沖繩の旅行程簡介: Day1  Day2  Day3  Day4  Day5  Day6  Day7  Day8  睇相  有用連結

第五天行程 29/5/2008

瀨底島 (其他連結 (1) ) à 比地大滝 (其他連結 (1) (2) (3) ) à 邊戶岬 à 金剛石林山 à 沖繩縣道70號 à 名護鳳梨園 à CoCo Garden Resort Okinawa 

住宿 : CoCo Garden Resort Okinawa

今日係 SuperHotel 食完早餐就出發去一個叫瀨底島嘅地方，呢個島其他唔係好大，但係島上面都有一間 Resort ，但係外型睇落去就比例舊Ｄ ! 呢個島其實係無咩睇，不過係地圖到見到有一個島就去睇下啦….不過呢個島上面有得打 Golf ，如果有人有興趣又可以係到玩一日都得。去完瀨底島，就繼續向北出發喇，我哋原先係想去沖繩最北嘅地方嘅，但係係途中經過一個地方叫做比地大滝，係地圖到都睇過呢個名，經過的話就順便睇埋啦。大滝係日本到解作大瀑布咁解，好在今日嘅天氣比例好少少，如果唔係呢個地方就去唔到啦….點解 ?? 因為要行成個鐘先去到條大瀑布到睇架….係呢個大瀑布嘅入口到見到個牌介紹返呢條瀑布沿途有Ｄ咩睇，同埋有幾長，開頭我哋見到佢哋寫得距離有 1352m ，應該就唔係好遠，係一個鐘之內應該會往返到，點知一行就行咗成105分鐘 ! 因為又去上山又要落山，重要行吊橋……最後重行到成身臭汗添呀，不過其實都行得幾舒服，沿途一路行一路都見到有Ｄ牌寫有蛇同埋Ｄ唔知咩來嘅生物 ! 我哋一路行好耐先見到有人行返出來，不過就見到佢哋成身濕晒 ! 去到個瀑布，其實就唔係幾大下，不過係沖繩可能已經係最大….睇完休息咗一陣就行返出去，沿途有唔少人行入去睇，不過外國人多Ｄ，外國人比較鍾意睇Ｄ大自然嘅嘢多Ｄ ! 日本人都有唔少，不過我哋行到去個瀑布出入口時，見到幾個日本女仔準備行入去到瀑布到睇嘢，咁啱有個日本亞叔行完返出來，見到個幾個女仔一身嘅裝扮就同佢哋講咗幾句日文，我諗係叫佢哋都係唔好入去啦，因為路途都幾難行加上妳哋重要係著高跟鞋…不過個幾個女仔其中一個答咗佢幾句就行咗入去啦 ! 之後個亞叔係我洗面嘅時候無神神同我講幾句嘢，不過我都唔知佢講咩…可能係話個幾個女仔咁都行入去呱 ! 洗完面，抹咗幾下身，就繼續向北出發喇 ! 無幾耐就到咗呢個沖繩最北嘅地方邊戶岬。去到嘅時候見到幾架軍車停咗係到，呢個景點其實都幾靚，不過天氣唔係咁好，所以就差咗Ｄ。本來諗住揾Ｄ嘢食，但係附近基本上係無咩嘢可以食，於是乎就一路去一路揾食喇。跟住我哋就去一個叫金剛石林山嘅地方，其實睇Ｄ資料無咩興趣入去，不過係附近就去門口睇睇先…點知一去到個入口附近，即刻有個亞叔好熱情咁揮手，突然感覺到好似返咗大陸咁嘅，之後個亞叔重要行埋來我哋架車到…由於佢嘅熱情加上我哋無咩興趣，所以就同佢講行錯路喇…即刻走人。因為想睇下沖繩東北邊個景色，所以我就選擇咗經沖繩縣道70號返去護市。係沖繩嘅呢一面完全係兩種感覺，一路行都係山路多，重要係無咩人同車，沙灘都唔多個，同南面比較完全兩個世界，基本上真係好似鄉下地方…由於山路比較多嘅關係，所以會比行國道58行多成差不多二倍嘅時間，不過無咩所謂喇…睇下沖繩另外一面嗎…好啦…經過兩個幾鐘嘅車程終於去到名護鳳梨園喇…入去之前又係要買門票，先前已經係Ｄ雜誌都攞張10% Coupon，咁就慳返Ｄ啦…入到去，第一樣就係可以去座菠蘿車啦…座住呢架車就會帶你睇晒成個鳳梨園Ｄ嘢，其實呢個鳳梨完唔係咁大架咋，座咗大約15分鐘就睇晒喇 ! 