Viewed:2297
|
|||||||||||||||||||||||||||||||||
|
|||||||||||||||||||||||||||||||||
| |||||||||||
| [leave message] [e-card] | 
|
From: darkside (Nov 11, 2004 17:38 HKT) 琴日去玩迪士尼已經好累, 不過今朝又係七點幾就起身, 因為要搬去民宿。我地買o既package只係包o左三晚酒店, 另外三晚我地就自己上網book o左巢鴨o既”東京小套房”。 o係酒店執齊晒d行李之後就check-out喇, 跟住就一邊行出車站, 一邊搵地方食早餐, 池袋都有唔少café, 快餐店等有早餐供應, 不過其實日本人早餐通常都係食飯同拉麵的, 所以有好多賣牛肉飯同拉麵o左地方都會好早就開。最終我地入o左一間就o係池袋站東口旁邊, 叫Becker’s o既café, 其實係一間快餐店, 自己買飛自己拎o野食, 不過間餐廳幾大佈置幾靚, 去o左七日真真正正坐低食o既早餐都係得兩次, 就係琴日o既Mister Donut同今日o黎餐, o黎o度d o野都幾好食o既, 叫可樂仲會送檸檬, 變o左檸樂添, 埋單1140yen。食完早餐之後就拖住兩o急行李搭[JR山手線]去巢鴨喇。 好彩今日遲o左, 搭車冇築地o個日咁迫, 不過都係好多人<山手線長期都係咁繁忙>。由池袋去巢鴨只需兩個站, 於是好快就到喇。巢鴨都算係一個靜中帶旺o既地方, 車站附近都幾旺, 有好多食肆, 又有彈珠機舖, 又有d bar, 仲有24小時營業o既”西田”…..出o左車站就跟住”東京小套房”網上o個個簡單o既地圖搵喇, 沿住火車軌一路行, 火車軌兩旁都係好多民居, 夜晚經過就幾靜架。當行到入去橫行o既時候…..就開始迷路喇, 個地圖太簡單喇~~間”東京小套房”又冇咩指示, 唯有問人, 好彩問著個英文幾好o既後生仔, 不過佢帶我地兜o左一個圈, 去到原來o既便利店…..再過一陣, 終於都搵到喇, 個入口都幾隱蔽, 負責人係一位姓林o既女仕, 佢識講國語同廣東話, 估佢係台灣人o瓜。因為時間尚早, 所以未有得check-in, 於是我地就放低d行李, 夜晚先返去, 臨走時林小姐俾o左張地圖我地, 仲介紹o左附近有咩好行同好食添。 去完民宿放低d行李之後就正程開始今日o既行程喇, 第一站係三鷹之森, 即係宮崎駿美術館。我地o係巢鴨站搭[JR山手線]去新宿, 之後轉[JR 中央線], 唔使幾耐就到達三鷹站喇, 出站之後落樓梯, 無幾遠就係三鷹之森美術館o既巴士站喇, 巴士站有專車去三鷹之森, 只需上車俾錢就可以<200yen>, 如果想搭來回就可以o係車站部售票機o度買飛, 其實美術館離三鷹站唔係好遠, 行都係好似十幾分鐘。上o左車冇幾耐就到喇, 去到時門口個識員話未入得去, 於是就o係館外行o下, 影o下相, 之後十一點半就入去喇。我地之前已經o係香港間Satellite買定飛<@hk$120, 貴過o係日本買>, 因為個美術館都幾多人去, 去到日本先買可能會買唔到飛, 同埋o係香港買o既飛去到可以o係指定o個日任何時候入場, 而o係日本買就只可以之前揀定一段時間。 宮崎駿美術館樓高三層, 再加埋天台同地爐, 不過除o左天台之外其他地方全部都唔俾影相。館內o既佈置相當特別, 有好多同宮崎駿動畫相關o既o野睇, 好多都好特別, 好得意, 不過唔知點形容, 要親身感受先知。仲有好似耐唔時都有d特別展覽, 而我去o既時候就有PIXAR o既展覽, 即係3D動畫<怪獸公司>o個間公司呀, 所以都有好多<怪獸公司>o既o野睇, 總之我覺得o黎個美術館好值得一去。我地o係入面行o左兩個幾鐘, 之後就上天台喇, 天台有一個好大個天空之城入面o既機械人o係o度, 之前睇人地去日本d相好多時都會見到, 今次終於都親身見到喇, 個機械人雖然唔係郁, 不過已經好正, 我地o係o度影o左好多好多張相先走, 天台另外仲有天空之城入面o個個正方形o既o野<唔知你知唔知我講咩>, 唔記得o左係咩o黎架lu。館側邊又有個露天小食檔, 行到餓都有o野食。我地足足行o左三個鐘先走。 宮崎駿美術館旁邊係一個公園, 叫井之頭公園, 個公園好大下, 春天會有好多人去o個o度睇櫻花。公園入面有個運動埸, 又有寺廟, 仲有個湖, 入面d魚超大條, 大到有d恐怖。