肯尼亞 . 草原日記 ~ edd's picture -- fotop.net photo sharing network

~ 肯尼亞 . 草原日記 ~

此行到肯尼亞 (Kenya) 旅行八日 ( 9月 16 – 23 日), 與一位攝影技術很利害的老友同行, 大家都影個痛快.

Day 1 :

香港 -> 泰國 (加油, 上落客, 更換機組人員, 去肯尼亞的乘客不用落機, 停留約一個小時) -> 肯尼亞.

全程約 12 小時. 選乘 Kenya Airways. 機種型號 B767-300 / B767-300ER, 經濟倉座位 2-3-2.

Day 2:

瑪沙瑪拉野生動物保護區 (Masai Mara National Park)
04:00 am 到達肯尼亞首都, 奈羅比國際機場, 接機的是 Michael 及 Sammy. 我們先到

Intercontinental Hotel 吃早餐. Michael 為我們講解行程和在肯尼亞要注意的事情. 吃完早餐,

Michael 和我們說再見, 而 Sammy 就是我們的司機和帶街, 全程都是由他照顧我們.

由奈羅比開車到瑪沙瑪拉野生動物保護區, 車程約 300km = 6 個多小時. 中午到達

今晚住宿的酒店吃午餐, 3pm 出發 Game drive. Game drive 即是駕車找動物/觀看生態

*因安全問題, 途中不能落車*.

今日最大收獲就是日落 magic, 畢生難忘 !!

可惜只得我們兩條友, 如果能夠有多幾位好友一起拍攝, 一起分享, 就真的樂透了.

(住宿 : Mara Simba Lodge)

Day 3 :

瑪沙瑪拉野生動物保護區 (Masai Mara National Park)
06:30am 出車 game drive, 之後返酒店吃早餐, 其實唔算 “吃”, 而係倒落肚 … 趕快再出車 game drive.

去 Mara River 看河馬, 要付小費給軍人帶路參觀, 每人付 US$1-, 行路回程時, 那位軍人話唔夠,

每人要比多 US$1- ...

2pm 到達今晚住宿的酒店吃午餐, 3:30pm 出發 game drive, 影了很多動物,

今晚住宿的酒店在瑪沙瑪拉野生動物保護區閘外, 閘口關門時間是 6:30pm, 所以影不到像昨日的 magic.

亦因為轉酒店, 所以今日不能叫酒店預備 lunch box.

(住宿 : Mara Sopa Lodge)

Day 4 :

紅鶴湖 (Lake Nakuru)
7am 出車趕去今晚住宿的酒店吃午餐, 車程約 300km = 6 個多小時. 途中有一處地方有個特大泥洞,

要村民幫手推車, 他們好熱心, 當然熱心是要用錢買的, 他們七嘴八舌, 唔知 Sammy 比了幾多買路錢 …

過了之後還要找有高壓水搶的車房清洗車頭的泥穢, 1:20pm 才到達酒店吃午餐, 今日可以慢慢吃一個午餐.

3pm 出發 game drive 到紅鶴湖,

下午到紅鶴湖影相, 光源唔靚, 上車回酒店時, Sammy 見我們兩條友媽媽聲, 他說明早早一點出發再來.

今晚無 magic 影.

(住宿 : Sarova Lion Hill Lodge)

Day 5 :

阿貝達 - 樹頂酒店 (Aberdares - Treetops)
因為昨日落雨, 有些路架車會過唔到, 要改道去樹頂酒店, 令車程長了.
Sammy 的安排好好, (原本今早的行程是沒有紅鶴湖, 應該是開車直去 Treetops)

7am 出車到紅鶴湖影相 1.5 小時, 今早的光線一流 !! 之後趕車去今晚住宿的酒店吃午餐,

車程約 200km = 4 個多小時. 行車約個多小時後, 部車水箱水滾 !! 還記得昨日的特大泥洞 …

之後還要找有高壓水搶的車房清洗車頭的泥穢, 昨日高壓水搶只清洗外至內, 原來內部全是泥穢,

所以要回頭入 town 找高壓水搶清洗內部, Sammy 說今天的行程會大上斜, 如果唔清潔內部,

部車一定頂唔住 !! 回頭入 town 去大油站找高壓水搶清洗, 去到時, 有一架四驅車正在清洗內部

(和我們的情況一樣), 經過 Sammy 和那四驅車的車主閒談, 原來他也是昨日經過那個特大泥洞領o野,

要洗車. 那個特大泥洞是村民前晚做的, 還加水成為泥洞, 令車輛要他們幫手推才能通過, 要買路錢,

同老粒無分別呀 !! 聽講今天已經有警察去處理. 洗完車又要趕路, 途中到湯姆遜瀑布作短暫停留,

1:15pm 才到達 Treetops 的接待處吃午餐, 2:30pm 會有幾架 24座中巴專車會一次過送今晚入住

的客人上樹頂酒店, 車程 17 km 約 30 分鐘. Sammy 下午有時間出 town 入廠大清洗部車一次.

