Viewed:1731
|
|||||||||||||||||||||||||||||||||
|
|||||||||||||||||||||||||||||||||
| |||||||||||
| [leave message] [e-card] | 
|
From: darkside (Nov 11, 2004 17:37 HKT) ~Written By Pigfong~ 今日又係一早就出門口喇, 因為要去兩個重量級地方 - 淺草&台場, 首先係搭山手線去上野, 再轉銀座線到淺草, 我一路對淺草o既印象就淨係雷門大燈籠同仲見世商店街, 仲硬係覺得係帶點鄉村味o既地方, 但一出站至知道原來淺草係城市地方,雷門寺同仲見世呢d特色野只係佔左好少部分嫁咋. 約09:30就到左雷門大燈籠喇,果度已經好多人響度影相喇, 我地當然唔執輸啦, 跟住就入去仲見世商店街掃手信喇, 真係好多人形燒呀, 米通呀, 鎖匙扣等等 o既手信, 樣樣都好吸引呀, 真係擺到明呃遊客錢呀, 但又心甘情願比佢呃喎, 因為包裝實在太精美喇, 唔食得都睇得嘛, 所以都買左好多人形燒同其他特色野,但都留番d quota去上野再買過:p. 而我地亦專登唔食早餐來掃街, 食左叮噹燒餅呀, 炸白色波波 <唔知咩來的, 但幾好味>同人形燒, 好正呀, 係臨尾見d類似湯丸o既串串好似幾吸引諗住試下啦, 點知竟然又咸又甜喎, 勁難食呀, 發誓以後唔會再食類似o既野呀. 沿住商店街一直去就係雷口寺喇, 又影左好多相, 跟住就趕去台場喇, 我地得唔夠半個鐘時間要搭兩程地鐵再去碼頭搭觀光船, 原本都諗住應該趕唔切, 但都要搏一搏, 行快幾步先, hehe, 但快步去車站途中竟然見到傳說中o既屎屎大廈, 點都要影番幾張相留念至得, 影完就搭都營淺草線去新橋, 跟住再轉百合海鷗號去日之出, 響轉車時爭d迷路呢, 好險, 其實百合海鷗號係一架無人駕駛o既列車, 由新橋去台場o既, 由於我地想搭觀光船睇風景, 所以就響日之出落車, 其實果時真係好趕, 落車時仲爭幾分鐘班船就開嫁喇, 你都知日本人幾準時嫁啦, 所以我地即刻出盡力咁跑, 點知又行錯少少路喎, 去到碼頭即刻拎我地d資料指比個姐姐仔睇, 買完飛一入閘又跑, 點知閘口個哥哥仔叫我地等等喎, 我地以為咩事啦, 原來佢叫我地Slow呀, 好瘀添, 一上到船終於明白點解唔駛跑喇, 原來成隻船得我地兩個乘客咋, 好似包船咁呢, 於是我地掉低d野就周圍影相同睇風景, 我地由遠處見到彩虹橋到坐住隻船穿過彩虹橋底, 天氣又勁好喎, 一個字: 正~~ 好快就到左台場海濱公園喇, 果度都幾靚, 隔離有個沙灘, 又可以見到彩虹橋, 係一個好好o既拍拖地方呢, 由於阿鋒話等多幾個字架銀河鐵路999觀光船就會到, 所以我地死人都等啦, 難得可以親眼見到佢喎, 唔駛講, 呢幾個字又係影相o既時間啦, 我地仲見到好忠心o既肥八哥同好fit o既哥基仔仔添呀, 好開心呀. 唔經唔覺隻999就到喇, 之前見佢d相仲以為佢好大隻好宏偉o既, 點知原來好細隻嫁咋, 但真係幾型囉, 好似太空船咁. 睇完船仔就去Decks度搵個locker 鎖住d淺草戰利品先, 跟住就去左築地玉壽司, 我地又係叫一個餐兩份食, 而呢個玉壽司聽人講又話幾好食, 但我就覺得普通o者, 唔夠新鮮, 所以快快食完快快走lu. 