朝早響酒店join埋同事就出發去八重州出車. 今次又俾到k-car, 坐兩個人連行李都唔逼
第一個目的地係小田原城. 由東京出發, 經過N個收費站同響海老名SA歇左陣, 終於響兩個鐘頭後到達.
今日天朗氣清, 沿途都睇到富士山, 到小田原時見到去箱根既車塞死哂. 好在無plan到入去, 如果唔係就徙左個太陽
小田原城好大風, 響天守入面都聽到d窗砰砰聲. 上到天守閣觀景走廊某一邊就更加好似打風咁, 企都企唔穩
呢度有d奇怪, 城入面有個馬騮籠, 又有兒童遊樂場(響天守閣隔離), 雖然個天守係重建, 但幾樣野擺埋一齊仍然怪雞
東南方係海, 藍得黎又有白頭浪, 幾好睇. 兩年幾前黎過小田原轉車, 到而家先望到小田原既景色
之後上車, 向奧多摩進發. 抄近路既關係, 響高速路中途就離開, 直上青梅轉入去
途中見到d餐廳, 先諗起要開餐, 但一路都揀唔岩, 見黎見去都係吉野家
終於去到八王子就見到jonathan's. 食飽就繼續行程, 入到去必經之路, 回程開始多車
下晝三點先去到鳩之巢. 影下車站, 睇下瀑布, 用左成個鐘
終於遲左去到主打既奧多摩湖, 到達既時候個太陽已經好準時咁響四點半收工
巴士站人龍超長, 私家車又陸續散去. 不過, 唔知係好定壞, 而家既奧多摩湖紅葉一d都唔紅
青青黃黃一笪笪咁, 真係掃興, 反而途中見到一d山谷都有唔少紅葉靚景, 可惜停唔到車...
影左一陣, 個天就黑齊, 剛諗住入去資料館, 就話關門, 唯有返去中途御岳睇夜紅葉
塞左好耐先去到, 望唔清入口所以miss左, 又用左一段時間turn返去, 發現原來個停車場已經關門
唯有行返去河既另一邊, 睇下有無得停啦(不過都係無). 落唔到車影, 就用對眼睇啦
打燈範圍都唔大, 但個景就真係幾靚, 好貼近我心中夜間紅葉既印象.
返東京仍然塞車. 不論係山路塞車, 市鎮塞燈, 定高速路唔知塞乜
總之就係無論渣左幾耐, 個car navi既預計到達時間仍然係一個鐘後
返酒店放低幾磅, 就搵油站將油缸入返滿. 沿途真係好多油站, 不過全部執哂
去到見到有營業既shell就唔諗咁多, 直駛入去, 原來係自助油站, 又可以平d, 都可以執返個桔
九點幾還車, 係東京租車既好處, 其他地方一般都收八點, 呢度就24小時營業
求其響八重洲地下街搵左間拉麵舖開餐, 之後就行幾百米去搭半藏門線返歸