Hello Everybody~~ 歡迎大家光臨這個由7位到柬埔寨既戰士所編寫的travel diary.

7位戰士到柬埔寨的5天之內,彩虹竟出現了兩次!!!!(7=5+2) 有見這群細路同彩虹和七字都如此有緣, 7小褔都無理由唔叫自己做彩虹戰隊了......=.=''

Rainbow的主幹有:

紅---Gutgut, 橙---龜屎, 黃---Lisa, 綠---DVD,

青---趙靖, 藍---花花, 紫---Porpor 

出發喇~~

註:travel diary中不同color的文字就是屬於該color的戰士所編寫的.

14Jun 

08:55 Dragon Air KA206 HKG>>PNH

倒塔咁早起身，因為八點幾飛機，要六點半到機場。籌備時間長達半年多既柬埔寨之旅終於開始喇！！稍微遲到左，check-in之後就去食第一個早餐──Burger King，然後唔夠兩個鐘又食第二個早餐──飛機餐，已經唔係好想食。到步之後，即係又唔夠兩個鐘又食中午飯，完全無辦法食，仲要有成八九個餸咁多，好浪費。唔知做乜，洗碗既時候竟然打爛野…

出發前最擔心既就係唔知會同咩人同房，最後原來係一個剛剛畢業既斯文型仔洪哥…即刻定左好多

終於開始行程，雖然落住毛毛雨，但係因為咁先會涼左好多，行得幾舒服。一開始去左幾個細景點，包括睇金塔山啦，邊婆婆啦，金銀閣寺啦，最有趣既就係叫‘七頭蛇’既神獸，好似係代表皇帝既…即係皇帝就係七頭…

去左個賭場…無聊到爆，我最憎就係賭錢架嘛！！！

全日最大既景點就係施漢諾親王皇宮，傳統柬埔寨混合法國式既建築，好特別，都算係好宏偉…可惜可能個國家真係太窮，好多地方都殘殘破破，慘慘地咁

原來晌柬埔寨既法式建築係唔俾拆既…其實都已經唔係自己既殖民地，點解法國佬仲要晌人地身上放下烙印，係要證明自己曾經晌度執過政？好似咁幼稚咁既…明明歷史本身已經係改變唔到架啦嘛

四點幾就返酒店然後六點就食飯…超早…不過可能今朝太早起身…所以都係十點幾就訓lu…其實晌隔離房傾左陣計，一路都無人過黎玩，所以先咁早訓

領隊姐姐Suki話：有兩個篋好鬼重，尤其係呢個…(指住我個篋…)

15Jun

今日全部行程都係自費活動…點解旅行團會有一整天既自費活動…仲要晌柬埔寨呢d唔跟個團行既話就無其他野好做既地方…

一開波去當地人既渡假地方──Sunday Market，其實係個類似條蚤市場既地方，不過主要係俾人買野食晌河邊帳篷下面慢慢食。有咩食？有蝦啦有魚啦，仲有蜘蛛蟋蟀同烏龜添！！真係嚇死人！！導遊阿德每樣買左隻俾我地輪住渣晌手影相，原來佢地都既‘實淨’gor喎…不過真係唔會擺入口囉…自從好多年前食‘龍虱’搞到我勁驚小強之後，我諗呢ｄ野都係唔好亂咁試…

擾攘一輪之後晌市場後面上船遊河，幾舒服好悠閒…但係諗返轉頭平時呢ｄ船係做乜既呢？點解成件事咁旅遊節目既？

上返岸之後領導Suki就俾左ｄ大樹菠蘿同ｄ奇怪既山竹俾我地食，山竹奇就奇在剝左殼食ｄ肉既時候，原來舊野九成地方俾粒核霸左…根本無野食既…仲有既野食就係個超超大椰青(我既仲要大過其他人既大約三份一)…我諗入面有成Litre水…飲到我超飽

完成呢個checkpoint之後又係食…不過唔記得食左d乜lu

緊接去獨立紀念碑前影兩張相，係我地第一次既跳跳相…我覺得我影跳跳相真係唔差架啦…但係朋友們實在係跳得好唔齊，一個跳完第二個先跳…真係捕捉唔到呀…

下一站去萬人塚…晌個度死既人有男有女有老人有BB…竟然可以將成個幾層樓高既塔都堆滿左人頭…好多個頭都有傷痕晌度…赤柬d人到底係咩心態既呢…就算個阿頭係黐線既，唔通佢ｄ手下個個都係癲既？點解可以三年幾間令三百幾萬人死左？真係諗唔明