跟住我地就去下一層行台場一丁目商店街, 呢度係日本昭和30年代氣息 o既一個地方, 無論係d 裝修佈置, 定係賣o既食品, 文具同玩具都好懷舊feel, 樣樣都好得意, 我地響度都行左唔少時間啊, 係阿鋒見唔對路的我走我至依依不捨咁離開咋. 之後我地行去Palette Town方向, 沿途見到傳說中o既大觀纜車<即係幸福摩天輪呀>, 好大個呀, 每個車廂都唔同顏色嫁, 好靚, 聽講夜晚仲會變色添呀. 影完相就行去左Mega Web豐田汽車會館, 但果度好似裝修緊, 唔係好多車咋, 跟住我地就過左對面o既Venus Fort行左陣, 呢度o既特色就係裝修到好18世紀歐洲feel, 好高貴好典雅, 個天花仲會變嫁, 一時係晴天, 一時係黃昏, 都幾靚嫁, 但d商店就高級左d, 唔岩我地行o既, 所以見識完就走lu. 玩左咁耐差唔多日落喇, 於是我地趕去富士電視台, 去果度做乜? 睇日落囉, 果度有個球體瞭望台, 聽講睇夜影好正嫁, 但係有料o既, 但無所謂啦, 上到去又真係幾靚咁喎, 仲隱約見到富士山添呀, 又見到彩虹橋同鐵塔, 我地等左大半個鐘就睇到日落喇, 好靚好靚呀, 日本o既夜景好靚呀~ 日本人都幾鍾意玩吸印仔嫁喎, d車站有啦, 連電視台都有喎, 於是我地睇完夜景就去搵印仔, 順便參觀下電視台咁啦, d場景都幾得意丫, 可惜我地撞唔正人地拍野丫, 最後儲齊晒d印仔, 仲有紀念品添喎, 係一疊memo紙o黎o既, 好野. 富士電視台自己都有間紀念品舖頭, 賣d卡通呀 同佢自己設計o既公仔o既紀念品, 都幾識做生意嫁喎,唔知香港o既電視台會唔會效法日本o既電視台咁樣賺錢呢….. 跟住我地去左對面o既Aqua City度, 果度睇到自由女神像 + 彩虹橋, 於是阿鋒又影左好多相喇, 而影完之後阿鋒至發覺唔見左張車飛, 但去左咁多地方, 都唔知去邊度搵, 唯有再買過啦. Aqua City有間舖專賣手信嫁, 有好多特色同期間限定o既野, 又係好吸引呢. 之後就返Decks喇, 因為要食期待已久o既和幸炸豬扒呢, 就響今朝o既築地玉壽司隔離之嘛, 聽講果度d炸豬扒好正嫁, d飯同味噌湯仲可以免費叫佢添嫁, 但價錢就貴d, 不過豪比佢啦, 我地叫左兩個set <難得可以一人擁有一個>, 一個係炸蝦 + 炸蟹餅 + 炸豬扒, 另一個係蛋蛋豬扒, 響等o既時候阿鋒又影相喇, 因為我地坐果度係睇到好靚o既彩虹橋夜景嫁~~~~等左唔係好耐就有得食喇, 真係好豐富呢, 個炸蝦, 炸蟹餅同蛋蛋豬扒都勁正, 個味噌湯有蜆仔嫁, 另外仲有d沙律同菜, 好美味好滿足呢, 果然冇介紹錯呀. 食飽飽就行去睇大觀纜車喇, 真係好靚呀, 佢會變唔同顏唔同花款, 我就猛咁望住佢發呆, 見到d精彩圖案時就響度狂叫: 好靚呀, 好靚呀, 好似個傻婆咁, 但真係好靚好有創意丫嘛. 睇完都好夜喇, 於是我地行去青海站搭百合海鷗號返新橋, 再轉山手線返巢鴨, 跟住又去Seiyu買野飲同打電話就返民宿lu, 今日過得好充實好開心呢. |
|||||||||
|
|||||||||||||||||||||||||||||||||||||||