今日其實幾開心同幾好笑，有時候我發覺自己其實可能真係低能架！朝早返去本來想同個亞KARL講，叫佢唔好咁怕羞，要多d同同事溝通，咁做野先會更順利。咁我既開場白係問佢！"呀！你中學既時候係讀男校定女校架？"跟住佢定一定，望住我笑左一笑，答我："我讀男女校！"救命呀！我點解會問佢條咁既問題架？佢係男仔，又點會讀女校呢？連我自己都笑到跌左落地，仲笑左自己一日。唉！以後真係要清醒時先好問人野。搞到我原本諗住同佢講既野都冇講！@_@
跟住午飯時，我同蔡蔡去左愉城食飯，最後我地揀左札幌拉麵黎試，間野完全滿足到我既要求，食肉食菜唔食飯，我覺得幾好食，而且份量仲多到可以打包返去食多餐tim！不過蔡蔡話個麵就普普通通，唔係佢喜歡的那種！而我地食左成半個鐘，成間舖都只係得我地兩個客人，後來就入左幾枱客，可能係未到食飯時間lar！不過入黎既都有兩枱係日本人，可能間舖係啱番日本人既口味lar！
夜晚又要普通話測驗，所以一返去就搵左小慧笨，請佢幫我將琴晚預先寫好的講稿錄音，方便我溫習。咁我開完會，教完小朋友之後就係咁聽係咁讀。而亞呂就因為勁多野做而一D都未溫過！認真大鑊！於是我地一放學，就搭的士去佢屋企聽錄音、溫書，跟住返學測驗。今次係普通話口試，到我既時候，我一開始就緊張到唔知老師講乜，佢叫我俾返份卷佢，我都聽唔明，要同學提我先知。跟住讀完篇文章，到自己預備的短講時，我先發現自己拎錯文章出去，真係樣衰！連我自己都笑左出黎，其他同學當然勁笑lar！哎呀！我今日真係好低能呀！救命呀！