去機場，等搭飛機既時候，吉吉輸左潛烏龜，所以要扮龜晌地下爬…

要搭螺旋槳內陸機去暹粒，嘩，暹粒個機場真係簡陋到爆，落機行幾步就到拎行李既地方，行李輸送仲係全程人手…

拎完行李上車一望車尾…短短兩秒間我既火就黎左…姓p名k既兩公婆晌車尾一人霸一邊，叫其他人點坐，我同洪哥兩個都有個背囊…佢兩個都無諗住讓…你地咁有型你地唔自己包車？！？

又食…hm…真係差首都d野食少少…不過d茶okay呀，係有少少奶臊味jeh，無乜問題呀，點解好似得我飲既

返酒店沖完涼去左玩飛行棋…太黑暗喇…我唔知規則係一個問題…最黑暗既係明明無輸到…竟然突然加插要罰埋尾二玩完既我…我覺得好屈囉！！仲有洪哥點解唔早ｄ訓呀，破滅左我唯一既希望

16Jun

終於黎到成個團既重頭戲──世界文化遺產吳哥窟喇！！

因為行程緊密既關係…朝早六點就要起身，七點就出發

今日天氣好好…真係要塗多d防曬

首先去每人影張大頭相印晌張Pass上面，但係張相掂到水就好易會化，化左佢就唔認，要再買過張Pass…所以去廁所同流汗都要好小心

去巴戎廟…超大，由個南大門去個廟都要搭車…黎到巴戎廟，雖然得返個廢墟，但係都感覺到佢曾經係非常宏偉既地方…其實我真係好鍾意睇廢墟架…keke…感覺好似當年去鬥獸場同雅典衛城咁…high high地

行左一陣黎到著名既‘高棉的微笑’…講真如果呢個笑面唔係被欄住左既話，我真係唔識分邊個先係‘高綿的微笑’…因為呢個笑面周圍都係

影左一輪相之後去女皇廟…呢度用既石頭係咁多間廟之中最硬既一種…所以一d都無風化到…但係佢d雕刻偏偏係最深既，仲有就係好細緻，好似張畫咁靚…導遊小明話到依家都唔知當時d人係點樣雕用咩雕…唔通真係外星人？！？

黎到午飯時間，風味餐…一坐落黎第一個上既係沙律…一擺落黎條菜下面爬左隻小強上黎…個店小二仲想就咁拎走佢碟野照俾我地食…你係咪黐線架！！成餐飯都無乜食，亦都無講野咁滯…講真污糟我真係唔怕，但係見到小強我既食慾就真係原全無晒…

去博物館…跟團就係唔好呢樣…博物館都幾多野睇，但係每個館都真係睇幾個有代表性ｄ既展品就撤退，行無兩行就出返黎

明明入博物館之前都係曬到爆架，點知出返黎既時候好似打風咁喎…橫風橫雨，我地仲有小吳哥未去架，仲要睇金色吳哥架嘛！！

好彩到小吳哥既時候開始停雨，仲可以影到小吳哥with倒影…美中不足既就係因為唔夠一年前有個法國佬曾經晌上面跌落黎跌死左，所以依家唔俾人爬上最高層…失望，明明好安全，仲有條木樓梯添…點解唔俾上呀

都係死心喇，無可能睇到金色吳哥喇，雖然已經好神奇咁出返太陽，但係仲係好多雲…正準備撤退既時候藍戰士阿花忽然大嗌有彩虹！！嘩！仲要晌正幾個塔上面…勁好彩！！大家即刻拎相機出黎影影影…但係當我地諗到d特別野想影既時候，彩虹已經消失左lu…不過都已經係超幸運喇！！仲要係好似全團人得我地幾個留意到

Checkpoint完晒之後就去食自助餐睇民族舞…野食同舞蹈都唔係太吸引…最印象深刻既除左rice pudding之外就係食玻璃大既同志們…呢d真係中國人既驕傲，就算去到人地國家都可以當係自己屋企一樣

全晚最好玩既就係當表演完畢之後，我地幾個上台表演…

17Jun

今日主要係自費活動遊洞里薩湖，導遊小明話有十個香港咁大架！！雖然我唔知佢講緊既係香港島定係乜野…總之係好大啦個湖！！

酒店出發‘熬’左一陣車（有一段係真係好‘熬’…頭都想甩出黎）去到個碼頭，見到船費係US$1一位，但係呢個團收左我地US$8…好彩我地有錢jek

上左架艇仔後就晌條河出發…嘩，ｄ水好黃，以為呢條係黃河…條河幾特別，兩邊都係水上人家，而且除左住人既水上屋外，仲有水上學校，水上雜貨店，同埋水上桌球室同水上籃球場添呀！！

