Viewed:2599
|
|||||||||||||||||||||||||||||||||
|
|||||||||||||||||||||||||||||||||
| |||||||||||
| [leave message] [e-card] | 
|
From: darkside (Nov 11, 2004 17:42 HKT) 今朝一早六點幾就起身喇, 都幾眼訓, 不過冇計啦, 想去築地食早餐嘛。今日o既天氣唔係咁好, 一出酒店冇耐就落雨, 一落就落o左成日, 攬到影d相都唔靚。 七點零, 池袋o既街上仲係好冷清, 冇咩人, 不過見到已經陸陸續續有好多著晒成套西裝o既人趕緊返工喇, 日本人返工著得好整齊咁, 個個都成set西裝, 見佢地成班人向住同一個方向行, 個情景幾壯觀, 幾有氣勢呀~哈。一路行去池袋站o既時候發現原來日本有好多烏鴉架, 隻隻都好大隻, 邊飛邊叫, 都幾嘈。 去到池袋站第一件事係去賣Passnet, Passnet即係地下鐵o既儲值飛, 好似以前香港o個d咁, 最平o既要1000yen, 而搭JR就可以買IO Card, 基本上Passnet同IO Card用法一樣, IO Card用o黎搭JR, 而JR以外就可以用Passnet, 好處係搭車唔使次次買飛, 用晒先買過第二張, 佢又會mark低晒你去過邊d站, 用完之後又唔會食o左張飛, 所以用o黎留念幾正!!! Passnet同IO Card都可以o係售票機o度買到~ 買完Passnet, 首先要搭[丸之內線]去銀座, 嘩!! o黎程地鐵簡直畢生難忘, 因為o岩o岩係上班時間, 勁多人搭車, 當架車o黎o既時候, 我地好辛苦先迫到上車, 點知原來後面仲有好多人迫緊入車, 最終係由車門位置俾人迫到入車箱中間, 擠迫程度係香港o既幾陪, 基本上全程車都係唔使郁亦都郁唔到, 勁辛苦!!! 好辛苦先去到銀座站, 之後再轉[日比谷線]就可以去到築地站。出閘後跟住手上o既地圖行o左一陣, 經過本願寺就到達築地o既場外市場喇, 場外市場有d似街市咁, 有好幾條巷, 有好多檔田同食店, 多數都係賣魚, 不過都有d賣乾貨, 零食, 碗碗碟碟咁, 都幾特別。 我地行o左幾條巷之後, 就見到”松露”, 佢係一間專賣日本甜蛋o既舖頭, 一舊原味o既甜蛋賣220yen, 好好味, 不仿試o下。再過多一條巷（好似係一條o瓜）, 就見到” 壽司清”, 睇newsgroup 好多人都推介過。” 壽司清”附近有檔賣燒帶子又係好多網友推介, 佢d帶子好大隻, 好新鮮, 見住佢即開即燒, 都係400yen咋, 食落好鮮甜, 一定要試, 燒帶子o既婆婆仲好好人, 幫我地切開之前o係”松露”買o既甜蛋等我地容易食d~~ 食完燒帶子就去搵蔡蘭介紹過o既"壽司大"食壽司, 點知原來間o既好遠場外市場, 搵o左好耐先搵到, 最慘係去到先知佢未開門!!!十點半先開……我地決定唔等lu, 咁唯有原路返返去場外市場…… 最終去o左” 壽司清”食壽司, 佢d招呼幾好, 又有英文menu, 如果唔想煩食咩好, 可以叫set, 佢有兩個set, 一平 一貴, 貴o個個有13件壽司, 平o個個唔記得lu。我地兩個人就叫o左個貴d o既set share, 其實o個13件壽司, 好多都唔知係咩, 之但係又好好味喎, 特別係蟹肉, 帶子, 海膽, 鰻魚（入口即溶!!!）, 仲有件係”金倉的脂肪多的部分”都好正。總之o黎餐好滿意, 埋單3150yen。 食完” 壽司清”之後, 買o左d手信就走喇, 走o既時候o係築地另一個站, 築地市場站搭[都營大江戶線]去代代木, 再轉[JR山手線]去原宿。原宿站好特別, 外型好似一間古老大屋咁。到達原宿之後, 原來諗住去原宿站隔離o既明治神宮睇o下, 不過又落雨, 又大霧, 行到入去影相都唔靚啦, 於是為有o係出面影o左幾張相就走o左lu。 原宿主要有兩條街比較多人行, 分別係”竹下通”同埋”表參道”, ”竹下通”主要衫多, 賣o既o野比較似旺角, 不過都有d食店同生活用品店咁。而”表參道”d舖頭就比較高級。我地首先行”竹下通”, 不過沿途都好似冇咩o岩買, 可能個人太累喇, 同埋我今次去東京o既目的都係周圍行o下, 睇o下同食o野咁, 所以都冇咩點睇衫。