下午在樹頂酒店影相.

晚上在樹頂酒店吃晚餐,

認識了來自香港的黃先生和他的太太, 還有來自 Vienna 的 Mr. Markus. 大家一邊閒談一邊進餐,

渡過了一個愉快的晚餐.

(住宿 : Treetops)

Day 6 :

肯雅山狩獵俱樂部 (Mount Kenya Safari Club)
早上出發到赤道線, 在那裹有很多店子可以 shopping !! 因為店子很多, 所以講價的能力高了, 亦請注意,

原子筆在肯尼亞好值錢, 你可以講好價之後, 再加原子筆再講價. (原子筆 = 在香港文具店買兩三蚊一枝即可)

中午到達肯雅山狩獵俱樂部, 非常豪華非常大的一間酒店. 吃完午餐後全日自由活動, 有雀

有景 : Mt. Kenya

任影, 好正 !! 還有 4-6pm 的下午茶 (團費已包), 我能夠坐下休息一陣和整理這幾天的日記,

同行的老友去影相無 tea, 之後才知道, 我 tea 的時候, 他影到班魚狗定空, 走雞就話小事, 走狗就大鑊呀 … !!

晚上吃完晚餐,

影星, 天空好靚 !! 我的相機電同 ram 用盡, 只好 11pm 返房休息, 同行的老友影到 3am 才收工 …

真係要倒轉寫個服字比佢.

(住宿 : Mt. Kenya Safari Club)

Day 7 :

奈羅比 (Nairobi)
早上又係晨咁早起床, (例牌 5:30am) 此行最後出擊, 在俱樂部內影相. 9am 出車到奈羅比,

車程約 200km = 4 個多小時. 先去Intercontinental Hotel接Michael, 去食肉動物餐廳吃午餐

及 city tour, 行車途中發覺奈羅比市中心的街道很清潔, 下午到 supermarket shopping,

可以買一點咖啡豆/粉做手信.

下午到奈羅比國際機場, 與 Michael 和 Sammy 道別.

我們先去 airline counter check-in, 跟住去機場邊 (停車場) 影日落, 在鐵絲網外影入去跑道

和跑道的飛機, 日落做背景很美, 但影不夠兩張相, 已經有五至六個全部拿長槍的士兵和警察跑過來,

話唔驚就老點你. 他們問 : 影乜 ? 影到飛機 ? 影黎做乜 ? 點解影 ? 這裹不準影相 ? 邊處來 ?

你叫乜名 ? 影乜 ? 影黎做乜 ? 點解影 ? 知不知不準影相 ? . . . . . . . . . . 原來機場跑道範圍

因為保安問題, 不準影相. (但係用肉眼睇就可以) 要 delete 剛剛影的相和問話/道歉十五分鐘

才放行 . . . . . . . . . . 跟住我們兩條友要去飲可樂定驚 . . .

Day 8 : 下午到達香港

- - - - -

旅遊肯尼亞注意事項 :

** 去肯尼亞前, 最好預先打預防針和吃藥. 出發前一個多月, 請聯絡衛生署港口衛生旅遊健康中心

** SAR & BNO 到肯尼亞要簽証, 旅行社可代辦.

** US$1 = Ksh 70 (Ksh = Shillings)

** 到達當地不用換錢 (Ksh), 可全程用美金, 酒店和小店全部收美金, 就算唔可以,

可以叫司機出住先, 跟手比番美金佢. 出發前請先在香港換美金, “建議” 換 :

US1 x 30, US5 x 10, US10 x 10, US100 x 4. 如果你係勁 shopping 就另計.

** 肯尼亞以前是英國殖民地, 英語 OK.

** 司機即是你的帶街, 有乜問題都要問他, 全程都是由他照顧你.

** 電壓和插頭款色, 與香港一樣. 220-240v

** 電話 2G (出發前最好問問你的電話供應商). 當地打電話費好貴好貴, 無乜緊急事最好清靜幾日.

** 在肯尼亞的小店買東西, 一定要講價, 仲要講得狠一點 !! 有些小店的人開天殺價當你係水魚,

你唔狠D講價就真係對唔住自己.

** 肯尼亞比香港慢 5 小時.

** Game drive途中絕對不能落車.

** 因為安全問題, 入住酒店後, 旅客不可隨便離開酒店範圍.

** 道路網絡, 如果 100 分為滿分, 香港係 95 分, 肯尼亞最多最盡比 30 分. 整個行程的車程好長

和好震好震, 因為路面有好多好多洞, 有些跟本爛到唔可以叫 “路” !! 有暈車浪的人要考慮清楚先至去.