之後先係戲玉啦…就係菠蘿酒放題同埋菠蘿放題。Ｄ菠蘿酒其實都無菠蘿味，不過飲落都幾Ok…Ｄ菠蘿蛋糕同埋其他菠蘿製嘅食品就真係幾好味啦…最後就係菠蘿放題，我哋係到都食咗唔少，因為先前都未食 Lunch ，所以都食得幾多嘢下…食到兩個人都飽晒 ! 最後緊係買返Ｄ嘢食啦…睇完呢個就要去今晚嘅酒店啦…Book呢一間酒店就因為我係網上面見到佢哋早餐個樣都幾正咁，同埋想住返晚好少少，呢間酒店兩個人住一晚要成¥12,000，係咁多晚最貴嘅一晚來架…不過去到都覺得好抵。因為呢個偉大嘅 GPS 關係，去到附近又係揾唔到間酒店，唯有人工GPS 啦….揾到間酒店，開頭覺得點解間酒店會係Ｄ民居隔離架，嘩~~重收呢個價錢，都無咩寄望…只係希望佢聽日嘅早餐好似佢網上面咁啦 ! 一入到去，就有一個神高神大好似亞步寬咁嘅人幫我哋攞行李，一入去個大堂，嘩~~~同外面兩種 Feel ，真係有Ｄ Resort Feel 喎…之後又比杯水你飲又比條毛巾你抹手，重比幾粒沖繩黑糖你食，跟住就揾咗個日本妹來幫我哋 Check-in ，完全係唔洗行去個 Counter 到，佢會幫你攪掂晒，真係服務一流。Check-in 完個日本妹無神神要我哋上一架車，我哋心諗唔係大到咁下…要用車先去到 ! 原來佢係揸架車去介紹間酒店有Ｄ咩設置，同埋車我哋去我哋間房。其實間房只係係個 Reception 行一陣就到，當佢話我哋知我哋住個間房嘅時間，嘩吓…我好似唔係 Book 呢一款個喎…間房門口可以泊車，於是我就問佢可唔可以泊架車係門口啦…嘩~~~正 ! 入到去間房，成間屋仔，好鬼死正呀 ! 重要好大間添啊，又個露台，重有香薰可以用添呀 ! 跟住就周圍影相喇，如果天氣好呀，重正呀 !! 跟住我哋就揸架車係間酒店到遊一個圈，睇到有Ｄ房就係另外一面嘅，我諗我係Book呢一款，但係唔知點解佢哋俾咗家下呢一款嘅呢 ?! 其實間酒店唔係好大，無咩景觀，不過都叫 Okay 啦…再睇下Ｄ酒店資料，原本佢係同另外一間Renaissance Okinawa Resort 係同一個集團架，唔怪得之咁好服務啦 ! 但係就唔知點解佢哋會 Upgrade 咗我哋間房呢 !? 不過唔理總之我哋都係俾返 Book 個個價錢就得喇 ! 攪下呢樣攪下個樣，又要去揾地方食晚餐，係去呢間酒店途中經過一Ｄ食肆，於是就去個到睇下有無得食啦…但係好多都係Ｄ居酒屋，因為入到去唔知可以叫咩食，重有就係落雨，於是就唔四圍揾啦，我哋最終都係食咗一間叫 HottoMotto嘅食店，開頭以為呢一間係好似Mosburger買飽食，但係係沖繩好多地方都見到你一間食店嘅蹤影，原先諗住食飽，但係入到去睇個Menu 原來係買料理食架….價錢重要幾Okay 添呀，我哋叫咗兩個餐加個菜再將一個飯轉做玄米飯，個收銀開頭個樣好古怪，但係佢Ｄ英文真係有限公司，所以無同我哋講…原本最後我哋係叫咗三個餐再加多一個飯，而個三個餐就每個都有一個飯跟…好在佢哋Ｄ嘢都幾好食，不過Ｄ返就真係食唔晒喇 ! 食完飯沖個涼就訓覺啦…因為今日都幾攰下…