好快就行完”竹下通”喇, 之後再向前行, 就到o左一條高級d o既街, o個o度d舖頭間間都好有特式, 好獨特, 賣d o野都好似唔平, 之後返到香港先知原來o個o度就係”裹原宿”, 不過好似冇咩人行咁, 可能仲早啦。行完”竹下通”同”裹原宿”之後就經”表參道”向車站方向出返去, 途中見到有少少紅葉, 去日本前都期望會有紅葉睇, 不過時候未到, 只不過間唔中有d紅紅地o既樹…”表參道”又有間幾層高賣玩具同精品o既舖頭（叫Kiddy Land）, 都幾多o野睇（對我o黎講）, 仲有唔少阿Jack（The Nightmare Before Christmas） o既o野賣。 行完原宿, 之後就搭[JR山手線]去涉谷喇, 涉谷都有好多o野行, 咩井頭路, 中央路咁, 俾我o既感覺係有d似韓國o既東大門咁, 我都係走馬看花咁, 行o下, 睇o下, 途中去o左間叫GINDACO（築地銀x） , 賣八爪魚丸架, 佢d八爪魚好好味, 不過買o既時候佢俾o左兩包醬我揀, 仲以為兩包都係沙律醬添, 是但揀o左包, 點知原來係芥末….. 跟住就去o左涉谷間Tokyu Hands行, 東京間間Tokyu Hands都好大, 分開好多層, 唔同層數賣唔同類型o既o野, 咩都有得賣咁濟, 價錢都算合理, 所以都係一個買手信o既好地方。o係Tokyu Hands買o左d手信之後就準備去下個景點, 新宿喇, 不過去搭車之前o係大黑屋買o左兩張DisneyLand o既入場卷, 5400yen一張, 平o左100yen, 據d網友講買o既時候最好留意個expiry date喎。 再一次搭山手線, 五點幾就到達新宿喇, 新宿又係一個好旺, 好多遊客都會去o既地方, 又係好多商場, 舖頭咁law, 仲有條好多夜店o既歌舞技町。首先我地行o左去Times Square, 本來要去Fancl買o野, 點知行到過去先知原來攪錯o左, Times Square係冇Fancl o既, 反而新宿站附近就有…Times Square就好似香港o個個咁, 又好多層, 好多商舖, 又有間Tokyu Hands, 而頂樓o個幾層又係有好多食店, 包括築地玉壽司同和幸, o黎兩間好多地方都有分店, 亦有好多人推介過（之後o個幾日我地都有試到）。 行o左一陣Times Square之後就返返去新宿站旁邊o既Fancl喇, 買完o野之後就跟住旅遊書o既介紹去搵食雞泡魚餐o既”玄品下關xx”, 途中經過o左出名o既歌舞技町, 又真係好多夜店喎, 仲有好多黑衫黑褲o既金毛漢企o係條街o度, 搵d街上o既女仕交涉（池袋都有好多, AV星探??）。間”玄品下關”都好難搵o下, 個門口又唔起眼, 又僻, 又遠車站, 我地搵o左好耐先搵到=< 六黠幾入到去, 間o野冇乜人, 不過佢竟然話full booking喎!!淨係淨返d塔塔米房問我地要唔要, 塔塔米房咪仲好, 有風味d嘛~~坐低佢就俾o左個英文menu我地, 雖然話係平o既雞泡魚餐, 不過其實都唔平, 一個set都要三四千yen, 不過d set都好大o下, 好多o野食…於是我地又share o左一個4980yen o既set, 有五味”食送”, 包括雞泡魚皮, 雞泡魚翅身, 炸雞泡魚, 雞泡魚火鍋同埋用火鍋o既湯煮o既湯飯。講真個餐都幾普通, 雞泡魚皮冇咩味, 雞泡魚翅身”un un”地, 又係冇咩味, 之後個炸雞泡魚比軟好味o既, 個火鍋又係冇咩特別, 一d都唔覺雞泡魚好鮮甜好好味o既, 不過最咪o個個雞泡魚火鍋湯飯就真係好正, 有專人幫你用火鍋d湯, 再加d飯, 蛋等等落去煮, 煮完出o黎d湯飯又真係幾鮮甜, 好味!!!之後仲有雪糕做甜品添, 埋單5490yen, 其實我覺得唔多低, 食多餐” 壽司清”好過, 不過未食過雞泡魚嘛, 試o下都無仿啦, 究竟係佢整得唔好食定係雞泡魚跟本係咁味o既呢!? 食完雞泡魚餐之後就搭JR返池袋喇, 返到酒店成十點幾, 勁累, 真係好累…隻腳好似唔受控制咁~哈哈 |
|||||||||
|
|||||||||||||||||||||||||||||||||||||||