Viewed:2030
|
|||||||||||||||||||||||||||||||||
|
|||||||||||||||||||||||||||||||||
| |||||||||||
| [leave message] [e-card] | 
|
From: darkside (Nov 11, 2004 17:41 HKT) ~Written By Pigfong~ 今日係去Disneyland o既大日子, 所以我地一早就起身準備喇, 出門口之後去左Mister Donut食早餐, 我地叫左Custard Cream 同 Angel Cream包包, 臨走時又忍唔住整多件期間限定o既紫芋圈圈 <我諗係芋頭O卦 -_-“>, 煙煙韌韌咁又幾好味喎. 食飽飽之後就要上路搵米奇老死喇, 首先要搭[有樂町線]去新木場, 跟住再轉[京葉線]去舞濱站, 落車再行幾分鐘就到嫁喇, 原本我仲妄想平日去可以唔多駛排隊玩遊戲, 點知一落車就知道我太天真喇, d人由四面八方咁湧去Disneyland, 連買飛 & 入場都要排長龍呀, 好彩我地之前去大黑屋買定飛o者, 果時只不過係朝早9點幾咋, 真係灰灰地,. 不過一入到去即刻又開心番喇, 因為有好多Halloween裝飾, 周圍都係好得意o既南瓜頭, 同埋有好多表演, 食物, 精品, 甚至乎game都係同Halloween有關嫁, 好興奮呢. 入場第一件事就係衝去拎fastpass, 即係拎左之後可以響特定時間內唔駛排隊玩某個遊戲, 場內只有7個game有呢樣野嫁咋, 而我地就主攻新o既巴斯光年game同怪誕城之夜亞Jack game, 我地已經第一時間去巴斯光年度嫁喇, 但拎fastpass條龍已經長到你唔信, 好彩原來都唔駛等好耐就拎到, 仲要 12:40就有得玩添, 好野~ 張fastpass上面除左有寫你幾點可以唔駛排隊玩果個game, 仲有另一個時間係show你幾時可以拎第二個game o既fastpass o既, 好似我地拎左呢張fastpass係12:40 o既, 佢就要我地11:xx至可以拎第二張, 如果你想keep住有game玩o既話, 記住準時去拎其他game o既 pass呀~ 唔知係Halloween o既關係定平時都係咁呢, 響Disneyland入面好多人扮鬼扮馬, 好多小朋友扮三眼仔, 公主, 巴斯光年, 小熊維尼等, 亦好多大人扮亞Jack, Minnie等等, 真係好有氣氛, 另外又見到d 卡通人物出來同人影相, 有時真係分唔清邊d係staff, 邊d係遊客呢 行行下見space mountain冇乜人玩, 於是就走左入去玩喇, 佢其實係一個室內過山車, 扮到好似星際旅行咁, 入面好黑, 你唔會知前面係上斜定俯衝, 所以都幾刺激嫁. 跟住我地就行左去ToonTown, 果度冇乜野玩, 主要係d Disney人物o既屋企, 周圍都係好colourful好童話咁, 所以我地都謀殺左唔少memory space呢, 影下影下就到Halloween Parade o既show time <11:10/ 16:10>, 我地諗住響 ToonTown出面條路睇 parade, 點知出到去已經比人霸晒位, 正當徬徨之際, 我地發現一對日本後生仔女隔離有少少位, 但又唔敢問佢地可唔可以比我地坐喎, 因為驚比後面d人鬧, 但最後我地都係厚住面皮咁問佢地, 點知佢地真係好好人咁比我地坐喎, 日本人真係太好喇. 