係好似旺角咁。Siam Square有好多boutique, 好多都好有特色的, 有一間仲擺o左個矇面超人做display添<見DSC06681~DSC06682>。我地跟住書上o既介紹, 去o左一間叫Mango Tango o既舖頭, 係食甜品的, 仲要全間都係食芒果甜品<見DSC06686, DSC06688>, 我地share o左一個同店同名, 叫Mango Tango o既甜品<見DSC06683>, 又幾好味bor, 只係100baht~~滿足。

食完Mango Tango都只係7點幾, 都仲未食飯, 但係又飽飽地, 於是o係7-11買左2個杯麵諗住返酒店夜d食。買完出o黎忽然間醒起旅遊書介紹Paragon有一層有好多靚車睇架bor, 於是雖然累到就死都要番返去Paragon, 買唔起法拉利同Lamborghini, 睇o下都好丫~~hehe<見DSC06693 ~ DSC06695>。行多陣之後, 8點幾我地就搭BTS返Phloen Chit站再行返酒店了。

返到酒店諗住去門口隔離間café/麵包店<見DSC06700>睇o下早餐有咩食<因為package唔包聽日早餐>, 點知無啦啦發現原來間舖7點後有優惠的, 所有麵包蛋糕都係半價, 我地梗係唔執輪啦, 不過去到o既時候已經差唔多俾人掃清了, 最終只係買到一件三文治<45baht, 見DSC06707>, 再加埋兩個杯麵<見DSC06708>就係我地今日o既晚餐喇~~~

今晚又到o左旅程o既最後一晚了, 例牌活動當然係影手信啦, 原來真係買o左好少o野咋, 仲要好多都係o野食, 點解其他人可以買到咁多o野o既!?<見DSC06711, DSC06712>。影完手信之後就沖涼了, o黎個時候電視冇啦啦冇晒o野睇, 全部都係播同一個男人講o野<見DSC06719>, 我諗大概都係講d政變o既o野啦, 電視冇晒o既睇, 唯有十一點幾就訓覺了。