** 路上沙塵很大很大, 請時常清潔臉和鼻, 出發前最好不要剪鼻毛. 每次返到酒店房間, 請記得清潔攝影器材.

** 肯尼亞是有蚊的. 因為我們二人都比蚊叮過. 在 Mt. Kenya Safari Club, 我親眼看見有十幾隻蚊

在我頭頂, 好在有蚊膏. 請記得帶防蚊用品. (雖然唔係處處有蚊, 但是那裹的蚊唔同香港的,

叮中可能唔講得笑)

** 到肯尼亞唔好隨便影人, 要影就問o左先, 否則可能有麻煩.

** 水喉水不宜直接飲用, 每間酒店房間都有一或兩支小或中瓶裝水免費送比客人, 你或可帶水壼到酒店的飯堂

或 Bar 入水, 係邊個位有免費水入 ? 間間唔同 (未必有), 自己找找吧, 記住 “拿水壼自己去入水免費” …

“叫水係要錢的”.

** 每間旅行社做法唔同, 有些團費會包括送瓶裝水, 有些則沒有.

** 酒店叫 Beer 一支 = 約US4, 水一支 1L = 約US4.

** Supermarket買 Beer 一支 = 約US1.5 , 水一支 1L = 約US1.5

** 中途站 (商店) 買水一支 1.5L = 約US3.

** Tusker Beer 是 Made in Kenya 的啤酒, 很不錯, 值得一試.

** 行程會安排早午晚三餐都在酒店吃, 衛生 ok 無問題.

** 7-9 月是到肯尼亞旅遊的理想季節.

** 建議全程都穿著淺色長袖衫長褲, 早晚會凍一點, 帶多件外套.

** 全部酒店房間無電視, 怕悶的人要有心理準備.

** 大部份酒店, 房間洗手間熱水供應時間 [ 5:30-10:00 , 17:30-22:00 ] ,

房間供電時間 [ 04:00-10:00 , 12:00-16:00 , 18:00-01:00 ] , Check-in 時,

可在 front desk 問清楚.

** 記得帶電筒, 牙刷牙膏, 洗頭水沐浴露, 毛巾, 拖鞋, 傘或雨衣.

** 在瑪沙瑪拉野生動物保護區內, 可自費參加 “早上乘坐熱氣球 + 香檳早餐” 的活動套餐,

每位費用約 US$390- 因為外國人很喜歡參加這個活動, 所以會經常滿額. 建議如果想參加的話,

不要去到才做 booking, 可以在香港報名時, 叫旅行社代辦預約.

** 今次旅程, 香港報名旅遊肯尼亞為 8 天團, 實際在當地觀光得 6日, 如果你想多一些時間影生態,

可以報長一點日數的團, 例如 10 or 12 or 16 日, 當然要問一問你的旅行社有沒有得代辦.

- - - - -

木製的手工藝品是理想的手信, 大多以非洲動物為藍本, 很有特色.

- - - - -

一些關於肯尼亞的資料 :

>> 肯尼亞總統一次任期為五年, 最多可連任一次.

>> 肯尼亞當地有八個電視台頻道.

>> 在奈羅比, 普通人 (例如 : 文員) 每月收入大約 US$350-. 警察每月收入大約 US$380-.

(做公務員是有免費 housing 同醫療等).

>> 肯尼亞教育制度 : 幼稚園 1 年 (附設在小學, 可能要付費, 視乎公立/私立,

入學年齡約 5 至 6 歲) -> 小學 8 年 (免費教育) -> 中學 4 年 (需付費) ->

大學 4 年 (需付費 : 大學學費每 3 個月付一次, 每年付 3 次, 每次大約需付 US$2000-,

費用包括 : 寄宿住宿 / 食物 / 書薄 / 雜費)

>> 到肯尼亞旅遊 6 日, 未見過一支交通燈.

>> 肯尼亞主要的公共交通工具是 P.S.V. (Public Service Vehicle), 車種是香港常見的客貨 Van,

這些 P.S.V. 運作就像香港的小巴. (在奈羅比這個大城市亦有公共巴士服務) 另外, 接送我們此行的交通工具

亦是客貨 Van, 已經改裝過, 可以開車頂 Game drive 的, 車上亦寫有 P.S.V. 字樣, 這個 P.S.V. 有所不同,

我們乘坐的 P.S.V. = Private Service Vehicle. 政府牌費 : Private貴過 Public.

- - - - -

此行的裝備 :

Nikon D70, D50,

Nikkor 18-70mm DX,

Nikkor AF 35mm F2D,

Nikkor AF 80-200mm F2.8D,

Nikkor AFS 300mm F4D,

Nikon TC14E II,

Kenko 1.4x,

腳架.

此行的使費, (自己) 合共 HK$21000-

Kenya . Travel Diary . 2006 ~ edd's picture

Contact e-mail : eddyxeddy@yahoo.com.hk