今日係留喺京都既最後一日，下午要搭飛機返香港。本來諗住一早起身去京都府立植物園影花，可惜最後都係事敗，因為唔知醒，冇得去！咁唯有在酒店看電視直到check out時間lar！
其實日本人d電視節目有d都幾好睇架！尤其係佢地介紹自己本地風光既旅遊節目，真係好吸引！話時話，人地地方咁大，風光梗係勝人一籌lar！
另外我睇左一個電視節目係講長壽既方法，原來係食d天然健康野，例如蓮藕、海藻、大蒜..........而且全部都係佢地本國出產。當然放心食lar！佢地仲訪問左d老人家，有個九十幾歲話食得健康，到而家仲落田耕田；另一個七十幾歲仲出海打魚，問你服未？
呀！仲有一個電視節目講粟米，佢介紹粟米既營養價值，又教人點揀、點煮d粟米，真係好鬼正，而個節目都成個鐘架！香港又邊會有d咁既電視節目呀！
最後一個令我印象深刻既電視節目，就係一個問答遊戲，好似我地d十五十六咁，但其中一個環節，叫d人估下唔同既紙既承重力既分別。佢地唔單止估，重介紹埋紙既結構，好鬼知性。最後佢地要估既題目係究竟和紙定報紙既承重力多d呢？
我當然估和紙lar！我既理由係，日本人係大民族主義國家，佢地當然會覺得自己出品既梗係好野架lar！又點會俾和紙輸喎！當然結果係如我所料既！呵呵！
唔！我喺日本幾日睇既電視重多過我喺香港睇一年呀！哈哈！
