「新加坡之行」太多的意想不到！

 

第一次，獨個兒出發！

第一次，送機尾...上唔到飛機！

第一次，在機場公眾電腦買即日機票！

第一次，極度需要人關心失落的心情！

第一次，獨個兒在機場露宿一宵！

太多可惡的第一次...但願不要再有下一次！多謝~

 

 

 

第一天：可怕的開始...

時間：16 April 2011

住宿：機場露宿者之家

景點：香港機場/ 新加坡機場 (Budget Terminal, Terminal 1- 3)

 

早上08:00出發，準備搭乘11:10飛機去乘新加坡並坐17:00船去民丹島找Rachel，展開我5天「民丹島+新加坡免費住宿之旅」！

 

我就在Jetstar counter發生了晨早第一激>>> 罰我錢，斗膽了！

 

原本諗住咩背囊...但因為要幫朋友買嘢~ 所以都係唔好辛苦自己搞到成棵聖誕樹咁...昨天已致電hotline問寄行李點收費？嗰位CS話只需HKD$120，在Check- in counter付款就可以！

...但，眼前呢位哥哥仔竟然要收本小姐HKD$320！佢話$120要24小時前申請喎,,,唉！都唔知係咪玩嘢...我個喼又唔可以手提上機...無計！算~~~ 不要影響心情...用錢解决吧！

 

Check-in完，為免一個人戇居居坐在登機閘口前呆等...所以我就塞住耳仔聽歌周圍行...

 

登機時間到了，我也行到閘前了...

 

咦...何解無人嘅？...我走向隔離的Counter查究一吓！『大…檸…樂…』轉了登機閘口！重要係由524轉咗去>>>4X！嗰位職員叫我快d跑去...我望吓張Boarding Pas>>Departure Time: 11:10跟住再望吓隻錶10:50…OMG…(>0<)…

 

我極地狂奔地跑向終點>>>正確閘口...已經是11:15！登機閘口已關了...飛機也已經飛走了！我第一次『送機尾』！我第一次自己一個人坐飛機出外就出事了...

 

為何我竟會如此不幸！我站著無言...一個人的時候理應提高警覺...我就真的是太大安旨意了...我不應該塞住耳仔聽歌...我應該提早時間到閘口...我太大意了...我在自責着...究竟，下一步...點算？

 

我去到機場服務櫃位說出情況，由專人帶領我行特別通道過關入返香港境並取回我被罰了$320的行李...

 

我竟然一個多小時後出現在 "Arrival Hall"…我是否在發惡夢？

我再次行到去Jetstar Counter問佢點解我check- in咗，佢地final call 唔見客都無開咪！如果佢哋有開咪嗌我名，我就可以在任何一個counter都可以叫航空公司等埋我！

...答我嗰位大哥...毫無表情咁話「佢哋公司一向不等客，不叫咪，夠鐘就起飛！」

我頂你...俾少少同情心好喎...洗唔洗咁講嘢先？假若是平時的我，我一定開波插佢...但此時此刻我只想盡快離開香港到新加坡並趕及一早買好的17:00船到民丹島！

我再問「咁我依家買下班機票幾錢和幾時有機？」

可惡的繼續毫無表情咁回我「何小姐，下班機今晚八點半，機票價錢$50xx」

我嚇到瞳孔放大兼魂飛魄散...(@0@)…五千幾蚊！儍咗呀？...我真係好想放火燒咗Jetstar個counter！

 

我離開...行去CX counter問一問...

他們相當禮貌地回我一個更可觀的價錢>>>>八千幾！(唔係啦啩...八千幾！！！@0@)

嗰個女仔同我講話counter即場買機票，價錢一定最少貴兩倍的！叫我找agent或上網買吧...

 

我像喪屍似的行到去Pacific Coffee…買了枝橙汁找個位坐下來！何慧萍需要停一停，諗一諗...冷靜處理現在極糟透的狀況！

 

三選一：
1)  回家>>消假>>取消行程>>星期一返工！

2)  回家>>上網買明天機票>>明天再同一時間嚟過！

3)  現在上網睇吓有無其他廉價航空今天有機去新加坡>>然後再買新船票去民丹島

 

我想我當時應該呆坐了一個多小時！

最後，我在Pacific Coffee的電腦看了各大廉價航空，最終...我決定了「3號」！

 

行動一：我買了Tiger Airways單程/今晚18:30>>HKD$ 1,667！

                (呢張單程機票已貴過我Jetstar套來回機票)

行動二：上網買明天08:00去民丹島的船票>>>單程SGD$30
                (我原本套新加坡來回民丹島船票才SGD$47，現在單程也要SGD$30)

 

以上行動使我額外用多了$2000！我這次新加坡之行，本來就是因為機票平又可痴住Rachel有免費住宿，我才單枝行動的！現在未出發已破財，真係貪字得個貧！

 

雖然萬惡的錢幫我解決了當下糟透的現況，但我的心情並沒有因此而轉好...因為再加上了一些「... ...」，此時此刻有誰共鳴？

如果可以用錢買一些「心靈上的安慰」...我願意揮金如土一擲千金！

 

今晚11點到新加坡，明天8點船去民丹島...咁究竟今晚死去邊好呢？唉~

呢一刻更加想喊T_T...我不再想了...去到自然找到今晚容身之地吧！

 

我心情沮喪地呆坐4個鐘頭後，又去Check-in了！航班是18:30起飛，我17:30已經企定係閘口等，我沒有再塞住耳仔聽歌也沒有看書，我必需保持神智極度清醒...我害怕再又其他新野玩我！

我足足在機場磨了9個鐘後...離開了！我第一次祝自己「一路順風」！希望明天順利無穿無難去到民丹島！

 

我晚上10時多到達新加坡，在機場和3個德國來的女孩搭訕睇吓佢哋住邊！她們說Booked了hostel床位EURO $20/晚...都要成$200+港紙！WoW…OMG~

我諗咗一陣...我決定瞓機場好了！因為明早07:00就要到碼頭，還是不要再走來走去了...這幾個鐘就流連機場吧！

 

新加坡樟宜機場超大！有3個客運大樓，三個大樓以Skytrain(無人駕駛列車)來做連接，遊人可隨意搭乘Skytrain穿梭Terminal 1- 3。

 

我既然無所事事，第一景點就坐Skytrain遊覽機場並尋找今晚容身之地吧！

 

Information Counter位服務員超好~~~~ 介紹咗一個好地方俾我瞓覺！

4/F, Terminal 3- Changi Aviation Gallery

此處超靜，只見有幾個人已經在大覺瞓...而且很少途人經過...好~ 就此露宿一宵吧！

決定了我就跑到Basement 2先將我的行李喼寄存！多謝SGD$4！免得我真係瞓著咗...個喼有腳走咗去...我變得小心了！

 

然後再跑回4/F找個好位就枕入夢....錢和證件跟身，手提袋做枕頭！

堂堂何家大小姐竟然在新加坡樟宜機場第一次一個人獨自露宿街頭...成件事錯哂！我好唔鍾意2011年4月16日呀！Z…z…Z..zz….

 

 

  

第二天：今天會更好！