今次o既旅行竟然有時間行公園喎, 哈哈~~其實行公園係我地o既行程之一, 因為去完三鷹之森之後就去吉祥寺, 而穿過井之頭公園之後就係吉祥寺喇~~ 去日本o既遊客都有唔少會去吉祥寺, 吉祥寺都幾旺, 又係有好多商店, 食肆咁, 基本上東京好多景點都係咁~哈。去到吉祥寺, 首先行o左一條唔係好知咩名o既街, 街道兩旁都好多舖頭賣D精品同一D特式o野, 此外仲有好多裝修得幾特別, 幾靚o既餐廳仔。行完o黎條特式小街之後我地就去搵牛肉球喇, 亦係去吉祥寺o既唯一目的。 炸牛肉球o個間o既叫”Satou”, o係吉祥寺站北口其中一個十字路口, 都幾易搵o既。一去到就見到有好人已經排緊隊買牛肉球喇, 條龍都幾長o下, 不過去吉祥寺都係為o左佢, 冇理由唔排架嘛。最終排o左成個鐘先買得工個牛肉球, 我發覺o係日本排隊買o野食平均都比香港慢, 之前o係DisneyLand買o野食又係排o左好耐!!!今次仲慘, 前面d 師奶個個都買十幾廿個, 賣晒之後又要等佢再炸過, 真係排到有d燥~其實個佢d牛肉球又真係唔錯o既, 200yen一個, 都幾大個, 幾香, 不過就覺得唔值得排咁耐囉。食完炸牛肉球之後都已經四點幾lu, 行多一陣吉祥寺之後就走lu, 感覺上吉祥寺都幾多o野行, 不過對我o黎講就冇咩好買, 今之日本之旅買o左好少o野咋, 大部分都係o野食。 行完吉祥寺見仲早, 於是就去多一個景點---六本木。我地o係吉祥寺站乖[JR中央總武線]往代代木, 之後轉[大江戶線], 唔使半小時就到達六本木喇。六本木係一個高級地區, 好似中環同金鍾咁, 有唔少o既bar, 比較多外國人出沒。我地去都係純粹去睇o下, 同埋去六本木Hills行o下。六本木Hills係六本木一個幾新o既景點, 係一個綜合式o既建設, 有飯店, 美術館, 庭園, 辦公室, 仲有酒店添。六本木Hills四周都好有時代感, 感覺好高級, 好獨特, 其中比較特別o既有大樓出面o個隻大蜘蛛o既雕塑, 六本木Hills頂樓o既觀光層<上去要1,500yen>, 仲有一條名店街<有好大間LV>, 兩旁擺o左好多設計獨特o既長椅, 又係成日睇人d相都會見到, 行過仲見到有架法拉利就咁泊o左o係街邊添!!! 六本木Hills附近又有個朝日電視台, 日本d電視台除o左係電視台之外, 仲係一個吸引遊客o既旅遊影點, 就好似o黎個朝日電視台咁, 用叮噹o黎做主題公仔, 大堂有隻好大隻o既叮噹o係o度, 另外又有好多叮噹o既紀念品賣, 當然唔少得好多電視節目o既介紹啦啦!!!我地都係o係大堂兜o左個圈之後就走lu。 六本木亦係一個觀賞東京鐵塔o既好地方, o係六本木好多地方都會見到東京鐵塔, 如果鍾意o既話,其實可以真接行過去添, 不過聽人講過去睇反而冇咁靚。就係咁我地o係六本木行o左個圈, 影o左好多相, 之後就回程返民宿喇。 o係六本木搭[大江戶線]往代代木, 之後轉[JR山手線]就可以返到巢鴨。返到巢鴨就去據朝早林小姐o既介紹, 去o左一間食豬扒飯o既舖頭食飯。間食店好近車站, 不過唔係好起眼, 我地叫o左個滑蛋豬扒飯同一個咖哩豬扒飯, 好好味, d豬扒炸得好香, 好脆, d咖哩又好好味, 食食就見到個老闆o係o度煮咖哩, 原來d咖哩係用d咖哩磚煮架, 佢仲切o左一粒仔俾我聞o下, 之後佢煮煮o下仲”筆”o左碗未煮好o既咖哩汁俾我添, 唔通佢想俾我飲!?哈~埋單都係1315yen, 好抵!!! 食完咁好味o既豬扒之後就返民宿喇, 入夜之後由車站返去條路都幾靜, 沿途都冇咩人行, 不過日本o既治安感覺上都幾好。夜晚間民宿o既入口更加隱蔽, 好彩朝早去過咋, 否則真係會搵唔到。我地book o個間係有私人浴室o既房<有d係同其他人share浴室o既>, 仲有廚房添, 訓塔塔米, 7500yen一晚, 價錢都ok啦, 其實酒店o既價錢都唔係貴好多, 不過未試過住民宿想試o下嘛。間房都幾好, 幾乾淨, 仲有就係間房大過之前住o個間酒店。返到房沖涼刷牙之後就訓喇, 今次個trip其實幾harsh, 日日都係好早起身, 夜晚九點幾十點幾先返去, 所以日日都好累, 不過又覺得好充實, 去o左好多地方, 睇o左好多o野, 咁累都係值得o既~~ |
|||||||||
|
|||||||||||||||||||||||||||||||||||||||