萬事得323(BJ) | 1498cc | MT | 出廠2000年10月 | 首次登記2000年11月 | 0手 | 已過了28萬公里

萬事得所生產嘅汽車質素一代比一代進步，到今時今日已經不難發現馬路上多好多萬事得車，
聽講萬事得用家都對佢地部車好滿意，欣賞佢好操控，舒適，外形又好睇。

不過，係 zoom-zoom 年代之前，一般香港汽車用家眼中，買代步車要可靠當然首選豐田，
對於愛揸快車又愛玩改裝嘅用家就會選擇本田，掃把佬，日產，或者三菱，
至於萬事得，好多時都只會係新牌仔揸，地盤佬揸，或者電視劇集入面嘅撞車或爆炸場面至出現，
因為當年萬事得車（除 MX5，RX7之外）都冇乜市，二手又平，撞散唔肉痛...

以前好多人話萬記既車冇力，鋼水差，容易壞，冇野改，偏偏我屋企人唔聽人講，係要試過至信。
2000 年，我剛考到車牌，當年去二手車場比較過好多 1500cc 車，始終發現 323 設備當時最好。
咁啱當時睇中部 98 年開 78k，女車主又唔肯減價，又咁啱當年新車棍波特價 89k，所以買新車。

就係咁，買新車一揸就揸咗就快 20 年，已經同我一齊跑超過超過 28 萬公里，
依然好精神，我相信佢仲可以同我一齊跑多好幾十萬公里都冇問題！

其實我覺得，車同人一樣，只要有定期保養，有運動，俾應有既心機去打理，咩車都一樣可以保持最好狀態。
323 雖然香港只打入家庭小房車市場，只有 1498cc，不過同一個車架，外地還有1600cc，1800cc，甚至有高性能版2000cc，
美國仲有 turbo 版，只係香港代理可能因市場原因沒有引入。
323 其實有一身鮮為人知既強健車架，配合一套手動波箱，加上合適調教，彎路操控性能實在有驚喜，
直接提升了駕駛安全性。323 絕對係一部經濟，舒適，慳油，設備整，安全，可靠又好玩的家庭車。