Moonwalkers 2009 -- fotop.net photo sharing network

在公司收到「奧比斯盲俠行 Moonwalkers 2009」的活動詳情介紹和報名…我是不知點玩也沒有興趣去玩的…但，Bonnie打嚟叫我去行...因為佢就嚟要離開我喇…好！妳叫我~ 我就逢陪到底啦！GoGoGo~

朦茶茶就報咗名….出發前一個星期我先知原來係夜麻麻先出動…重要行好耐的…嘩~ 繼黄山之後又無啦啦整蠱自己！我點解會扮哂型咁一口應承Lobon嘅呢? 我開始…後…悔！

起點由沙田運動場行到終點大美督水壩直升機坪…究竟20公里要行幾耐? 唉~ 對於不是夜歸人的我再加埋重陽節苦登黃山嘅經驗，我今次一要做足準備！

11月21日，天氣寒冷 (只得13度)

為了迎接晚上10:30pm招集的盲俠行，我下午特意食安眠藥迫自己瞓一個晏覺~Z...z..z...z...免得灰姑娘半夜十二點要趕返屋企瞓覺…

穿上厚厚的外套，全副裝備，準時21:00同Lobon係沙田新城市廣場晚飯醫肚…食到超飽…會合埋Yandy & Bess我哋就出發去沙田運動場集合！

奧比斯「盲俠行」步行籌款活動，是為失明人士籌募救盲經費的~ 今年是第四屆..據現場報導所講有成萬幾人參加~ 場面好熱鬧，報到時每人獲派一個福袋禮品包 (裏面有好多嘢玩~ haa)！

因為我哋以公司名議報名，去到就梗係第一時間揾d同事影「大合照」~ 然後再嚟一大堆搞笑相23:30排隊出發。

何小姐又一力作“灰姑娘午夜長征20公里”正式開始！！

整整20公里的路程我由23:30行到06:30…成晚一點睡意都無 (果然瞓咗晏覺醒神哂~)…但倦意就係02:00已經開始蠶食我嘅意志…

路線很好行~ 沒有山路而且是沿海行~望住個海景吹住海風加寒風，而且要本人深宵時分上街的活動確係極少見！

來看看路線圖吧！

沿途之最

最寒冷之時：白石角海濱公園長廊…風在吶喊，凍到震騰騰！

最溫暖之時：係馬料水海旁我哋係小食亭買魚蛋、燒賣食($15一小碗..超貴)...我相信那是該店全年生意最好的一天！haa~ 爆晒數~

最精神之時：路程中，有義工隊在不同的check point加油吶喊，並在各個中途站派發糧水，小食(M&M、旺旺、朱古力餅…)補充體力！加油~ 我哋支持你！

最舒服之時：在大埔海濱公園長廊望住吐露港吹住海風沿海行，真係又凍又舒服~

最難得之時：快到大尾督的一段路，天很黑燈光少，看得見漫天閃爍的星星光芒。(我每晚向窗外看，都只會望到無盡的海和永無星的天！市區的天空實在太難見到星星了…)

最搞笑之時：出發前，在看台上整紋身貼紙~ 整色整水，影咗好多相…超搞笑！同埋係白石角海濱長廊蒙眼步行… 蒙眼夜行大考驗~ 正！

最有衝勁之時：每當見到 “XX km”牌…我哋就係最有衝勁~衝埋去影相…也意味著我哋又邁進一步，終點！終點！

最醒晨之時：凌晨04:00打俾其他分道揚鑣比我哋行得快嘅同事問吓情況…嘩！佢哋已經行到17Km…我哋4條友才剛剛過咗個“11Km牌”到達大埔海濱公園…死梗！以呢個速度08:30先會到終點…
我哋係嗰刻開始由Lobon率領大軍(只不過係我哋4條友…haa)唔准再Hea或坐低抖…要大步向前走！…我哋突然間好似裝作「摩打腳」咁…行得好快… Non-stop Walking！

最想放棄之時：行完大埔工業村段時，終於見到有的士經過~ 我好想放棄“打的回府”…但已經行咗大半了…點好呢！？走/唔走？
我同Lobon又好似返工嘅鬥心咁…一係唔跑，跑就要到！好~ 「革命尚未完成，同志仍須努力！」「堅持！堅持！」

我哋係06:30到達終點，估不到我們後勁如此凌厲…終於，成功！很有滿足感！yeah~~~

長征20公里終於攞到張證書加送一份三文治，我哋就一人整返一張〝畢業相〞…就落返去揾大會安排的免費大巴由大美督返回沙田巿中心，一上車，我就瞓著覺…

落咗車，Bess & Yandy累到早餐都唔食就飛奔返屋企~ 我同Lobon就去咗間難食茶餐廳食咗個無難道但超難食早餐！跟住就齊齊搭火車走人了…歸家人已倦！

Lonbon,能夠與妳並肩作戰共事三載真是榮幸！每次當我獨個兒行去太古城的時候，我都會想起妳，想起往日與妳的午間小敍。

今天妳正式離開了，其待妳展開新的一頁。在我的永久好友名單上已加上妳的名字啦！