今日一早起身，公眾假期都早起身？做乜咁奇怪呢？哦！原來係約左爸爸、媽咪同家姐一齊去行山，是關亞爸成日話自己一個人行上去城門水塘，佢又唔識路，自己又走去探險，最頂癮係佢冇乜安全意識！(即係佢帶得200-300ml水，又唔帶遮，又冇帶食物，有次仲電話冇電tim！)咁就 學人去行山，你話遇見迷路或者馬騮襲擊，咁咪好大鑊！最慘係佢唔係太熟城門水塘ma！我聽到都有d驚！所以就話同佢去行下，起碼話佢知d路由邊到可以通到邊到！第二時佢行山，我都安心d！
一早拖住三條友去行山，你都咪話唔煩！我亞爸同亞媽既生活情趣係鬧交，一日唔嘈唔安樂，由搭車嘈到上山，真係攞左我條命！anyway陪下佢地都係好事！下次我想同佢地去行山頂，下個月先lar！畢竟這是巨大工程，我要d心理準備同時間回下氣！@o@
我地去完行山就落荃灣買野俾媽咪，跟住就食午餐。間和民居然執左，搞到亞爸亞媽白行tim，真衰！於是我地只好去元氣食野，好彩冇執到。食完野，我約左朋友係中環，跟住我就去左剪頭髮，其實一直都想剪，但係之前換左個髮型師，佢叫我唔好剪，繼續留d頭髮，仲要電大佢。OH!最後個頭好樣衰！而家剪左又覺得自己似小學生，頭細身又大，唔係好慣！ 另外，今次去呢間髮型屋係中環，$480就可以包剪、包電、包染乜都得！我今次就做左負離子直髮，而且仲剪短晒d頭髮，幫我洗頭的男仔，同髮型師都問我有冇唔捨得，會唔會喊，冇喎！我以前都係短頭髮架lar！後來懶，所以先留長啫！(當然有人話鍾意我長頭髮個look喎！是但lar！已成過去！而家乜都唔理架lar！)
我由4:30坐到8:30pm，搞鬼咁耐，想死，我就係好怕要我坐定定！殺死我好過！整負離子有好多工序，搽完藥水，又要用機焗，跟住洗頭之後又要用夾夾直佢，以為ok，就走得，點知又要搽多次唔知乜野黎定型，跟住再洗，再做treatment，之後又要洗，先可以吹完再剪。
OH!這些浪費時間的事，在人生中真的不可以做太多次，否則連我自己都會頂唔順，大叫救命！(雖然我經常都將時間浪費在無聊事上，hehe~~~~ )