坐左一陣就有d staff企響前面, 原來佢教我地跳舞呀, 有一set係米奇老死跳o既, 有一set係巫波跳o既, hehe, 其實我地之前上網都睇過呢幾part舞, d舞步同d音樂都幾得意, 隔左陣就有d花車走出o黎, 最鐘意亞Jack果架, 睇到咁上下d車會停響度, 跟住d表演人就響度跳頭先d 舞, 大家都好投入, 氣氛好好呢, 之後又有d車仔噴d毛毛球出o黎, 個個都爭住要, 我之後都拎左個, 其實好普通o者, 都唔知做乜要爭 -_-“ 睇完之後就去左幽靈公館度拎fastpass, 呢個game因為Halloween o既關係改左做以亞Jack做主題 o既鬼屋,今期好hit呢, 所以又排左好耐隊, 期間經過一個區叫做動物天地,有d木筏同大船比遊客搭嫁, 不過我地冇搭到. 拎完呢個fastpass之後就去城堡度影相,好靚呀. 之後就返去巴斯光年度玩lu, 入到去2個人坐一架車, 沿途有好多敵人 , 我地就要用光線槍射佢地, 射中左會有分嫁, 就好似打機咁, 而我地亦可以自己控制架車向左或向右, 都幾好玩幾得意嫁, 未玩過o既一定要試呀. 玩完之後又周圍影相, 主角有三眼仔同南瓜頭, 佢地係我地響Disney入面見得最多o既公仔呀, 勁. 跟住就去左買萬聖節至有o既南瓜雪糕, 又幾好味喎. 由於14:00有個夢想大巡遊, 一日得一場嫁咋, 為免好似今朝咁狼狽, 我地一早就霸定好位, 跟住其中一個去買野食, 咁就萬無一失啦, 但因為太多人排隊買野食喇, 攪到差d 趕唔切返去睇Parade呀, 好險. 個Parade好正呀, 多好多花車同舞蹈員, 有好多熟悉o既卡通人物, 好似Toy Story, 怪獸公司, 白雪公主, 仲有我最鍾意o既小木偶添呀. 日本人真係好好, 會自己帶靚靚地墊o黎霸位, 睇完show會自己清走d雜物, 唔會一睇完show就成地報紙垃圾, Good~ 睇完之後又周圍影相, 今次去左WesternLand, 全部野都好西部牛仔feel嫁, 行行下唔覺意咁又拎左Big Thunder Mountain o既fast pass, 今次要成18:00至玩得lu, 行下行下行番去近入口d shops, 但好多人呀, 我地又唔係好迷Disney d野, 所以一樣野都冇買到, 我諗都冇乜邊個好似我地咁忍得手嫁喇, 我地唯一有興趣o既係d Disney金幣, 但d整金幣唔係買嫁, 係要搵d整金幣機整嫁, 你入個100yen入去, 佢就會有個plain o既幣碌落個模到, 一壓就變左個印有公仔o既金幣喇, 唔覺唔覺我地就整左好多喇. 差唔多係時候返去亞Jack度玩lu, 但有fastpass都等左好一陣子呢. 終於到我地喇, 開始時入左個密室度聽briefing, 但全部都係日文, 都唔知佢講咩, 不過淨係感受個陰深恐怖氣氛都好驚喇, 之後就坐上架車度喇, 沿途有好多The Nightmare Before Christmas o既人物, 整得好靚呢, 都係值得一玩o既一個game. Hae 下hae下就返去玩巨雷山喇, 即係好越礦飛車咁o既game, ok啦,算係Disney入面比較激o既game之一. 玩完已經天黑喇, 又係時候周圍影相喇, 夜晚o既城堡好特別, 又影左好多相, 之後見到微縮世界冇乜人玩, 又貢左入去玩喇, 好似超動感影院果類咁,不過張chair唔識郁, 但就會有 d”特別效果”, 都幾得意丫. 跟住又要霸位睇Electrical Parade喇, 呢個係重頭戲o黎, 所以我地捱住凍都要等. 19:30 Parade開始, 所有花車同舞蹈員身上都有好多好多燈泡, 真係好靚呀, 一定要睇呀, 睇完之後又轉移陣地去城堡前霸位喇, 因為20:30 有最後最期待o既節目 – 煙花表演, 城堡 + 煙花真係浪漫到暈呀, 好滿足呢. 睇完之後再行左一陣d shops就走lu, 原本諗住原路返酒店, 點知唔記得落車喎, 好彩直去都可以返到酒店o者, 最終去到東京站先轉[JR 山手線]返池袋, 返到去真係好累好累喇, d手呀腳呀腰呀好似唔係自己o既咁, 但玩左咁多game又睇左咁多show, 都係值得o既. |
|||||||||
|
|||||||||||||||||||||||||||||||||||||||