出左河之後終於見到個湖…搞錯，點解成個海咁既，無對岸喎…爬左上架艇上層，舒服好多，雖然個頂好似有ｄ唔穩陣

留左陣架艇就泊埋一間水上‘大濕店’，其實都幾冇野做，有ｄ鱷魚，有個拎住條蟒蛇既小朋友，有個tun黎tun去既狸貓，有個兩層既觀光塔，亂咁影幾張相就走lu

回程之後基本上全日都係廢既，雕刻館，寶石館，絲綢館，邊個先邊個後我都唔記得lu…剩係記得無聊到爆，去左好多次廁所

搭飛機返金邊既時候竟然重遇彩虹喎，仲要孖住…lucky！！！

到金邊後去左毛澤東大道食buffet，有BBQ大頭蝦，其他野食亦都好好，可惜我始終食唔到好多野，唔通我既食量已經cheap晒？！？好唔開心喎

返酒店後嗌左傳統按摩…係waste of $$…按完等如無按，已經係男人按架啦…好失望添

零晨時份，過左隔離房拍左個生日短片俾小便，我覺得真係好堅，晌咁既環境下竟然可以有蛋糕同蠟燭，齊晒ｄ野…我d朋友真係好堅

18Jun

話咁快就last day lu，突然晏到十點半先出發，好唔慣添，唔知做乜好

尾二既景點…波布戰爭陳列館…原先為一所學校，赤柬時期用左黎審犯迫供既地方…其實就咁望間學校，睇得出幾十年前起得出咁既建築物呢個國家都應該係經濟唔錯架，真係好惜…

原來可以有咁多變態既折磨人方法…夾手指甲，向後倒吊，浸水等等等等…全部都係黐線架！！其實全部都係懦夫既行為

希望快ｄ審赤柬啦，雖然好多野係於事無補，但都算係還返受難既人一個公道呀

小午餐──一碗金邊粉加一杯甜到爆綠寶奶茶…早知晌街周圍食…

最後景點──中央市場，一個類似女人街但係大幾倍既市場，賣ｄ衫呀小飾物呀king ling kan lan呀咁既地方…我諗住都係行下就走架啦…點知同行既朋友們竟然買到一袋二袋走，真係無辦法，呢ｄ就係實力既分野…買野真係唔夠佢地黎

然後我們就帶著依依不捨的心情到機場然後逐一（大部份啦）與團友們合照留念，還相約了互相send相啊

21:45 Dragon Air KA207 PNH>>HKG

返到香港既上空，嘩…好靚，望完人地既環境睇返自己地頭，原來香港真係好好好發達，同埋用電量亦都係好好好高，要珍惜呀！！

九點半落機，擾攘一輪，影左陣相之後就散band喇

遊後感

其實絕對可以自己去唔駛跟團，因為好多地方都有英文路牌…同埋見到好多遊客都係幾丁人就包架van仔周圍去，我諗都唔會貴得去邊掛

未去之前硬係覺得柬埔寨係一個好危險既國家，去完之後又覺得呢個國家其實幾可憐，由六十年代一個亞洲數一數二發達既國家，經過三年幾既赤柬統治之後，有學識有頭腦既人材冇晒，剩落黎既主要係農民…周圍見到d人都好窮，幾歲既小朋友都要出黎拎住ｄ紀念品向遊客兜售，賺返幾蚊美金…唯一好彩既就係佢有一個吳哥窟…如果唔係真係遊客都冇埋

好多野睇，不過可能真係太窮喇，文物保存好差，好多野都似係就咁擺晌度既，仲有好慘既就係ｄ壁畫雕刻，佢地想復修但係竟然連可靠既人材都冇…因為死晒…都好彩黎左，因為遲ｄ開放既野可能會越黎越少，無論係吳哥窟定係赤柬ｄ野

今次係我最無手信既一次旅行，剩係亂咁買左ｄ小食俾同事

柬埔寨…係一個好值得去既地方，可能係因為在下鍾意歷史野，尤其係ｄ古代既文明…除此之外亦有赤柬罪證，非常發人心省…一個人所有既野唔一定係必然，擁有就代表有機會失去，所以有既時候就要珍惜，同埋就係…有得食就食左佢！有得玩就玩盡佢！！

幾日都過得好開心，其實無論去邊，只要係一班friend去就開心架啦…雖然今次既組合有d創新，仲要跟團，但係我地依然可以照嘈，照周圍跳…

下次去邊好呢？我地要繼續向世界出發！！！